ARYNews.tv | Urdu – Har Lamha Bakhabar

Tag: nepal

  • وزیراعظم شاہد خاقان عباسی سے نیپال کےسابق وزیراعظم کی ملاقات

    وزیراعظم شاہد خاقان عباسی سے نیپال کےسابق وزیراعظم کی ملاقات

    کٹھمنڈو: وزیراعظم شاہد خاقان عباسی سے نیپال کے سابق وزیراعظم پشپا کمال دھال پراچندا نے ملاقات کی اور باہمی دلچسپی کے امور پرتبادلہ خیال کیا۔

    تفصیلات کے مطابق نیپال کے دارالحکومت کھٹمنڈو میں وزیراعظم شاہد خاقان عباسی سے سابق نیپالی وزیراعظم پشپا کمال دھال پراچندا نے ملاقات کی۔

    دونوں رہنماؤں نے ملاقات میں پاکستان اور نیپال کے مابین بہترین دوستانہ تعلقات پراطمینان کا اظہار کیا اور مستقبل میں باہمی تعاون بڑھانے پراتفاق کیا۔

    نیپال کے سابق وزیراعظم نے وزیراعظم شاہد خاقان عباسی کے دورے کے حوالے سے کہا کہ ان کا دورہ دونوں ملکوں کے درمیان تعلقات کی مضبوطی کا باعث بنے گا۔

    دوسری جانب وزیراعظم شاہد خاقان عباسی نے پشپا کمال دھال کو ان کی جماعت کی کامیابی اور جمہوری عمل کا حصہ رہنے پر مبارکباد دی۔

    وزیراعظم شاہد خاقان عباسی کی نیپالی ہم منصب سے ملاقات

    خیال رہے کہ گزشتہ روز وزیراعظم شاہد خاقان عباسی نے اپنے نیپالی ہم منصب کھدگا پرساد شرما سے ملاقات کی تھی ، اس موقع پرسیاسی، معاشی، دفاعی، ثقافتی شعبوں میں دو طرفہ تعاون بڑھانے پراتفاق کیا گیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں

  • وزیراعظم شاہد خاقان عباسی کی نیپالی ہم منصب سے ملاقات

    وزیراعظم شاہد خاقان عباسی کی نیپالی ہم منصب سے ملاقات

    کھٹمنڈو : وزیراعظم شاہد خاقان عباسی نے اپنے نیپالی ہم منصب کھدگا پرساد شرما سے ملاقات کی، اس موقع پرسیاسی، معاشی، دفاعی، ثقافتی شعبوں میں دو طرفہ تعاون بڑھانے پراتفاق کیا گیا۔

    تفصیلات کے مطابق وزیر اعظم پاکستان شاہد خاقان عباسی جو ان دنوں نیپال کے دو روزہ دورے پر ہیں نے نیپال کے نومنتخب وزیر اعظم کھدگا پرساد شرما سے خصوصی ملاقات کی ہے، دونوں رہنماؤں کی ملاقات میں دوطرفہ اہمیت کے تمام امور پر تبادلہ خیال کیا گیا۔

    اس موقع پر دونوں ممالک کے درمیان سیاسی، معاشی، دفاعی اور ثقافتی شعبوں میں تعاون بڑھانے پر اتفاق بھی کیا گیا، شاہد خاقان عباسی نے کھدگا پرساد شرما کو نیپال کا نیا وزیراعظم منتخب ہونے اور جمہوری عمل کی تکمیل پرمبارکباد دی۔

    اس سے قبل وزیر اعظم شاہد خاقان عباسی دو روزہ دورے پر جب نیپال پہنچے تو ہوائی اڈے پر نیپال کے وزیر خارجہ یوباراج خطیوادا نے ان کا پرتپاک استقبال کیا، اپنے دورے کے دوران وزیراعظم خاقان عباسی نیپال کی صدر بدیادیوی بھنڈاری سے بھی ملاقات کرینگے۔

    بعد ازاں وزیر اعظم کے اعزاز میں ایک استقبالیہ تقریب کا بھی اہتمام کیا گیا جس میں انہیں اکیس توپوں کی سلامی اور گارڈ آف آنر بھی پیش کیا گیا۔

    وزیر اعظم کے دورہ نیپال کے حوالے سے ذرائع کا کہنا ہے کہ وزیراعظم کے دورہ نیپال سے تجارت، تعلیم، سیاحت، دفاع اور عوامی روابط سمیت باہمی دلچسپی کے تمام شعبوں میں دونوں ملکوں کے تعلقات کو فروغ ملے گا اور وہ مستحکم ہونگے۔

    دورے کے موقع پر سارک کو ایک اہم علاقائی تنظیم کی حیثیت سے دوبارہ فعال کرنے کے امور پر بھی غور کیا جائے گا۔

    واضح رہے کہ نیپال خطے کا ایک اہم ملک ہے اور پاکستان کے اس کے ساتھ تعلقات دوستی، باہمی احترام اور مشترکہ مفادات سے عبارت ہیں۔ دونوں ملک باہمی اور کثیرجہتی فورمز پر بھی ایک دوسرے کی حمایت کرتے ہیں۔

  • کوہ پیماؤں پرماؤنٹ ایورسٹ اکیلےسرکرنےپرپابندی

    کوہ پیماؤں پرماؤنٹ ایورسٹ اکیلےسرکرنےپرپابندی

    کٹھمنڈو: نیپال حکومت نے کوہ پیمائی میں حادثات کو کم کرنے کے لیے ماؤنٹ ایورسٹ سمیت دیگر چوٹیوں پرکوہ پیماؤں کے اکیلے جانے پرپابندی لگادی ہے۔

    تفصیلات کے مطابق نیپال حکومت نے ماؤنٹ ایورسٹ سمیت دیگر چوٹیوں کو اکیلے سر کرنے پر پابندی عائد کردی، نیپال حکومت کی جانب سے نئے قواعد کے مطابق غیرملکی کوہ پیما کے لیے ضروری ہے کہ وہ مقامی گائیڈ حاصل کریں۔

    محکمہ سیاحت کے حکام کا کہنا ہے کہ قواعد میں تبدیلی کوہ پیمائی کو محفوظ بنانے اور اموات میں کمی کے لیے کی گئی ہے۔

    نیپال کی جانب سے نئے قواعد کے تحت معذور اور نابینا کوہ پیماؤں کو بھی پہاڑ سر کرنے کی اجازت نہیں ہوگی جب تک ان کے پاس میڈیکل سرٹیفیکیٹ نہیں ہوگا۔

    خیال رہے کہ نیپال کے سرکاری اعداد وشمار کے مطابق رواں برس کوہ پیمائی میں ہونے والی اموات کی تعداد 6 ہے جن میں 85 سالہ بہادر شیرچن بھی شامل ہیں۔

    یاد رہے کہ 1920 سے ایورسٹ کو سر کرنے کی کوشش میں 200 افراد ہلاک ہوچکے ہیں ان میں سے زیادہ ترہلاکتیں 1980 کے بعد ہوئی ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں

  • ہاتھیوں نے بدترین سیلاب میں پھنسے سیاحوں کی جان بچا لی

    ہاتھیوں نے بدترین سیلاب میں پھنسے سیاحوں کی جان بچا لی

    کھٹمنڈو: نیپال میں بدترین سیلاب کے بعد ایک سفاری پارک میں پھنسے سیاحوں کو ہاتھیوں کی مدد سے ریسکیو کیا گیا۔

    نیپالی حکام کا کہنا ہے کہ شدید بارشوں کے باعث نیپال کے دارالحکومت کھٹمنڈو سے 50 میل کے فاصلے پر واقع راپتی دریا ابل پڑا اور اس کے کنارے واقع سوراہا گاؤں زیر آب آگیا۔

    یہ گاؤں ایک نیشنل پارک کے قریب واقع ہے جہاں 6 سو سے زائد نایاب گینڈے موجود ہیں اور منفرد جنگلی حیات کا مشاہدہ کرنے کے لیے سال بھر یہاں سیاحوں کی آمد و رفت جاری رہتی ہے۔

    ان سیاحوں کے لیے یہاں کئی ہوٹل اور ریستوران بنائے گئے ہیں جن کے سیلاب میں گھر جانے کے بعد ان میں موجود 6 سو کے قریب سیاح محصور ہوگئے۔

    گروپ آف سوراہا ہوٹل کے مالکان کے مطابق مختلف ہوٹلوں میں پھنسے 3 سو سیاحوں کو ہاتھیوں کے ذریعے ریسکیو کر کے قریبی علاقے بھارت پور منتقل کردیا گیا ہے جبکہ مزید کئی سیاحوں کو بچایا جانا باقی ہے۔

    یاد رہے کہ بھارت، نیپال اور بنگلہ دیش میں حالیہ سیلاب اور اس کے باعث ہونے والی خطرناک لینڈ سلائیڈنگ سے اب تک 500 سے زائد افراد ہلاک ہوچکے ہیں جبکہ ہزاروں بے گھر ہوگئے ہیں۔

    سیلاب سے متاثرہ افراد کی مدد کے لیے تینوں ممالک میں بڑے پیمانے پر امدادی کام جاری ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • بھارت، بنگلہ دیش اور نیپال میں سیلاب‘ 250 افراد ہلاک

    بھارت، بنگلہ دیش اور نیپال میں سیلاب‘ 250 افراد ہلاک

    نئی دہلی : بھارت، بنگلہ دیش اور نیپال میں شدید بارشوں کے بعد سیلاب کے نتیجے میں‌250 افراد جبکہ لاکھوں افراد متاثر ہوئے ہیں۔

    تفصیلات کے مطابق بھارت، بنگلہ دیش اور نیپال میں ہونے والی حالیہ بارشوں اور سیلاب کے بعد مختلف واقعات میں 250 افراد ہلاک جبکہ لاکھوں افراد بے گھر ہوگئے۔

    بھارتی ریاست آسام میں 2 لاکھ افراد جبکہ ریاست بہار میں سیلاب کے نتیجے میں تقریباً 15 ہزار افراد اپنا گھر چھوڑنے پر مجبور ہوئے۔

    دوسری جانب بنگلہ دیش میں مقامی حکومتی کے منتظم قاضی حسن احمد کے مطابق بارشوں اور سیلاب کے نتیجے میں 22 افراد ہلاک جبکہ 7 لاکھ افراد متاثر ہوئے ہیں۔

    اُدھرنیپال میں بارشوں کے بعد سیلاب اور لینڈ سلائیڈنگ کے بعد تقریباً 48 ہزار گھر تباہ ہوچکے ہیں۔

    یاد رہے کہ جنوبی ایشیا کے ان علاقوں میں جون سے ستمبر کے دوران مون سون بارشوں کے باعث سیلاب اور لینڈ سلائیڈنگ ہوتی رہتی ہے اور بھاری جانی اور مالی نقصانات ہوتے ہیں۔

    واضح رہے کہ رواں برس مون سون بارشوں کے باعث سب سے زیادہ نقصان بھارت کو ہوا ہے جہاں بارش اور سیلاب کی تباہ کاریوں سے اب تک درجنوں افراد ہلاک ہو چکے ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں

  • ایسے ممالک جہاں جانے کے لیے پاکستانیوں کو ویزے کی ضرورت نہیں

    ایسے ممالک جہاں جانے کے لیے پاکستانیوں کو ویزے کی ضرورت نہیں

    سیر و سیاحت کرنے کا شوق کسے نہیں ہوتا، مگر اس کے لیے بہت سا وقت اور پیسہ درکار ہے۔

    پھر جب سے دنیا بھر میں دہشت گردی کا خوفناک عفریت زور پکڑ رہا ہے تب سے ایک سے دوسرے ملک جانا اور ویزا حاصل کرنا ایک مشکل مرحلہ بن گیا ہے۔

    کچھ عرصہ قبل ایک امریکی ادارے کی جانب سے جاری کی جانے والی ایک رپورٹ میں پاکستانی پاسپورٹ کو ایشیائی ممالک کی فہرست میں کمزور ترین قرار دیا گیا۔

    اس فہرست میں بھارت سب سے آگے تھا جس کا پاسپورٹ تمام جنوبی ایشیائی ممالک میں بہترین پوزیشن پر تھا۔

    تاہم پریشان ہونے کی چنداں ضرورت نہیں، گو کہ پاکستان کا پاسپورٹ پہلے جیسا مضبوط تو نہیں رہا، تاہم اب بھی دنیا کے کئی ممالک ایسے ہیں جو پاکستانیوں کو بغیر ویزے کے قبول کرلیتے ہیں، اور پھر سفر تو کہیں کا بھی ہو، ہمیشہ علم اور خوشی میں اضافے کا باعث بنتا ہے۔

    آئیں دیکھتے ہیں وہ کون سے ممالک ہیں جہاں پاکستانی بغیر ویزے کے باآسانی جاسکتے ہیں۔

    جزائر کیریبئین میں واقع ملک ڈومینیکا

    ہیٹی

    سینٹ ونسنٹ

    ٹرینیڈاڈ اینڈ ٹوباگو

    براعظم اقیانوس (اوشنیا) میں واقع ملک مائیکرو نیزیا

    واناتو

    علاوہ ازیں مندرجہ ذیل ممالک پاکستان کے لیے ویزا اپون ارائیول کی پالیسی پر کاربند ہیں یعنی آپ کو ان ممالک میں پہنچ کر ویزا ملے گا۔

    کمبوڈیا

    افریقی ملک کیپ ورڈ

    کاموروس

    آئیوری کوسٹ

    جبوتی

    گینیا بساؤ

    کینیا

    مڈغاسکر

    مالدیپ

    موریطانیہ

    موزمبیق

    نیپال

    نکارا گوا

    پالاؤ

    سموا

    سشیلز

    تنزانیہ

    مشرقی تیمور

    ٹوگو

    تووالو

    یوگنڈا

    آپ کس ملک کی سیر کو جانا پسند کریں گے؟

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • سابق پاکستانی فوجی نیپال میں لاپتہ

    سابق پاکستانی فوجی نیپال میں لاپتہ

    اسلام آباد: ملازمت کے لیے نیپال جانے والے سابق فوجی افسر محمد حبیب نیپال اور بھارت کے سرحدی علاقے سے لاپتہ ہوگئے۔ محمد حبیب کی گمشدگی کی رپورٹ درج کرلی گئی۔ پاکستانی حکومت نے نیپالی حکومت سے رابطہ کرلیا۔

    تفصیلات کے مطابق فیصل آباد کے رہائشی لیفٹیننٹ کرنل ریٹائرڈ محمد حبیب ظاہر ملازمت کے لیے نیپال گئے تھے جہاں سے وہ لاپتہ ہوگئے ہیں۔

    اہل خانہ کے مطابق محمد حبیب ظاہر نے پاک فوج سے ریٹائرمنٹ کے بعد ملازمت کے لیے اپنی سی وی اقوام متحدہ کی ویب سائٹ سمیت دیگر جگہوں پر بھیجی تھی۔

    ایک ماہ قبل برطانیہ سے مسٹر تھامسن نامی شخص نے ان سے ٹیلی فون پر رابطہ کیا اور انہیں ایک ویب سائٹ پر رابطہ رکھنے کا کہا۔ کچھ عرصے بعد سابق لیفٹننٹ کرنل کو بھاری تنخواہ پر وائس پریذیڈنٹ اور زونل ڈائریکٹر کی آفر کی گئی تھی اور انہیں نوکری کے لیے کٹھمنڈو آنے کو کہا گیا۔

    اہل خانہ کا کہنا ہے کہ محمد حبیب 5 اپریل کو عمان گئے جہاں جاوید انصاری نامی شخص نے محمد حبیب کا استقبال کیا۔ انہیں کہا گیا کہ کٹھمنڈو پہنچ کر ایک نمبر پر رابطہ کیا جائے۔

    اگلے روز محمد حبیب کٹھمنڈو پہنچے اور اسی روز لمبینی کے لیے روانہ ہوگئے۔ 6 اپریل کو انہوں نے گھر والوں کو خیریت سے پہنچنے کی اطلاع دی جس کے بعدسے اب تک ان کا اپنے اہل خانہ سے کوئی رابطہ نہیں ہوسکا۔

    یاد رہے کہ جس علاقے سے محمد حبیب لاپتہ ہوئے ہیں، لمبینی نامی وہ علاقہ بھارتی سرحد سے صرف 5 کلو میٹر دور ہے۔

    مزید پڑھیں: سوشل میڈیا پر ویڈیو پیغام دینے والا بھارتی فوجی لاپتہ

    ذرائع کے مطابق محمد حبیب نے جس ویب سائٹ سے ملازمت حاصل کی وہ بھارت سےچلائی جارہی تھی، تاہم اب وہ ویب سائٹ اور اس کا ٹوئٹر اکاؤنٹ دونوں بند ہیں۔

    محمد حبیب کی گمشدگی کی ایف آئی آر درج کرلی گئی۔

    سفارتی ذرائع کے مطابق ان کی تلاش کے لیے پاکستانی حکومت نیپالی حکومت سے رابطے میں بھی ہے۔ اس سلسلے میں نیپالی سفارت خانے کو لیفٹننٹ کرنل ریٹائرڈ حبیب کے تمام سفری دستاویزات پیش کر دیے گئے ہیں۔

  • نیپال میں پارلیمنٹ نے ملک کی پہلی خاتون صدرِ مملکت کو منتخب کرلیا

    نیپال میں پارلیمنٹ نے ملک کی پہلی خاتون صدرِ مملکت کو منتخب کرلیا

    کھٹمنڈو: نیپال کے صدارتی انتخابات میں اس وقت ایک نئی تاریخ رقم ہوگئی جب پہلی مرتبہ نیپالی عوام نے ملک میں عہدہ صدارت کے لیے کسی خاتون کا انتخاب کیا گیا ہے۔

    تفصیلات کے مطابق نیپال میں آج ہونے والے صدارتی انتخابات میں پارلیمنٹ نے کیمونسٹ پارٹی کی نائب سربراہ اور خواتین کے حقوق کے لیے ایک عرصے سے جدوجہد میں مصروف سماجی رہنما بدھیا دیوی بھنداری کو اپنے ملک کا صدرمنتخب کرلیا ہے۔

    بدھیا نے پارلیمنٹ میں ہونے والی رائے شماری میں 327 ارکان پارلیمنٹ کا اعتماد حاصل کیا اوران کے مخالف امیدوار کو 214 ووٹ ملے ہیں۔

    اس سے قبل کیمونسٹ پارٹی کے سربراہ اپنے اتحادیوں کی مدد سے وازرت عظمیٰ کے عہدے پرمنتخب ہوچکے ہیں یعنی اب نیپال میں کیمونسٹ پارٹی نے مکمل طور پراقتدارحاصل کرلیا ہے۔

    نیپال میں بادشاہت کے خاتمے کے بعد بدھیا دیوی دوسری منتخب صدرہیں ان سے قبل رام باران یادیو آئین کی عدم موجودگی کی بنا پر7 سال تک صدر رہے۔

  • پاکستان کا نیپال کی بحالی کے 1 ملین امریکی ڈالرکی امداد کا اعلان

    پاکستان کا نیپال کی بحالی کے 1 ملین امریکی ڈالرکی امداد کا اعلان

    اسلام آباد: پاکستان نے زلزلے سے متاثرہ نیپال میں زندگی کی بحالی اورتعمیرِنو کے لئے ایک ملین امریکی ڈالر فراہم کرنے کا اعلان کردیا۔

    تفصیلات کے مطابق وزارت خارجہ نے 25 جون 2015 کو ایک مراسلہ جاری کیا ہے جس میں کہا گیا ہے کہ رواں سال زلزلے سے متاثرہ ملک نیپال کی بحالی کے لئے پاکستان ایک ملین امریکی ڈالر فراہم کرے گا۔

    مراسلے کے مطابق یہ اعلان کھٹمنڈو میں نیپال کی بحالی کے لئے کی جانے والی عالمی کانفرنس میں پاکستانی مشن کے قائم مقام سربراہ نے کیا۔

    پاکستان ان اولین ممالک میں سے ہے جنہوں نے 25 اپریل 2015 کو نیپال میں آنے والے تباہ کن زلزلے کے چند گھنٹوں کے اندر امدادی کاروائی کا آغاز کردیا تھا۔ پاکستان کی جانب سے فوری طورپرتیس بستروں پرمشتمل موبائل اسپتال اور 50 افراد پرمشتمل تربیت یافتہ طبی عملہ نیپال روانہ کیا تھا جس نے 1200 سے زائد متاثرین کو فی الفور طبی امداد فراہم کی تھی۔

    طبی عملے کے علاوہ پاکستان کی جانب سے 38 افراد پرمشتمل جدید سازوسامان سے لیس ٹیم بھی روانہ کی گئی تھی جس نے انتہائی جانفشانی سے ملبے میں دفن افراد کا سراغ لگایا اورجدید آلات کی مدد سے کئی افراد کی جان بچانے میں مدد فراہم کی تھی۔

    پاکستان کے وزیراعظم نوازشریف نے نیپال کی حکومت اورعوام سے دکھ اورمصیبت کی اس گھڑی میں اظہاریکجہتی کے لئے وافر مقدار میں امدادی سازوسامان جن میں خیمے، شیلٹر، کمبل، ادویات ، چاول، تیار خوردنی اشیا وغیرہ شامل ہیں روانہ کیا تھا۔

  • نیپال زلزلہ: کوہِ ہمالیہ اپنی جگہ سے کھسک گیا

    نیپال زلزلہ: کوہِ ہمالیہ اپنی جگہ سے کھسک گیا

    بیجنگ: نیپال میں آنے والے تباہ کن زلزلے نے جہاں ملک کے جنوب مغربی حصے کو تباہ کرکے کہ رکھ دیا وہیں دنیا کی بلند ترین چوٹی ماؤنٹ ایورسٹ بھی اپنی جگہ سے تین سینٹی میٹرکھسک گئی۔

    تفصیلات کے مطابق چین کے سرکاری جریدے کے مطابق 7.8 شدت کے زلزلے نے قدرتی طور پرشمال مشرقی سمت میں حرکت کرتے ہوئے پہاڑوں کو واپس دکھیل دیا۔

    چین کے سرکاری محکمہ پیمائش کے مطابق کوہ ہمالیہ گزشتہ 10 سالوں میں اپنی جگہ سے 40 سینٹی میٹرشمال مشرق میں حرکت کرچکا ہے اوراس کی رفتار چارسینٹی میٹرسالانہ ہے۔ اسی اثناء میں یہ پہاڑتین سینٹی میٹربلند بھی ہوچکاہے۔

    واضح رہے کہ نیپال میں آنے والے زلزلے سے کوہ ہمالیہ پربھی لینڈ سلائیڈنگ ہوئی تھی جس کے سبب 18 کوہ پیما ہلاک ہوگئے تھے۔

    اس سانحے کے بعد نیپال اور چین کی حکومتوں نے رواں سال کوہ ہمالیہ پر کی جانے والی تمام کوہ پیمائی کے مشن ملتوی کردئیے تھے۔ کوہ ہمالیہ چین اور نیپال کی مشترکہ سرحد کا کام بھی دیتا ہے ۔ اے ایف پی