مصنوعی ذہانت کے دور میں جنگیں صرف ٹینکوں اور طیاروں سے نہیں لڑی جا سکتیں، الیکٹرانک وار فیئر، انفارمیشن ٹیکنالوجی اور سائبر سیکیورٹی کے شعبے میں خود انحصاری اور مہارت کے حصول کے بغیر جدید جنگ میں کامیابی ممکن نہیں ہے۔
پاکستان میں نیشنل ریڈیو اینڈ ٹیلی کمیونیکیشن کارپوریشن اس حوالے سے اپنی ذمہ داری بہ خوبی نبھا رہی ہے۔ این آر ٹی سی 1966 سے عسکری الیکٹرانکس آلات اور مصنوعی ذہانت کے ذریعے جدت پسندی اور خود انحصاری کی طرف گامزن ہے۔
قومی ادارہ آئی ٹی ٹیکنالوجی، دھماکا خیز مواد کو ناکارہ بنانے اور روبوٹس کی تیاری سمیت آرٹیفیشل انٹیلیجنس اور داخلی سیکیورٹی کے شعبوں میں اسمارٹ سٹیز منصوبوں کے تحت سیکیورٹی اور نگرانی، الیکٹرانک وار فیئر کے محاذ پر نبرد آزما ہے، جب کہ سائبر سیکیورٹی، الیکٹرو میڈیکل اور ریڈیو فریکیونسی آلات کی تیاری اس کے علاوہ ہے۔
ڈرونز ٹیکنالوجی ایکسپرٹ اور ہیڈ آف ٹیکنالوجی فہیم علوی کا کہنا ہے کہ ڈرونز جہاں عسکری مقاصد کے لیے استعمال کیے جا رہے ہیں وہیں دہشت گردی کے لیے اس کے استعمال کو روکنے کے لیے بھی اقدامات کیے گئے ہیں۔
ہیڈ آف روبوٹک سید رضا نے کہا آئی ای ڈیز تلف کرنے اور مسلح افواج کے جانی نقصان کو کم کرنے کے لیے جدید ٹیکنالوجی کا بھی استعمال یقینی بنایا گیا ہے، نیشنل ریڈیو اینڈ ٹیلی کمیونیکیشن کارپوریشن مسلح افواج، قانون نافذ کرنے والے اداروں سمیت وفاقی اور صوبائی حکومتو ں کے لیے خود انحصاری کی منازل طے کر رہا ہے۔
