اسلام آباد: نیشنل الیکٹرک پاور ریگولیرٹی اتھارٹی (نیپرا) نے بھی عوام پر مہنگائی کا کوڑا برسا دیا، بجلی کی نرخوں میں فی یونٹ اضافے کا نوٹیفکیشن جاری کردیا گیا۔
تفصیلات کے مطابق جون دو ہزار اٹھارہ کے ماہانہ فیول ایڈجسٹمنٹ کی مد میں بجلی مہنگی کر دی ہے، نرخوں میں اضافے کا نوٹیفکیشن بھی جاری کردیا گیا۔
بجلی کی نرخوں میں اضافے کے بعد صارفین کو 6 ارب 50 کروڑ روپے کا بوجھ برداشت کرنا پڑے گا، فیصلے کا اطلاق کے الیکٹرک اور زرعی صارفین پر نہیں ہوگا۔
سینٹرل پاور پرچیزنگ ایجنسی نے بجلی کی فی یونٹ قیمت میں 70پیسے اضافے کی درخواست دی تھی تاہم نیپرا کی جانب سے بجلی کی قیمت میں 50 پیسے فی یونٹ اضافے کی منظوری دی گئی ہے۔
پاکستان نے آئی ایم ایف سے گیس اور بجلی مہنگی کرنے کا وعدہ کرلیا
خیال رہے کہ دو ماہ قبل آئی ایم ایف نے ملک کی معاشی صورت حال پر اعتراضات اٹھائے تھے، جس کے بعد پاکستان نے اعتراضات دور کرنے کے لیے عوام پر مزید بوجھ ڈالنے کی یقین دہانی کراتے ہوئے گیس اور بجلی مہنگی کرنے کا وعدہ کیا تھا۔
دوسری جانب آئی ایم ایف نے پاکستانی معشیت کو لاحق مسائل کی نشاندہی کرتے ہوئے کہا تھا کہ بجلی اور گیس کی قیمتوں میں فوری اضافہ کیا جائے گا۔
واضح رہے کہ حالیہ رپورٹ میں بتایا گیا تھا کہ ملک میں زرمبادلہ کم ہو رہا ہے، بیرونی ادائیگیوں کا دباؤ بڑھ رہا ہے، حکومتی تحویل میں ادارے ملکی معیشت پر بڑا بوجھ ہیں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
