اسلام آباد: قومی اسمبلی کے اجلاس میں پاکستان تحریک انصاف کے اراکین کی رکنیت کے خاتمے کیلئے تحریک پیش کر دی گئی ہے۔
قومی اسمبلی کے اجلاس میں ایم کیو ایم کی جانب سے پاکستان تحریکِ انصاف ارکان کی رکنیت کے خاتمے کیلئے تحریک پیش کردی گئی۔ تحریک میں ارکان کے استفعے منظور کرتے ہوئے رکنیت ختم کرنے کی سفارش کی گئی ہے۔
اسپیکر قومی اسمبلی ایاز صادق نے تحریک وصول کرتے ہوئے کہا کہ اس تحریک پر رائے شماری سات دن بعد ہوگی۔
اسلام آباد: وزیرِ دفاع خواجہ آصف کا کہنا تھا کہ مشرقی وسطی کے جنگ میں فوجی بھیجنے کا فیصلہ نہیں کیا ،اگر سعودی عرب کی جغرافیائی حیثیت کو خطرہ ہوا تو دفاع کرینگے۔
قومی اسمبلی میں وزیرِ دفاع خواجہ آصف نے خطاب کرتے ہوئے کہا کہ مشرقی وسطی کے جنگ میں فوج بھیجنے کا فیصلہ نہیں کیا، اگر فوجی بھیجنے کا فیصلہ کیا تو پارلیمنٹ کو اعتماد میں لیں گے، چند دن کے لیے سعودی عرب کا دورہ ملتوی کردیا ہے۔
خواجہ آصف کا کہنا تھا کہ سعودی عرب کی سالمیت کو خطرہ ہوا تو ساتھ دینگے، سعودی عرب کی خودمختاری خطرے میں پڑی تو سعودی عرب کے ساتھ کھڑے ہوں گے۔
انکا مزید کہنا تھا کہ کوئی ایسا فیصلہ نہیں کریں گے، جس کے سال بعد منفی اثرات مرتب ہوں۔
اسلام آباد : تحریک انصاف نے قومی اسمبلی میں واپسی کامشروط فیصلہ کر لیا ۔کور کمیٹی کا اہم اجلاس بائیس مارچ کو طلب کرلیا گیا.
تفصیلات کے مطابق پی ٹی آئی کے سربراہ عمران خان نے پارٹی کی کور کمیٹی کا اجلاس طلب کرلیا ہے، ذرائع کا کہنا ہے کہ تحریک انصاف نے اسمبلی میں واپسی کا مشروط فیصلہ کرلیا ہے۔
چیئرمین پی ٹی آئی عمران خان کی نے عدالتی کمیشن کے قیام سے متعلق مذاکرات کو منطقی انجام تک پہنچانے کی ہدایت کی ہے۔کپتان نے کورکمیٹی کا اہم ترین اجلاس بائیس مارچ کو بنی گالہ میں طلب کیا ہے۔
ذرائع کے مطابق کور کمیٹی کے ارکان اکثریت چاہتی ہے کہ تحریک انصاف سینیٹ کے ساتھ ساتھ قومی اسمبلی میں بھی انتخابی اصلاحات میں مثبت کردار ادا کرے ۔
تحریک انصاف کی قومی اسمبلی میں واپسی کے حوالے سے سیاسی جرگے کا تیارکردہ ڈرافٹ بھی کافی اہمیت کا حامل ہوگا۔
کراچی : متحدہ قومی موومنٹ کے رہنماء نبیل گبول نے قومی اسمبلی کی نشست سے استعفیٰ دے دیا ہے۔
تفصیلات کے مطابق نبیل گبول نے قومی اسمبلی سےاستعفیٰ دیتے ہوئے ایم کیو ایم سے بھی علیحدگی کا اعلان کیا ہے۔
اے آر وائی نیوز سے خصوصی گفتگو کرتے ہوئے انہوں نے کہا کہ انہوں نے اپنا استعفیٰ بذاتِ خوداسپیکر قومی اسمبلی ایازصادق کے سپرد کردیا ہے۔
ان کا کہنا تھا کہ وہ ایم کیو ایم کی قیادت کو بھی اپنا استعفیٰ بھجوادیں گے۔
انہوں مزید تفصیلات پر گفتگو سے گریزکرتے ہوئے کہا کہ تمام ترتفصیلات اورآئندہ کے لائحہ عمل کا اعلان کریں گے۔
.اے آر وائی کے ذرائع کے مطابق اس وقت مختلف سیاسی جماعتیں ان سے رابطہ کررہی ہیں لیکن وہ اپنے سیاسی مستقبل کا اعلان آئندہ چند روز میں کریں گے
اسلام آباد: اپوزیشن لیڈر خورشید شاہ کا کہنا ہے کہ حکومت گلگت بلتستان میں الیکشن سے پہلے دھاندلی کا منصوبہ بنارہی ہے، نوازشریف غلطیوں پر غلطیاں نہ کریں۔
گلگت بلتستان کے اعلی سرکاری عہدوں پر ن لیگ کے من پسند افراد کی تقرری پر پیپلزپارٹی کی تشویش کا اظہار کیا ہے۔
قومی اسمبلی میں قائدِ حزبِ اختلاف خورشید شاہ نے گلگت بلتستان میں وزیراعلی کی تقرری پر تنقید کرتے ہوئے کہا کہ نوازشریف سے درخواست ہے کہ غلطیوں پرغلطی نہ کریں گلگت بلتستان میں دھاندلی سے ثابت ہورہا ہے عام انتخابات میں دھاندلی ہوئی۔
انھوں نے کہا کہ ن لیگ نےگلگت بلتستان میں پری پلان دھاندلی کا منصوبہ بنالیا ہے، گورنر اور چیف الیکشن کمشنر اپنا لگانے کے بعد حکومت نے وزیرِاعلی کا منصب بھی من پسند شخص کو سونپ دیا۔
اپوزیشن لیڈر نے کہا کہ تحریکِ انصاف کا پارلیمنٹ نہ آنا ملک ،جمہوریت اور آئین کیلئے نقصان دہ ہوگا۔
اسلام آباد: قومی اسمبلی میں گزشتہ پانچ سال میں ہلاک کیے گئے دہشتگردوں کی تفصیلات پیش کی گئیں، کل 638 دہشت گرد ہلاک ہوئے۔
جمعرات کی صبح ہونے والے قومی اسمبلی کے اجلاس میں وزیرداخلہ چوہدری نثارعلی خان نے گزشتہ پانچ سال میں ہلاک کئے گئے دہشت گردوں کی رپورٹ پیش کی۔
وزارت داخلہ کے تحت مرتب کی گئی رپورٹ کے مطابق گزشتہ پانچ سال کے دوران کل 638 دہشتگرد مارے جاچکے ہیں۔
ہلاک کیے گئے دہشگردوں میں سے40 پنجاب میں، سندھ میں226، خیبر پختونخواہ میں304، بلوچستان میں55، آزاد جموں کشمیر میں4 اوراسلام آباد میں 3 دہشتگرد ہلاک کیے۔
وزیرِ داخلہ نے بتایا کہ فاٹا میں آپریشن جاری ہے اسی سبب وہاں سے مصدقہ اعداد وشمارموصول نہیں ہوسکے ہیں
گزشتہ روز ہونے والے قومی اسمبلی کےاجلاس میں چوہدری نثار نے بتایا تھا کہ قومی ایکشن پلان کے مطابق اب تک بائیس دہشت گردوں کو تختہ دار پرچڑھایا گیا، اور پھانسی پانے والے تمام مجرمان دہشت گردی کی سنگین کارروائیوں میں ملوّث تھے۔
اسلام آباد: قومی اسمبلی کی قائمہ کمیٹی برائےقواعد وضوابط اور استحقاق کو بتایا گیا کہ پی آئی اے کے جہاز میں کسی بھی قسم کی ویڈیو بنانے پر پابندی عائد کردی گئی ہے۔
وہدری اسد الر حمان کی زیرِ صدارت قومی اسمبلی کی قائمہ کمیٹی برائے قواعد و ضوابط اور استحقاق کے اجلاس میں ارکان پارلیمنٹ کی پی آئی اے کیخلاف شکایت کا جائزہ لیا گیا۔
رکن اسمبلی رمیش کمار نے استحقاق کمیٹی میں بیان دیتے ہوئے کہا کہ انکی وجہ سے فلائٹ تاخیر کا شکار ہوئی، نہ ہی انہیں جہاز کے لیٹ ہونیکی اطلاع دی گئی تھی پھر بھی ان سے مسافروں نے بدتمیزی کی، ارجمند نامی شخص نے احتجاجی مسافروں کی قیادت کی۔
رمیش کمار کا کہنا تھا کہ کرو اور پائلٹ نے کچھ نہیں کیا بلکہ انہیں جہاز سے اتار دیا گیا، پیپلز پارٹی کی رکن قومی اسمبلی شگفتہ جمانی کا کہنا تھا کہ پی آئی اے کی وجہ سے پارلیمنٹرین کو اپنی عزت بچانا مشکل ہے۔
چیئرمین کمیٹی کا کہنا تھا کہ ذمہ دار کوئی اور ہوتا ہےاور وی آئی پی کلچر کا طعنہ سیاست دانوں کو دیا جاتا ہے۔ انھوں نے پی آئی اے کی انکوئری کمیٹی کی رپورٹ استحقاق کمیٹی کو پیش کرنیکی ہدایت کی۔
اسلام آباد: اسپیکر قومی اسمبلی ایاز صادق نے تحریکِ انصاف کے چیئرمین عمران کان پر تنقید کرتے ہوئے کہا کہ جسٹس عمران کان نے این اے122 پر اپنا فیصلہ سنا دیا لیکن وہ جسٹس کاظم کے فیصلے کا انتظار کریں گے۔
اسپیکر قومی اسمبلی نے میڈیا نمائندوں سے گفتگو میں کہا کہ این اے122 سے متعلق جسٹس کاظم ملک کے فیصلے کا انتظار کروں گا، جسٹس کاظم ملک کے تمام فیصلے اور تحقیقاتی کمیشن کی رپورٹ پڑھی ہے۔
ایاز صادق نے کہا کہ عمران خان کی پریس کانفرنس کے بعد لگتا ہے میں نے انہیں دن میں تارے دکھا دیئے ہیں، اُن کا کہنا تھا کہ پی ٹی آئی اراکین کی نشتیں خالی کرا دینے کے حق میں نہیں ہوں یہ اچھی روایت نہیں ہے۔
واضح رہے کہ این اے122کی تحقیقات کے لیے تشکیل دیئے گئے کمیشن نے ووٹوں کے ریکارڈ اور جانچ پڑتال کی رپورٹ الیکشن ٹریبونل میں جمع کرا دی۔
رپورٹ کے مطابق مسلم لیگ نون کے سردار ایاز صادق نے بانوے ہزار تین سو ترانوے ووٹ حاصل کئے جبکہ تحریکِ انصاف کے سربراہ عمران خان نے تراسی ہزار پانچ سو بیالیس ووٹ حاصل کئے اور دیگر امیدواروں نے چار ہزار ایک سو اسی ووٹ حاصل کئے۔
اس سے قبل الیکشن ٹربیونل کے جج کاظم علی ملک نے این اے 122 دھاندلی کیس کی سماعت کی تھی، ٹریبونل نے قرار دیا تھا کہ الیکشن ٹربیونل ایک خودمختار ادارہ ہے، اس کا الیکشن کمشن سے کوئی تعلق نہیں، دونوں جماعتوں کے رہنماؤں کے بیانات سے کنفیوژن پیدا ہو رہا ہے، لگتا ہے دونوں فریقین ایک دوسرے کا میڈیا ٹرائل کر رہے ہیں۔
اسلام آباد: قومی اسمبلی میں توہین آمیز خاکوں کی اشاعت کے خلاف بحث کی گئی جس میں توہین آمیز خاکوں کے خلاف مذمتی قرارداد منظورکرنے کا فیصلہ کیا گیا جب کہ اجلاس کے بعد مارچ بھی کیا گیا۔
تفصیلات کے مطابق جمعرات کو ہونے والے قومی اسمبلی کے اجلاس میں فرانسیسی جریدے کے سرورق پرتوہین آمیز خاکے چھاپے جانے پربحث کی گئی اوربحث کے بعد متفقہ طورپرمذمتی قرارداد منظور کی گئی۔
قرارداد توہین آمیز خاکوں کی اشاعت کے خلاف منظور کی گئی اوراس میں اقوامِ متحدہ اورعالمی برادری سے اپیل کی گئی کہ اس معاملے کا نوٹس لیا جائے۔ قرارداد میں موقف اختیار کیا گیا کہاس طرح کے عمل سے دہشت گردی کو فروغ ملتا ہے ۔ قرارداد میں یہ بھی مطالبہ کیا گیا کہ آزادیٔ اظہار رائے کی بھی حد ہونی چاہیے۔
اس موقع پروفاقی وزیرِریلوے خواجہ سعد رفیق کا کہنا تھا کہ آںحضرتؐ کی توہین کرنا جائز نہیں ہے۔
اجلاس کے بعد قومی اسمبلی کے ممبران توہین آمیز خاکوں کی اشاعت کے خلاف مارچ کیا گیا جس کی قیادت وفاقی وزیر برائے مذہبی امور سردار یوسف نے کی ۔
اسلام آباد: قومی اسمبلی کا اجلاس آج ہوگا، دہشت گردی سے نمٹنے کیلئے آرمی ایکٹ اورآئین میں اکیسویں ترمیم کیلئےشق وار منظوری اسمبلی سے آج لی جائے گی۔
دہشتگردوں کے خلاف ایکشن کیلئے قومی پلان پر تیزی سےعملدرآمد جاری ہے، اکیسویں آئینی ترمیم اور آرمی ایکٹ انیس سو باون میں ترمیم کی ممکنہ منظوری کیلئےقومی اسمبلی کا اجلاس آج شام چار بجے ہوگا۔
اجلاس کیلئے ضمنی ایجنڈا کے مطابق فوجی عدالتوں کے قیام اوراکیسویں آئینی ترمیمی بلز پر آج شق وار منظوری لی جائے گی۔
ہفتے کو قومی اسمبلی کے اجلاس میں وفاقی وزیرِ قانون پرویز رشید نے آئینی ترمیم اور آرمی ایکٹ میں ترمیم کا بل پیش کیا تھا، آرمی ایکٹ میں ترمیم کی منظوری کے لیے ایوان میں موجود ارکان کی اکثریت جبکہ آئینی ترمیم کی منظوری کے لیے ایوان کی کل تعداد کی دوتہائی اکثریت یعنی 228ارکان کی حمایت درکار ہوگی۔
قومی اسمبلی سے منظوری کے بعد بل ایوان بالا یعنی سینیٹ میں بھیجا جائے گا اور وہاں سے منظوری لی جائے گی۔
واضح رہے کہ آرمی ایکٹ میں ترمیم کے تحت فوجی عدالتوں کو دہشت گردی یا ملک دمشن سرگرمیون میں ملوث عناصر کے مقدمات بھیجنے کا اختیار وفاقی حکومت کو ہوگا۔
اکیسویں ائینی ترمیم کے تحت آئین کے فرسٹ شیڈول میں ترمیم تجویز کی گئی ہے، فرسٹ شیڈول میں پاکستان آرمی ایکٹ 1952پاکستان ایئر فورس ایکٹ 1953 پاکستان نیوی ارڈیننس ایکٹ1961 اورتحفظ پاکستان ایکٹ2014کو شامل کیا گیا ہے، آئین کے ارٹیکل 175میں بھی ترمیم کی جائے گی۔