کراچی: پاکستان ڈیموکریٹک موومنٹ کی جانب سے گذشتہ رات پاکستان پیپلز پارٹی اور عوامی نیشنل پارٹی سے متعلق کئے گئے فیصلے کے بعد دونوں جماعتوں نے اہم فیصلہ کیا ہے۔
ذرائع کے مطابق اےاین پی اور پی پی نے پی ڈی ایم کی بجائےنیا سیاسی اتحادبنانےکا امکان ظاہر کیا ہے، نئےسیاسی اتحاد سے متعلق پی پی اور اے این پی قائدین میں اہم پیشرفت آج متوقع ہے۔
ذرائع کا دعویٰ ہے کہ پی ڈی ایم سے علیحدگی کےبعد آصف زرداری اور بلاول بھٹو اے این پی سےرابطےمیں ہیں بلاول بھٹواور ایمل ولی کےمابین نئےسیاسی اتحاد پر اصولی اتفاق ہوچکا ہے۔
اطلاعات کے مطابق بلاول بھٹو آج وفد کے ہمراہ چارسدہ کا دورہ کرینگے، جہاں بلاول بھٹو بیگم نسیم ولی خان کی وفات پر اے این پی قیادت سےاظہارتعزیت کرینگے۔
بعد ازاں بلاول بھٹو اور اے این پی قیادت کے مابین اہم ملاقات بھی ہوگی، ملاقات میں مستقبل کے سیاسی لائحہ عمل پر غور کیا جائے گا، ملاقات کے بعد بلاول بھٹو اور اے این پی کے قائدین مشترکہ پریس کانفرنس بھی کریں گے۔
ذرائع کے مطابق شوکاز نوٹس پر پاکستان پیپلزپارٹی اور پی ڈی ایم میں اتنی دوریاں پیدا ہوچکی ہیں کہ پیپلز پارٹی کی واپسی مشکل نظر آرہی ہے، اے این پی پہلے ہی سے پی ڈی ایم کو خیرباد کہہ چکی ہے۔
واضح رہے کہ گذشتہ روز اسلام آباد میں پی ڈی ایم کا سربراہی اجلاس منعقد ہوا، اجلاس میں پی ڈی ایم سربراہان پیپلز پارٹی اور اے این پی سے متعلق فیصلے پر قائم رہے، اپوزیشن اتحاد کی بیٹھک میں کوئی بریک تھرو نہ ہو سکا، پی پی، اے این پی سے متعلق فیصلہ برقرار رہا۔
مولانا کا کہنا تھا کہ پی پی، اے این پی ہمارے ساتھ نہیں ہیں اس لیے اجلاس میں ان سے متعلق غور و غوض نہیں کیا، پریس کانفرنس میں پی ڈی ایم رہنماؤں نے اس سلسلے میں مزید گفتگو سے انکار کیا۔
