لیبیا میں پھنسے ہوئے ایک سو اسی پاکستانیوں کو لے کر آخری خصوصی پرواز پاکستان کیلئےروانہ ہوگئی، لیبیا میں خانہ جنگی کے دوران پھنسے ہوئے پاکستانیوں کی وطن واپسی کا آپریشن مکمل ہوگیا۔
وزیراعظم نواز شریف کی ہدایت پر خصوصی پروازوں کے ذریعے آٹھ ہزار پاکستانیوں کو وطن واپس لانے کیلئے اقدامات کیئے گئے،آج لیبیا سے آخری پرواز ایک سو اسی پاکستانیوں کو لے کر وطن پہنچ رہی ہے۔
لاہور: نواز شریف وزیراعظم نواز شریف نے کہا ہے کہ عوام کو معاشی اعتبار سے سہولت پہنچانا ان کی ترجیح ہے۔لاہور میں وزیر اعلیٰ شہباز شریف سے بات چیت کرتے ہوئے وزیراعظم نواز شریف کا کہنا تھا کہ عوام کی جان و مال سے بڑھ کر کوئی چیز مقدم نہیں۔
انہوں نے کہا کہ قانون نافذ کرنیوالے ادارے محرم الحرام کے دوران اپنی ذمہ داریاں دل جمعی سے مکمل کریں۔ اس موقع پر وزیر اعلی پنجاب شہباز شریف نے وزیر اعظم کو یقین دہانی کرائی کہ عوام کو ملنے والی سہولت کی راہ میں رکاوٹ بننے والوں کوکسی صورت برداشت نہیں کیا جائے گا۔
وزیر اعلیٰ نے کہا کہ حکومتی اقدامات کے ثمرات عوام تک پہنچانے کیلئے ہدایات جاری کر دی ہیں۔ دونوں رہنماؤں کے درمیان ملاقات میں ملک کی مجموعی سیاسی صورتحال سمیت محرم الحرام کی سکیورٹی اور امن و امان کی صورتحال پر بھی غور کیا گیا۔
اسلام آباد : عمران خان نے اعلان کیا ہے کہ محرم الحرام کے احترام میں کل سے عاشورہ تک خطاب نہیں کریں گے۔
وفاقی دارالحکومت میں دھرنے کے شرکاء سے خطاب کے دوران پاکستان تحریکِ انصاف کے چیئرمین عمران خان کا کہنا تھا کہ ہمیں حضرت امام حسینؓ کی قربانیوں سے سبق سیکھنا چاہیئے،جس طرح انہوں نے حق کا ساتھ دیا اور باطل کے آگے کھڑے ہوئے۔
عمران خان نے کہا کہ سمندری طوفان نیلوفر تو تھم گیا لیکن 30 نومبرکو پاکستان کی تاریخ کا سب سے بڑا طوفان آئے گا۔
انہوں نے کہا کہ 30 نومبر کو جب عوام کا سمندر دھرنے میں شامل ہوگا توبجلی کی قیمتیں کم کرنے اورسرکاری اداروں کی نجکاری روکنے کا مطالبہ کریں گے۔
عمران خان نے کہا ہے کہ ملک میں تیل کی قیمتیں ہمارے دھرنے کی وجہ سے کم ہو رہی ہیں، حالانکہ یہ قیمت کم ازکم 15 روہے فی لیٹر کم ہونی چاہئے تھی
ان کا کہنا تھا کہ ہمارا دھرنا حکومت پرایک پریشر ہے جو حکومت کو مختلف اقدامات کرنے پر مجبور کر رہا ہے۔
عمران خان نے مولانا فضل الرحمان کو تنقید کا نشانہ بناتے ہوئے کہا کہ فضل الرحمان نے خواتین کے لئے ایسے الفاظ استعمال کئے جس مثال نہیں ملتی مولانا اسلام کے ٹھیکیداربن کر سیاست کر رہے ہیں۔
انہوں نے کہا کہ 30 نومبر تک نواز شریف کاکردگی بہتر کرلیں کیونکہ اس دن ہم ان سے کہیں گے کہ آپ حکومت نہیں چلا سکے ، آپ استعفیٰ دیں اور گھر جائیں کیونکہ اس دن تو حتمی فیصلہ ہونا ہے۔
اسلام آباد: عمران خان نےنواز شریف اور بلاول بھٹوکے بعدجماعت اسلامی کو تنقید کا نشامہ بناتے ہوئے کہا کہ سراج الحق انتخابی دھاندلی سمجھنےمیں ناکام رہے۔
تحریک انصاف کے سربراہ نےکہا ہے کہ جماعت اسلامی کے امیر سراج الحق اگر خود اسلامی اصولوں کی جنگ لڑ رہے ہیں تو انہیں پی ٹی آئی کے موقف کو درست سمجھنا ہو گا۔۔ اپنے ایک بیان میں عمران خان کا کہنا تھا کہ سراج الحق انتخابات میں ہونے والی دھاندلی تسلیم کرنے میں ناکام رہے،انتخابات میں دھاندلی سراج الحق کے اسلامی اصولوں پر عمل کے عزم پر سوالیہ نشان ہے۔
عمران خان کا کہنا تھا کہ سراج الحق ایماندار ہیں تو عوام کے حق پر ن لیگ اور پی پی پی کے ڈالے گئے ڈاکےکوتسلیم کریں، پی ٹی آئی ان چوروں کے خلاف لڑ رہی ہے جنہوں نے انتخابی مینڈیٹ چرایا تھا، انہوں نے سراج الحق کو یاد دلایا کہ جو بھی حلقہ کھلا اس میں بڑی دھاندلی ثابت ہوئی۔ مگر افسوس سراج الحق نے اب تک پی ٹی آئی کو مسلم لیگ ن اور پی پی پی جیسا سمجھاہے، سراج الحق بھول چکے ہیں کہ نواز شریف اور زرداری پر نیب کے کتنے کرپشن کیسز ہیں۔
اسلام آباد: وزیر اعظم نواز شریف نے سابق چیئرمین پی سی بی نجم سیٹھی کی بطور آئی سی سی صدر نامزدگی کی منظوری دے دی۔
اے آر وائی نیوز نے روایت کو برقرار رکھتے ہوئےنجم سیٹھی کی بطور آئی سی سی صدر نامزدگی کی خبر کوسب سے پہلےبریک کیا، اے آر وائی نیوز کی خبر کی تصدیق کرتے ہوئے نواز شریف نے آئندہ آئی سی سی کے صدر کی تعیناتی سے متعلق پی سی بی کے بھیجے جانے والے نجم سیٹھی کے نام کی منظوری دے دی ۔
انٹرنیشنل کرکٹ کونسل کے صدر کی تعیناتی کا حق پاکستان کے پاس ہے، جس کیلئے کرکٹ بورڈ نے پیٹرن چیف نواز شریف کو ایک ہی نام بھیجا جس کو منظور کر لیا گیا،جس کے بعد پاکستان کرکٹ بورڈ نومبر میں ہونے والے آئی سی سی کے اجلاس میں نجم سیٹھی کا نام صدارت کیلئے پیش کرےگا۔ نجم سیٹھی آئی سی سی صدر بنے والے پہلی پاکستانی کا اعزاز حاصل کرینگے۔ نجم سیٹھی آئندہ سال جون میں اس سال کیلئے بطور صدر آئی سی سی اپنی ذمہ داریاں سنھبالیں گے۔
اسلام آباد: برطانیہ کے وزیراعظم ڈیوڈ کیمرون نے پاکستانی وزیراعظم نواز شریف کوٹیلیفون سہ فریقی کا نفرنس میں شرکت کی دعوت دی۔
برطانوی وزیراعظم ڈیوڈ کیمرون نے پا کستانی ہم منصب میاں نوازشریف کو اس سال دسمبر میں برطا نیہ میں منعقد ہونے والی سہ فریقی کانفرنس میں شرکت کی دعوت دی، اس کانفرنس میں افغا نستان بھی شرکت کرے گا افغانستان کی نما ئندگی اس کے نومنتخب صدر کریں گے۔
اسلام آباد: پاکستان پیپلز پارٹی اور متحدہ قومی موومنٹ کے درمیان اختلافات شدت اختیار کر گئے ہیں۔ اختلافات کی وجہ سے سندھ کی سیاسی فضا کشیدہ صورت حال اختیار کر تی جارہی ہے اور اس میں ایم کیو ایم کے وزرا کی جانب سے دیئے گئے استعفوں نے ان دونوں جماعتوں کے درمیان خلیج بڑھا دی ہے۔
تفصیلات کے مطابق ایم کیو ایم کے وفد نے فاروق ستار کی قیادت میں آج وزیر اعظم پاکستان میاں نواز شریف سے ملاقات کی اور ملاقات کے دوران پیپلز پارٹی کی جانب سے ان کے خلاف کی جانے والی زیادتیوں کی شکایات کے انبار لگا دیئے۔ ملاقات میں پیپلز پارٹی کے رہنما اور قومی اسمبلی میں اپوزیشن لیڈر خورشید شاہ کی جگہ نیا اپوزیشن لیڈر لانے کے حوالے سے بھی بات چیت کی گئی۔ ایم کیوایم کی جانب سے وزیر اعظم کو بتایا گیا کہ قائد حزب اختلاف پر عدم اعتماد برقرار ہے۔
وزیراعظم نواز شریف سے متحدہ قومی موومنٹ کے وفدکی ملاقات کے دوران موجودہ ملکی سیاسی صورتحال اور خاص طور پر سندھ میں سیاسی گرما گرمی پر تبادلہ خیال کیا گیا۔
اس موقع پر وزیر اعظم نواز شریف نے کہاہے کہ اختلاف رائے ہی جمہوریت کا حسن ہے،جمہوری قوتیں آئینی طریقہ کار کے تحت مسائل کے حل کے لئے بات چیت کا ذریعہ اپنائیں۔ انھوں نے کہا کہ پچھلے کچھ ماہ سے پارلیمانی جمہوریت اور قانون کی عملداری کے لئے تمام جماعتوں نے اپنا کردار ادا کیا۔
وزیر اعظم نواز شریف نے کہا کہ نظام کی بہتری کے لئے جمہوری اداروں کے وقار کا تحفظ ضروری ہے۔ وزیر اعظم نے منتخب جمہوری قوتوں کو متحد رہتے ہوئے ملک کی بہتری اور سلامتی سمیت سندھ میں ترقی کے لئے کام کرنے کی ضرورت پر زور دیا ۔
ملاقات میں ایم کیو ایم کی جانب سے رشید گوڈیل اور نسرین جلیل نے بھی شرکت کی جبکہ حکومت کی جانب سے وفاقی وزیر اطلاعات پرویز رشید،وفاقی وزیر برائے ریلوے خواجہ سعد رفیق اور وزیر اعظم کے پولیٹیکل سیکرٹری آصف کرمانی بھی شریک ہوئے۔
واضح رہے کہ سندھ میں خورشید شاہ کے بیان کے بعد ایم کیوایم نے سندھ حکومت سے علیحدگی اختیار کرلی تھی۔ دونوں جماعتوں کے درمیان لفظی جنگ جاری ہے۔ جس کی وجہ سے سندھ میں سیاسی گرما گرمی دیکھی جا رہی ہے ایم کیوایم نیا اپوزیشن لانے کیلئے دیگر سیاسی جامعتوں سے رابطے کر رہی ہے۔
اسلام آباد: یام کیو ایم اور پیپلز پارٹی میں دوریاں بڑھتی جارہی ہے۔ ایم کیو ایم کی جانب سے قومی اسمبلی میں اپوزیشن لیڈرخورشیدشاہ پر اظہارعدم اعتماد، ایم کیوایم کاوفدآج وزیراعظم سےملاقات کرےگا۔
تفصیلات کے مطابق وزیر اعظم کے ساتھ ملاقات کیلئے جانے والے ایم کیو ایم کے وفد کی قیادت فاروق ستار کرینگے جس میں اہم امورپربات چیت ہوگی۔ اپوزیشن لیڈرخورشیدشاہ پرعدم اعتماد متحدہ نے قومی اسمبلی میں اپوزیشن لیڈرکی تبدیلی کیلئے اسپیکر قومی اسمبلی کو بھی خط لکھ دیا۔
وزیر اعظم سے ملاقات میں ایم کیو ایم کے سینئر رہنما بھی شریک ہوں گے، وزیراعظم نواز شریف سے ہونے والی ملاقات میں ملک کی سیاسی صورتحال، مسلم لیگ نواز اور ایم کیو ایم ورکنگ ریلیشن شپ اور کراچی کے میگا پراجیکٹ کے حوالے سے تفصیلی بات چیت کی جائے گی۔
ذرائع کے مطابق ملاقات میں ایم کیو ایم، قومی اسمبلی میں اپوزیشن لیڈر خورشید شاہ کی تبدیلی اور ان کے بیان کے حوالے سے اپنا موقف وزیراعظم کے سامنے رکھے گی جبکہ ایم کیو ایم ملاقات میں نئے انتظامی یونٹس کے حوالے سے بھی بات چیت کرے گی۔
اسلام آباد: تحریک انصاف کے سربراہ عمران خان کا کہنا ہے الیکشن کمیشن خیبرپختونخوا میں بلدیاتی انتخابات کرانے میں تاخیر کررہا ہے، نااہل الیکشن کمیشن ختم کرکے ازسرنو تشکیل دیا جائے۔
تحریک انصاف کے سربراہ عمران خان کا حکومت سے نیا مطالبہ سامنے آگیا، تحریک انصاف کے میڈیا سیل کے مطابق عمران خان نے کہا ہے کہ الیکشن کمیشن خیبرپختونخوا حکومت کی تیاری کے باوجود بلدیاتی انتخابات کرانے میں تاخیر کررہا ہے۔ نااہل اورسست الیکشن کمیشن کو تحلیل کرکے نیا کمیشن بنایا جائے۔
ان کا کہنا تھا مارچ میں بھی صوبائی حکومت بلدیاتی انتخابات کے لئے تیار تھی تاہم الیکشن کمیشن کی سستی کی وجہ سے انتخابات نہ کرائے جاسکے،صوبائی حکومت کے مطالبے کے باوجود الیکشن کمیشن الیکٹرونک ووٹنگ کی اجازت بھی نہیں دے رہا، عمران خان نے اس عزم کا اظہارکیا کہ تحریک انصاف با اختیار الیکشن کمیشن کے قیام اورمنصفانہ انتخابات کے لئے جدوجہد جاری رکھے گی۔
اسلام آباد: وزیر اعظم کے معائنہ کمیشن نے عمران خان کا دعویٰ سچ ثابت کر دیا ، معائنہ کمیشن نے اپنی رپورٹ میں کہا ہے کہ بجلی کے نئے میٹر پینتیس فیصد تیز چلتے ہیں۔
وزیر اعظم نواز شریف کے معائنہ کمیشن کے مطابق بجلی کی تقسیم کار کمپنیوں (ڈسکوز) نے گزشتہ برسوں میں جونئے میٹر نصب کئے ہیں، پرانے میٹر وں سے پینتس فیصد تک تیز چلتے ہیں جبکہ ڈسکوز ان میٹرز کی رفتار کو ایڈجسٹ کر سکتی ہیں۔کمیشن نے ایک خط کے ذریعے مختلف ڈسکوز سے میٹر ریڈنگ اور ، اوور بلنگ سے متعلق جوابات طلب کر لئے ہیں ۔
تیز رفتار میڑوں پر کمیشن نے محکمے سے کہا کہ بجلی کا بحران جوں کا توں ہے، سونے پر سہاگہ نئے میٹر کم از کم 35-30 فیصد تک تیز ہیں،کمیشن نے ڈِسکوز سے اس بات کا بھی جواب طلب کیا ہے کہ آیا آمدنی بڑھانے کے لئے کمپنی کی ڈیمانڈ پر میٹروں کی تیز سپیڈ کو ایڈجسٹ کیا جاتا ہے، صرف اتنا ہی نہیں بڑی تعداد میں میٹرز ، تنصیب کے کچھ دنوں بعد ہی خراب ہو گئے اور انہوں نے زائد ریڈنگ دکھائی۔کمیشن نے ڈسکوز سربراہان سے نئے میڑوں کی لاگت ، میٹر کی فراہم کردہ کمپنیوں اور میٹر ٹیسٹ کرنے والی لیبارٹریز سمیت کئی زاویوں سے معاملات پر فوری جوابات طلب کئے ہیں۔