کرکٹ کے عالمی مقابلے "ورلڈکپ 2023 ” کی تیاریاں زور و شور سے جاری ہیں، جس کا لوگو بھی جاری کردیا گیا ہے، اس بار ورلڈ کپ میں کچھ نیا ہونے جارہا ہے جو پہلے کبھی نہیں ہوا۔
سال 2023 کے اکتوبر میں شروع ہونے والے کرکٹ ولڈ کپ جس کا انعقاد بھارت میں کیا جائے گا، اس حوالے سے شائقین کرکٹ کیلئے ایک دلچسپ اور خوشگوار بات سامنے آرہی ہے۔
اس بار ورلڈ کپ میں شامل تقریباً تمام ٹیموں میں ایک بات مشترک ہے کہ ان کے کپتان نئے ہوں گے، یعنی جن کھلاڑیوں نے گزشتہ ایونٹ میں اپنی اپنی ٹیموں کی سربراہی کی تھی ان میں سے اس بار کوئی بھی کپتان نہیں ہوگا۔
اگر2019 میں کھیلے گئے ورلڈ کپ کی ٹیموں کے کپتانوں کی بات کی جائے تو اس میں انڈیا کی کپتانی وراٹ کوہلی نے کی تھی جبکہ رواں برس انڈیا کے کپتان روہت شرما ہوں گے۔
اسی طرح انگلینڈ 2019 میں کپتان اوئن مورگن کی قیادت میں ورلڈ چیمپیئن بنا تھا تاہم اس مرتبہ انگلینڈ کی کپتانی جوز بٹلر کے ہاتھ میں ہوگی۔
گزشتہ ورلڈ کپ میں پاکستان کرکٹ ٹیم کے کپتان سرفراز احمد تھے لیکن اس مرتبہ ان کی جگہ ٹیم کی قیادت سٹار بیٹر بابر اعظم کریں گے۔
پچھلے ورلڈ کپ میں سیمی فائنل کھیلنے والی آسٹریلوی ٹیم کی کپتانی ایرون فنچ نے کی تھی جبکہ اس مرتبہ فاسٹ بولر پیٹ کمنز میگا ایونٹ میں کینگروز کو میدان میں اتاریں گے۔
اگر گزشتہ ورلڈ کپ کی رنر اپ ٹیم نیوزی لینڈ کی بات کی جائے اس میں ان کی کپتانی کین ولیمسن نے کی تھی۔
کین ولیمسن جاری انڈین پریمیئر لیگ (آئی پی ایل) کے افتتاحی میچ میں زخمی ہو کر ایوںٹ سے باہر ہوگئے ہیں جس کے بعد کیوی ٹیم کی قیادت ٹام لیتھم کر رہے ہیں۔
کرکٹ کی ویب سائٹ کرک انفو کے مطابق کین ولیمسن ممکنہ طور پر ورلڈ کپ سے بھی باہر ہو سکتے ہیں جس کے بعد بلیک کیپس کو ٹام لیتھم کیپٹن کریں گے۔
گزشتہ میگا ایوںٹ میں افغان ٹیم کی کپتانی آل راؤنڈر گل بدین نائب نے کی تھی لیکن اس مرتبہ ون ڈے کرکٹ کے عالمی کپ میں افغانستان کی کمان حشمت اللہ شاہدی کی پاس ہوگی جبکہ گزشتہ ایونٹ میں مشرفی مرتضٰی کے مقابلے میں تمیم اقبال بنگلہ دیش کو لِیڈ کریں گے۔
اگر سری لنکا اور ویسٹ انڈیز میگا ایونٹ کے لیے کوالیفائی کرتے ہیں تو ان کی کپتانی بالترتیب داسن شناکا اور شائے ہوپ کریں گے جبکہ پچھلے ورلڈ کپ میں دیموتھ کرونارتنے اور جیسن ہولڈر اپنی اپنی ٹیم کے کپتان تھے۔
یاد رہے کہ 2023میں شیڈول کرکٹ ورلڈ کپ کے لیے میزبان انڈیا سمیت دفاعی چیمپیئن انگلینڈ، پاکستان، نیوزی لینڈ، افغانستان، بنگلہ دیش، آسٹریلیا نے کوالیفائی کر لیا ہے جبکہ سری لنکا، جنوبی افریقہ اور ویسٹ انڈیز سمیت بقیہ ٹیموں کی قسمت کا فیصلہ ابھی ہونا باقی ہے۔
جنوبی افریقہ کے ورلڈ کپ میں رسائی کے امکانات روشن ہیں تاہم اگر آئر لینڈ بنگلہ دیش کے خلاف ون ڈے سیریز کے تمام میچز جیت کر آئی سی سی کرکٹ ورلڈ کپ سپر لیگ کے ٹیبل میں منفی 0.382 سے بہتر کر کے منفی 0.076 کر لیتا ہے تو جنوبی افریقہ کو بھی کوالیفائنگ راؤنڈ کھلینا پڑے گا۔
واضح رہے رواں برس ہونے والے ورلڈ کپ کے لیے کوالیفائنگ راؤنڈ 18 جون سے 9 جولائی تک زمبابوے میں کھیلا جائے گا۔ اس ٹورنامنٹ میں میزبان زمبابوے کے علاوہ سری لنکا، ویسٹ انڈیز، نیدرلینڈز، نیپال، عمان، سکاٹ لینڈ، امریکہ، یو اے ای اور آئر لینڈ یا جنوبی افریقہ میں سے کوئی ایک ٹیم حصہ لے گی۔