اسلام آباد : وزیراعظم شہباز شریف نے چیئرمین پی ٹی آئی پر شدید تتنقید کرتے ہوئے کہا ہے کہ عمران نیازی دہشت گردوں کو اپنی شیلڈ بنارہا ہے، اس کو دن رات ریلیف مل رہا ہے کوئی پوچھنے والا نہیں۔
پارلیمنٹ کے مشترکہ اجلاس میں اظہارخیال کرتے ہوئے انہوں نے کہا کہ عمران نیازی 2021میں دہشت گردوں کو واپس لے کر آیا، اس نے دہشت گردوں کو آفرز دی اور سوات سمیت دیگر علاقوں میں بٹھایا۔
گزشتہ انتخابات پر سوال اٹھاتے ہوئے وزیراعظم نے کہا کہ کیا مقاصد تھے؟ اور کیا پلاننگ تھی کہ عمران کو لاکر2018 میں جھرلو پھیرا گیا تھا، وہ آخری رات بھی چلا جب آر ٹی ایس کو بند کردیا گیا لاڈلے کو جھرلو کی طرح جتوا کر اس کی پذیرائی کی گئی لیکن اب اس لاڈلے کو پاکستان سے کھلواڑ کی اجازت نہیں دی جائے گی۔
چیف جسٹس آڈیو لیکس کی تحقیقات کرائیں
شہباز شریف کا کہنا تھا کہ ایک آڈیو آئی جس میں ایک سپریم کورٹ کے جج کے بارے میں اہم انکشافات ہوئے، خدا جانتا ہے وہ حقائق پر مبنی ہے بھی یا نہیں لیکن میں سپریم کورٹ کے چیف جسٹس سے گزارش کروں گا کہ اس آڈیو کا فرانزک کرائیں، عدلیہ کی تاریخ کے گزشتہ 40سال کو اٹھا کر دیکھیں ماسوائے شیخ شوکت کے کتنے ججز کو کرپشن پر نکالا گیا؟
توشہ خانہ میں بدترین کرپشن کی
عمران نیازی نے توشہ خانہ میں بدترین کرپشن کی، ان کی محترمہ اہلیہ ہیرے جواہرات کا انتظارکرتی رہی چور ڈاکو کا بیانیہ اتنا تیز کیا گیا کہ دنیا کی تاریخ میں اس کی مثال نہیں ملتی، توشہ خانے کے بعد عمران خان نے ریاست مدینہ کی گردان روک دی، اس مقدس نام پر قوم کو دھوکہ دیا گیا۔
یہ شخص دو چیف جسٹس سے بدتمیزی سے پیش آیا، کسی نے نہیں پوچھا، یہ جتھوں کے ساتھ جاکر عدلیہ کو بلیک میل کرتا ہے، آئین اور قانون کو نہیں مانتا، جو عدالتوں کو نہیں مانتا بدقسمتی سے آج اس کی پذیرائی کی جارہی ہے، صبح ،دوپہر ہو یا رات عدالتیں کھلتی ہیں اور ضمانت ہوتی ہے۔
آرمی چیف کی تقرری
چیف آف آرمی سٹاف جنرل عاصم منیر کی تقرری پر تبصرہ کرتے ہوئے وزیر اعظم شہباز شریف نے کہا کہ 29 نومبر کو جنرل عاصم منیر کو سی او ایس اور جنرل ساحر کو سی جے سی ایس سی بنانے کا فیصلہ اتفاق رائے سے کیا گیا تھا۔ یہ فیصلہ کابینہ کے ارکان سے مشاورت کے بعد کیا گیا، افواہوں کو مسترد کرتے ہوئے انہوں نے کہا کہ سی او اے ایس کی تقرری سو فیصد میرٹ پر کی گئی۔
ان کا کہنا تھا کہ سیاستدانوں پر تو آنکھیں بند کرکے آمدن سے زائد اثاثوں کے کیسز بن جاتے ہیں، پہلے بھی بتا چکا ہوں کہ کس طرح قانون نافذ کرنیوالے اداروں پر کس طرح حملے کیے گئے، فوج کے خلاف بیان بازی کی گئی، اس نے قوم کو تقسیم در تقسیم کر دیا۔ خدانخواستہ کوئی اپوزیشن میں رہا ہو اور ایسی بات کرتا تو اس کو کالے پانی تک بھجوادیا جاتا۔
بس بہت ہوگیا قانون اپناراستہ اختیار کرے گا
قومی اسمبلی اجلاس میں خطاب کے دوران انہوں نے کہا کہ عمران نیازی کے دور میں ترقی کی ایک اینٹ بھی نہیں لگائی گئی، لاڈلے نے دنیا بھر میں پاکستان کے وقار کو مجروح کیا، عمران خان کی بد انتظامی نے ملک کو کئی سال پیچھے دھکیل دیا، سائفر کو ہاتھ میں لے کر پوری ڈھٹائی سے قوم سے جھوٹ بولتا رہا، اس لاڈلےکو کوئی پوچھنےوالا نہیں ہے، قانون اپناراستہ اختیار کرے گا، بس بہت ہوگیا ،پلوں سے پانی بہت بہہ گیا ہے۔ عمران خان نے لابنگ فرمز ہائر کی ہیں، اب ہمارے خلاف بیانات چلوائے جارہے ہیں۔
ملک کو ڈیفالٹ کے دہانے پر لے جانے کا ذمہ دار عمران خان ہے
شہباز شریف نے پاکستان کو ڈیفالٹ کے دہانے پر لے جانے کا ذمہ دار عمران خان کو ٹھہراتے ہوئے کہا کہ فارن فنڈنگ کیس میں اسٹیٹ بینک نے ثبوت دئیے، عمران خان نے منی لانڈرنگ کی۔ عمران نیازی نے آئی ایم ایف کے ساتھ معاہدے میں انحراف کیا۔ حکومتی سربراہ کے طور پرمطالبہ کرتا ہوں کہ ایوان ان معاملات کا نوٹس لے۔
