لاہور : لاہور ہائی کورٹ نے سابق نواز شریف کی طبی بنیادوں پر رہائی کیلئے درخواست پرمیڈیکل بورڈ کے سربراہ پروفیسر ڈاکٹرایازمحمود کو کل طلب کرلیا جبکہ مریم نواز کی رہائی کیلئے الگ درخواست پر نیب اور دیگر کو نوٹس جاری کردیا۔
تفصیلات کے مطابق مسلم لیگ(ن) کے صدر شہباز شریف نے اپنے بھائی نواز کی طبی بنیادوں پر فوری رہائی کیلئے لاہورہائی کورٹ میں درخواست دائر کی، لاہور ہائی کورٹ کے جسٹس علی باقر نجفی اور جسٹس سردار احمد نعیم پر مشتمل دورکنی بنچ نے سماعت کی۔
فاضل بنچ نے استفسار کیا کہ درخواست نواز شریف کی طرف سے کیوں دائر نہیں کی گئی، شہباز شریف کے وکلاء نے اپنے موقف میں کہا کہ اس حوالے سے سپریم کورٹ کے فیصلے موجود ہیں جب بیمار ملزم درخواست دائر کرنے کے قابل نہ ہو تو قریبی رشتہ دار درخواست دائر کرسکتا ہے ۔
عدالت نے استفسار کیا کہ نواز شریف نے کس وجہ سے خود درخواست دائر نہیں کی، جس پر فاضل بنچ کو آگاہ کیا گیا کہ نواز شریف اسپتال میں داخل ہیں، ان کی حالت ایسی نہیں کہ وہ درخواست دائر کر سکیں، نواز شریف کو کو ان کی حالت کے پیش نظر پی کے ایل آئی میں منتقل کیا گیا ہے۔ کراچی سے ڈاکٹر رضا شمسی کو خصوصی طور پر بلایا گیا ہے،اس وقت زندگی و موت کی صورتحال ہے۔
مزید پڑھیں : سیاسی اختلاف اپنی جگہ نوازشریف کی صحت کیلئے دعاگو ہوں، وزیراعظم
وکلاء نے کہا کراچی سے ڈاکٹر رضا شمسی کو خصوصی طور پر بلایا گیا ہے،اس وقت زندگی و موت کی صورتحال ہے، پروفیسر ڈاکٹر محمود ایاز اور ڈاکٹر رضا شمسی نواز شریف کے علاج کی سربراہی کر رہے ہیں۔
جسٹس علی باقر نجفی نے استفسارکیا کہ ایڈووکیٹ جنرل پنجاب کہاں ہیں، انہیں بلائیں۔فاضل عدالت کے طلب کرنے پر ایڈووکیٹ جنرل پنجاب جمال سکھیرا پیش ہو گئے اورموقف اپنایا کہ سیکرٹری داخلہ اور چیف سیکرٹری سے پوچھ کرآگاہ کروں گا ۔
فاضل بنچ نے کیس کی سماعت کل تک ملتوی کرتے ہوئے نواز شریف کا علاج کرنے والے میڈیکل بورڈ کے سربراہ پروفیسر ڈاکٹر ایاز محمود کو طلب کر لیا ۔
دوسری جانب سابق وزیراعظم نواز شریف کی صاحبزادی مریم نواز کی جانب سے چوہدری شوگر مل کیس میں ضمانت پر فوری رہائی کی درخواست پربھی سماعت ہوئی ۔
مریم نواز کی جانب سے امجد پرویز اور اعظم تاررڑ نے درخواست ضمانت دائر کی، جس میں موقف اپنایا گیا چوہدری شوگر مل کیس میں مرکزی درخواست ضمانت لاہور ہائیکورٹ میں زیر سماعت ہے، والد کی طبیعت ناساز ہے ،عدالت چوہدری شوگر مل کیس میں فوری ضمانت پر رہائی کی استدعا منظورکرے۔
جس پر لاہورہائی کورٹ کے دو رکنی بنچ نے نیب سے کل مریم نواز کی درخواست ضمانت پر جواب طلب کر لیا ۔
