اسلام آباد : ترجمان نادرا کا کہنا ہے کہ نیاپاکستان ہاؤسنگ پروگرام کے افتتاح کے بعد ویب سائٹ پر فارم لانچ کیا گیا تو 2لاکھ لوگوں نے بیک وقت ڈاؤن لوڈ کیا اور پہلے ہی گھنٹےمیں باسٹھ ہزارفارم ڈاؤن لوڈ ہوئے۔
تفصیلات کے مطابق وزیر اعظم عمران خان کے نیا پاکستان ہاؤسنگ پروگرام کا افتتاح ہوتے ہی مقبولیت بڑھ گئی، ترجمان نادرا نے کہا کہ نیا پاکستان ہاؤسنگ پروگرام پائلٹ فیز ہے، پہلے مرحلے میں صرف 7اضلاع کیلئے پائلٹ فیز شروع کیا گیا۔
ترجمان کا کہنا تھا کہ نادرا ویب سائٹ پر نیا پاکستان ہاؤسنگ اسکیم فارم لانچ کیا گیا تو 2لاکھ لوگوں نے بیک وقت ڈاؤن لوڈ کیا اور 174ملکوں سے لوگوں نے بیک وقت رسائی حاصل کی۔
نادرا ترجمان نے کہا پروگرام کوایک سیکنڈمیں10ہزارہٹس موصل ہورہی ہیں، ویب سائٹ لوگوں کے رش کی وجہ سے عارضی طور پر معطل ہوئی، لیکن اس وقت نادرا ویب سائٹ معمول کے مطابق فعال ہے۔
ترجمان نے بتایا کہ نادراویب سائٹ سے پہلے ہی گھنٹےمیں62 ہزارفارم ڈاؤن لوڈ ہوئے۔
گذشتہ روز نیشنل ڈیٹا بیس اینڈ رجسٹریشن اتھارٹی ( نادرا) نے ’نیا پاکستان ہاؤسنگ‘ پروگرام کا رجسٹریشن فارم جاری کیا تھا ، جو خواہش مند شہری 12 اکتوبر سے 21 دسمبر 2018 تک مختص کردہ ضلعی ہاؤسنگ پروگرام دفاتر میں 250 روپے فیس کے ساتھ جمع کراسکتے ہیں۔
ابتدائی طورپر7 اضلاع میں رجسٹریشن کا آغاز کیا گیا ہے، جن میں سکھر، کوئٹہ، گلگلت، مظفر آباد، سوات، اسلام آباد اور فیصل آباد شامل ہیں۔
رجسٹریشن سے درخواست گزار کی مرضی کی جگہ اور ضرورت کا تعین کیا جائے گا، رجسٹریشن کے ذریعے ماہانہ آمدنی، گھر کے افراد کی تفصیلات، گھرکاسائزہ کیاہوگا؟ تفصیلات کے بعد پاکستان ہاؤسنگ اتھارٹی فیصلہ کرے گی۔
خاندان میں صرف ایک ہی شخص رجسٹریشن کیلئے اہل ہوگا، درخواست گزار کی مرضی کے مطابق منتخب شخص سے ماہانہ قسط لی جائےگی۔
ماہانہ قسط کیلئے3 پلان درخواست گزارکو پیش کیے جائیں گے، 5 سے 10ہزار، 10 سے 15ہزار، 15 سے 20ہزار ماہانہ کا پلان دیا جائے گا۔
رجسٹریشن فارم پر کلک کر کے فارم حاصل کریں
وزیراعظم عمران خان نے سماجی رابطے کی ویب سائٹ ٹوئٹر پر اپنے بیان میں کہا تھا کہ ہم نے 5سال میں 50 لاکھ گھرکی مثالی ہاؤسنگ اسکیم لانچ کردی، اسکیم سے کم آمدنی والوں کوباآسانی گھر میسر آسکیں گے۔
عمران خان کا کہنا تھا کہ اسکیم سے 40 صنعتوں سے منسلک 60لاکھ افراد کو روزگار ملےگا اور براہ راست غیرملکی سرمایہ کاری میں مدد ملے گی۔
وزیراعظم نے ” نیا پاکستان ہاؤسنگ منصوبے” کی افتتاحی تقریب سے خطاب میں کہا تھا کہ ہاؤسنگ اسکیم ملک میں خوشحالی لے کرآئے گی، اپنا گھراسکیم ان لوگوں کیلئےجوکبھی گھربنانےکاسوچ نہیں سکتے تھے، گھروں کے منصوبے میں عام آدمی ہمارا ٹارگٹ ہوگا۔
عمران خان کا کہنا تھا کہ منی لانڈرنگ کو پہلے روکا ہوتا توآج قرضہ نہ لینا پڑتا، ڈاکا پڑے تو گھرمشکل وقت سے گذرتا ہے، میں آپ کو مشکل وقت سے نکالوں گا، اصلاحات کےاثرات چھ ماہ بعد آناشروع ہوں گے۔
ان کا کہنا تھا کہ بے روزگاری بہت بڑامسئلہ ہے اسے حل کریں گے، 50لاکھ گھر بنیں گے تو روزگارکے مواقع پیدا ہوں گے، ایسا موقع ملے گا کہ نوجوان خود کنسٹرکشن سائٹس بنا کردیں گے۔
وزیراعظم عمران خان نے نیاپاکستان ہاؤسنگ اتھارٹی کے قیام کا اعلان کرتے ہوئے کہا تھا اتھارٹی میں کئی ادارےشامل ہوں گے اور سربراہی خو دکروں گا، نیا پاکستان ہاؤسنگ اتھارٹی ون ونڈآپریشن فراہم کرے گی، اتھارٹی بننےتک17ممبران کی ٹاسک فورس بنارہےہیں۔
