لاہور: سندھ اور پنجاب کے مختلف شہروں میں جہاں سیلاب سے زمینی تباہ کاریاں جاری ہیں اورمتعدد دیہات زیر آب آگئے ہیں وہیں سیلاب سے بڑے پیمانے پراموات بھی ہوئی ہیں۔
نیشنل ڈیزاسٹرمینیجمنٹ اتھارٹی نے سیلاب کے سبب ہونے والی اموات کے اعداد وشمار جاری کردئیے ہیں۔
جاری کردہ اعداد و شمار کے مطابق ملک کے مختلف علاقوں میں سیلاب سے ہونے والی اموات کی کل تعداد 179 ہے۔
اعدادو شمارکے مطابق سب سے زیادہ یعنی 82 اموات خیبر پختونخواہ میں، پنجاب میں 46، آزاد کشمیر میں 23، بلوچستان میں 13، گلگت بلتستان میں 7 اورفاٹا میں 6 اموات درج ہوئی ہیں۔
سیلابی سلسلہ خیبرپختوںخواہ سے گزرکرسندھ میں داخل ہوچکا ہے لیکن تاحال سندھ میں کہیں سے بھی اموات کی اطلاع نہیں ملی ہے۔
نیشنل ڈیزاسٹر مینجمنٹ اتھارٹی کے مطابق دریائے سندھ میں پانی کے بہاﺅمیں تیزی آگئی ہے اورگڈو بیراج میں پانی کی سطح 7لاکھ 25 ہزار324 کیوسک فٹ ریکارڈ کی گئی جبکہ سکھربیراج سے6لاکھ75ہزار452کیوسک پانی کا ریلا گزررہا ہے۔
