کراچی : این ڈی ای یونیورسٹی کی جانب سے نئے طلبہ کے لئے چینی زبان کا پروگرام لازمی قرار دے دیا گیا ہے، یونیورسٹی کے رجسٹرار نے نوٹیفیکیشن جاری کردیا۔
این ای ڈی یونیورسٹی انجینئرنگ اینڈ ٹیکنالوجی کی جانب سے جاری کردہ اعلامیہ کے مطابق سال2017 میں داخلہ لینے والے تمام طلباء کو چینی زبان لازمی مضمون کے طور پر سکھائی جائے گی۔
یونیورسٹی کے رجسٹرار کی طرف سے جاری کردہ نوٹی فیکیشن کےمطابق یونی ورسٹی کی تازہ ترین بیچ کے تمام طالب علموں کو کہا گیا ہے کہ 15 دسمبر2017 سے چینی زبان کے کورس کورجسٹر کروائیں۔
این ای ڈی کی جانب سے شروع کیا جانے والا یہ پروگرام پاکستان میں سماجی اور اقتصادی تبدیلی کے فروغ میں اہم کردار ادا کرےگا۔
این ای ڈی یونیورسٹی نے اس کورس کو نان کریڈٹ کورس قرار دیا ہے جو اس بات کی جانب اشارہ کرتا ہے کہ فی الحال طلباء کو چینی زبان کا ماہر بنانے کے بجائے اس کے بنیادی نکات سے آگاہ کیا جائے گا۔
اس کے علاوہ چینی زبان کے حوالے سے نمل یونیورسٹی اسلام آباد میں بھی طلبا کے داخلوں میں کافی حد تک اضافہ دیکھا گیا ہے، نمل یونیورسٹی میں چینی زبان کا شعبہ سال1970سے موجود ہے، تاہم اس سال460طلبہ نے چینی کورس میں داخلہ لیا جو گزشتہ سال کے مقابلے میں تقریباً دگنا ہے۔
پاک چین اقتصادی راہداری (سی پیک) منصوبے کے باقاعدہ اعلان کے بعد سے پاکستان میں چینی زبان سیکھنے میں کافی تیزی آئی ہے۔
یاد رہے کہ رواں سال ماہ اکتوبر میں جامعہ این ای ڈی اور جامعہ کراچی کے کنفیوشس انسٹی ٹیوٹ کے مابین ایک ایم اویو پر دستخط کیے گئے تھے، معاہدے کے تحت 2017-2018 بیجزکے تمام طالب علموں کو ایک سال چینی زبان کا کورس لازمی پڑھایا جائے گا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
