Tag: Netanyahu

واشنگٹن: الجزیرہ نے رپورٹ کیا ہے کہ سابق امریکی صدر ڈونلڈ ٹرمپ کا کملا ہیرس سے متعلق یہ دعویٰ جھوٹا ہے کہ انھوں نے اسرائیلی وزیر اعظم بنجمن نیتن یاہو سے ملنے سے انکار کیا۔

گزشتہ روز روئٹرز نے خبر دی ہے کہ جو بائیڈن کے دوڑ سے باہر ہونے کے بعد ممکنہ ڈیموکریٹک صدارتی امیدوار کملا ہیرس جمعرات کو وائٹ ہاؤس میں نیتن یاہو سے ملاقات کرنے والی ہیں۔

ریپبلکن صدارتی امیدوار ڈونلڈ ٹرمپ نے جھوٹا دعویٰ کیا ہے کہ نائب صدر ہیرس نے اسرائیلی وزیر اعظم کے اس ہفتے واشنگٹن ڈی سی کے دورے کے دوران ان سے ’ملاقات کرنے سے انکار‘ کر دیا ہے۔

کملا ہیرس کی ٹیم نے کہا تھا کہ وہ انڈیاناپولس میں پہلے سے طے شدہ مہم کے پروگرام کی وجہ سے آج کانگریس میں نیتن یاہو کے متنازعہ مشترکہ خطاب میں شرکت نہیں کر سکیں گی۔ یہ واضح نہیں ہے کہ آیا اسی وجہ سے ڈونلڈ ٹرمپ نے دعویٰ کیا تھا۔

ٹرمپ کا دعویٰ نیوز میکس کے ساتھ ایک ٹیلی فون انٹرویو کے دوران سامنے آیا تھا، انھوں نے یہ نسلی نفرت انگیز بیان بھی دیا کہ کسی بھی یہودی امریکی کو اسرائیل کے مؤقف پر ڈیموکریٹس کی حمایت نہیں کرنی چاہیے۔ انھوں نے کہا کہ یہ حقیقتاً حیرت انگیز بات ہے کہ اسرائیل سے محبت کرنے والا کوئی یہودی ڈیموکریٹ کو ووٹ دینے کے بارے میں سوچے بھی۔

برنی سینڈرز سمیت کئی سینیٹرز کا جنگی مجرم کی تقریر سننے سے انکار

ادھر امریکی سینیٹر برنی سینڈرز نے علی الاعلان کہا ہے کہ وہ ’جنگی مجرم‘ نیتن یاہو کی تقریر سننے نہیں جائیں گے، بدھ کو انھوں نے کہا ’’میں بین الاقوامی فوجداری عدالت (آئی سی سی) کے پراسیکیوٹر اور اقوام متحدہ کے آزاد کمیشن دونوں سے اتفاق کرتا ہوں کہ بنجمن نیتن یاہو اور یحییٰ سنوار دونوں جنگی مجرم ہیں۔‘‘

خان یونس میں اسرائیلی فوج اور حماس کے درمیان شدید لڑائی

سینڈرز نے یہ بھی کہا کہ نیتن یاہو کی دائیں بازو کی انتہا پسند حکومت کو امریکی ٹیکس دہندگان کی مزید حمایت حاصل نہیں ہونی چاہیے، وہ غزہ میں انسانی نسل کشی کر رہی ہے۔

متعدد دیگر ڈیموکریٹس نے بھی کہا ہے کہ وہ نیتن یاہو کے خطاب میں شرکت نہیں کریں گے، جن میں سینیٹر پیٹی مرے، ٹم کین اور کرس وان ہولن اور نمائندہ راشدہ طلیب شامل ہیں۔

امریکی دورہ

واضح رہے کہ اسرائیلی وزیر اعظم بنجمن نیتن یاہو واشنگٹن ڈی سی میں ہیں، جہاں وہ امریکی کانگریس سے خطاب کرنے والے ہیں اور صدر جو بائیڈن کے ساتھ ساتھ صدارتی امیدواروں کملا ہیرس اور ڈونلڈ ٹرمپ سے بھی ملاقات کریں گے۔

خیال رہے کہ غزہ میں اسرائیلی جارحیت میں اب تک کم از کم 39,090 فلسطینی شہید اور 90,147 زخمی ہو چکے ہیں۔