کراچی: کے الیکٹرک کو نیشنل گرڈ سے ملنے والی چھ سو پچاس میگا واٹ بجلی کا معاہدہ آج ختم ہوجائے گا۔ وزیر اطلاعات سندھ شرجیل میمن کہتے ہیں معاہدے کی توسیع میں کچھ وفاقی وزرا رکاوٹ بن رہے ہیں۔
تفصیلات کے مطابق ملک کے معاشی حب میں بجلی کا نیا بحران سر اٹھانے کو ہے۔کے الیکٹرک کو نیشنل گرڈ سے ملنے والی چھ سو پچاس میگا واٹ بجلی کا معاہدہ آج ختم ہو جائے گا۔
اگر معاہدے میں توسیع نہ ہوئی تو کے الیکٹرک بجلی کی کمی کہاں سے پوری کرے گا؟ بجلی کی فراہمی میں تعطل پیدا ہوا تو کیا نصف کراچی اندھیرے میں ڈوب جائے گا؟اگر ایسا ہوا تومعیشت کا پہیہ کیسے چلے گا؟
اس معاملے پر سندھ کے وزیر اطلاعات شرجیل میمن کا کہنا ہے کہ معاہدے کی توسیع میں کچھ وفاقی وزرا رکاوٹ بن رہے ہیں۔
انہوں نے کہا کہ ایک میگا واٹ کی بھی کمی کسی صورت قبول نہیں کریں گے۔ کے الیکٹرک بجلی مفت میں نہیں بلکہ دیگر صوبوں کی طرح پیسے دے کر خرید رہا ہے۔
میڈیا سے گفتگو کرتے ہوئے ان کا کہنا تھا کہ وفاق سے بجلی کی فراہمی میں کسی قسم کی کمی کا براہ راست فرق ملک کی معیشت پر پڑےگا۔
