Tag: NASA warns

ہمارے نظامِ شمسی کے سیارہ زحل کو اس کے گرد موجود خوبصورت چھلے اسے منفرد بناتے ہیں، لیکن ہم یہ نظارہ زیادہ عرصے تک دیکھ کرمحظوظ نہیں ہوسکیں گے۔

تفصیلات کے مطابق امریکی خلائی ادارے ناسا نے انکشاف کیا ہے کہ زحل کے گرد موجود چھلے آہستہ آہستہ تحلیل ہورہے ہیں اورآئندہ دس کروڑ سال میں یہ مکمل طور پر غائب ہوجائیں گے۔

جی ہاں ! آپ نے صحیح پڑھا ، اس سارے عمل میں دس کروڑ سال کا عرصہ لگے گا ، ہمارے سننے میں یہ عرصہ شاید زیادہ ہو لیکن زحل جس کی کل عمر چار ارب سال سے زائد ہے ، اس کے لیے یہ کچھ زیادہ عرصہ نہیں ہے۔

امریکی نشریاتی ادارے سی این این کے مطابق یہ انکشاف رواں سال زحل کی سطح پر اپنا 13 سالہ طویل سفر ختم کرنے والے خلائی جہاز’کیسینی‘ سے موصول ہونے والے ڈیٹا پر تحقیق کے نتیجے میں سامنے آیا ہے۔

اس تحقیق میں سامنے آیا ہے کہ گیس سے بنے اس سیارے کے گرد موجود یہ خوبصورت حلقے جو کہ بنیادی طور پر منجمد برف سے بنے ہوئے ہیں، سیارے کی کشش ِ ثقل کا شکار ہورہا ہے اور زحل کی سطح پر اس حلقے سے ہونے والی بارش کا پانی جمع ہورہا ہے۔

ایک محتاط اندازے کے مطابق زحل کی کشش ثقل اپنے حلقے سے اتنا پانی کشید کررہی ہے کہ جس مقدار سے آدھے گھنٹے میں ایک بڑا سوئمنگ پول بھرجائے۔ یہ اندازہ تحقیق کے سربراہ جیمز او ڈونوغ نے لگایا ہے۔

خیال رہے کہ ماہرین کا ماننا تھا کہ زحل کے حلقے اس کےساتھ ہی وجود میں آئے تھے لیکن اب نئی تحقیق کے بعد وہ یقین کرنے لگے ہیں یہ حلقے عارضی مدت کے لیے تھے اور اب رفتہ رفتہ یہ ختم ہوجائیں گے۔

اگر آپ نے زحل کے حلقوں کا دوربین سے ابھی تک مشاہدہ نہیں کیا ہے تو جلدی سے کسی خلائی مرکز تشریف لے جائیں، جہاں سے ان حلقوں کا نظارہ ممکن ہو، اس سے قبل کہ وہ ختم ہوجائیں۔