ٹنڈو الہ یار/ لاڑکانہ/ شہداد کوٹ : گزشتہ روز سہون شریف کی درگاہ لعل شہباز قلندرؒ پر خود کش دھماکے میں شہید ہونے والے متعدد افراد کی نمازجنازہ ادا کردی گئی، اس موقع پرانتہائی رقت آمیزمناظردیکھنے میں آئے۔
تفصیلات کے مطابق سانحہ سیہون شریف میں شہید ہونے والے ٹنڈوالہ یارکے دو نوجوانوں کی تدفین آبائی علاقے میں کردی گئی، سانحے میں شہید ہونے والےدونوں نوجوان آپس میں کزن تھے۔
نوجوان اپنے مرشد پیر واحد شاہ جیلانی کے ہمراہ درگاہ لال شہباز قلندرپر زیارت کیلئے گئے تھے، دونوں افراد کی نماز جناز آبائی گاؤں قادر بخش سپاہی میں ادا کی گئی جس کے بعد کامارو شریف قبرستان میں سپرد خاک کیا گیا۔
لاڑکانہ میں سانحہ سیہون کے 3 شہداء کی تدفین کردی گئی، نمازجنازہ میں شہریوں کی بڑی تعداد نے شرکت کی۔ شہید فیاض ویسر، شہید نجیب شیخ اور 3 ماہ کے نومولود بچے کی نماز جنازہ امام بارگاہ جعفری میں ادا کی گئی۔
نماز جنازہ میں میئر لاڑکانہ سمیت شہداء کے ورثا اور شہریوں کی بڑی تعداد نے شرکت کی۔ نماز جنازہ کے بعد شیعہ تنظیموں کی جانب سے تینوں لاشوں سمیت باغ جناح چوک پر دھرنا دیا گیا، مظاہرین نے شدید احتجاج کرتے ہوئے مطالبہ کیا کہ دہشت گردوں کے خلاف سندھ بھر میں مؤثر کاروائی کی جائے۔
شہداد کوٹ میں سیہون بم دھماکے میں شہید ہونےوالے 4 افراد کی لاشیں ان کے آبائی شہر میں پہنچا دی گئیں، یاد رہے کہ سیہون بم دھماکے میں شہداد کوٹ کے 6 افراد تاحال لاپتہ ہے۔
علاوہ ازیں صوبائی وزیر سہیل انور سیال نے سانحہ سہون شہداء کے گھر جاکران کے لواحقین سے اظہار تعزیت کیا، اور فریال تالپور کا تعزیتی پیغام بھی پہنچایا، انہوں نے کہا کہ متاثرہ خاندانوں کی ہر ممکن مالی امداد کی جائے گی۔
