فیصل آباد : این سی سی آئی اے فیصل آباد نے انٹرنیٹ کمپنی سے کروڑوں روپے کے فراڈ میں ملوث سابق ملازم کاشف جاوید کو گرفتار کرلیا۔
ابتدائی تحقیقات کے مطابق ملزم نے ملازمت کے دوران خفیہ ڈیٹا چرایا اور غیرقانونی آئی ایس پی نیٹ ورک قائم کیا جبکہ ملزمان کاشف جاوید اور عطاء اللہ کے درمیان کروڑوں روپے کے خفیہ لین دین کا انکشاف بھی ہوا ہے۔
اے آر وائی نیوز فیصل آباد کے نمائندے قمر الزماں کی رپورٹ کے مطابق نیشنل سائبر کرائم انویسٹی گیشن ایجنسی (این سی سی آئی اے) کو ملنے والے شواہد میں یہ بات سامنے آئی کہ ملزم نے 15 کروڑ روپے سے زائد کا فراڈ کیا اور ڈیلرز و وینڈرز کے ساتھ بھاری ٹرانزیکشنز بھی کیں۔
عدالت سے فراڈ کے ملزم کا دو روزہ جسمانی ریمانڈ حاصل کرکے تفتیش شروع کردی گئی ہے جبکہ این سی سی آئی اے نے خدشہ ظاہر کیا ہے کہ یہ گینگ دیگر اداروں کے ساتھ بھی بڑے پیمانے پر فراڈ میں ملوث رہا ہے۔
مزید پڑھیں : ٹیکس چوروں اور فراڈ کرنے والوں کیخلاف ایکشن کی تیاری
واضح رہے کہ ملک میں ٹیکس چوروں اور فراڈ کرنے والوں کے خلاف بڑے ایکشن کا فیصلہ کر لیا گیا ہے، ایف بی آر نے ٹیکس فراڈ کیسز کی تحقیقات کے لیے اضافی اختیارات حاصل کر لیے ہیں۔
ذرائع نے بتایا کہ ایف بی آر نے تحقیقات کے لیے جو اضافی اختیارات حاصل کیے ہیں، اس کے تحت اب انٹرنیٹ اور ٹیلی کام کمپنیاں، پاکستان ٹیلی کمیونیکیشن اتھارٹی (پی ٹی اے) ایف بی آر کو معلومات دینے کے پابند ہوں گے۔ انکوائری یا ٹیکس کیس کی تفتیش کیلیے کمشنر کو مطلوبہ معلومات فراہم کرنا لازمی ہوگا۔
