Tag: New York City

نیویارک: امریکا میں بلڈوزر نے 100 سے زائد بائیکیں کچل ڈالیں، اس واقعے کی ویڈیو وائرل ہو گئی۔

تفصیلات کے مطابق نیویارک سٹی کے میئر نے سڑکوں کو محفوظ بنانے کے لیے سو سے زیادہ غیر قانونی بائیکوں کو بلڈوزر سے کچلوا دیا۔

میئر ایرک ایڈمز نے حال ہی میں شہر میں سیکڑوں غیر قانونی اور خطرناک بائیکوں کو بلڈوزر کے ذریعے تباہ کرنے کا حکم جاری کیا ہے۔

نیویارک میں سڑکوں کو محفوظ بنانے کی کوشش میں ڈرٹ بائیکس (ناہموار اور سخت زمین پر چلائی جانے والی بائیکیں) اور اے ٹی ویز کو ضبط کر کے تباہ کر دیا گیا۔

Illegal dirtbikes and ATVs endanger the lives of New Yorkers. We're not letting them go unchecked.

This year we've already taken nearly 2,000 bikes off the street and we're just getting started.

Get the message: you want to terrorize our neighborhoods?

You'll get crushed. pic.twitter.com/snHjqfWr90

— Mayor Eric Adams (@NYCMayor) June 21, 2022

غیر قانونی گاڑیوں کے مالکان اور انھیں چلانے والے شہریوں کو ایک واضح پیغام دینے کے لیے شہر کے میئر نے دسیوں غیر قانونی موٹر سائیکلوں کو بلڈوزر سے کچلنے کی ویڈیو ٹویٹ کر دی۔

میئر نے ٹویٹ کیا کہ ’آپ ہمارے محلوں کو دہشت زدہ کرنا چاہتے ہیں؟ اگر ایسا ہے تو آپ کچل دیے جائیں گے۔‘ اس ویڈیو کلپ کو اب تک 18 لاکھ سے زیادہ لوگ دیکھ چکے ہیں۔

نیویارک سٹی کے میئر نے کہا کہ انفورسمنٹ کمپین کے دوران تقریباً 900 بائیکس اور ATVs کو ضبط کیا گیا، ان میں سے تقریباً 90 فی صد کو 2021 میں پکڑا گیا تھا۔ انھوں نے یہ بھی کہا کہ ان میں سے زیادہ تر غیر دستاویزی بائیکیں تھیں اور اکثر غیر بیمہ شدہ ڈرائیورز چلاتے ہیں۔

New York City Mayor Eric Adams waved a checkered flag to start a bulldozing event, where 100 illegal dirt bikes and all-terrain vehicles, confiscated by the New York City Police Department, were crushed pic.twitter.com/DuzKOnWwAN

— Reuters (@Reuters) June 22, 2022

میئر کے مطابق یہ گاڑیاں اکثر آس پاس کے مضافاتی علاقوں سے چوری کی جاتی ہیں اور ATVs یا ڈرٹ بائک چلانے والے گروہ انھیں شہر میں مقامی لوگوں کو خوف زدہ کرنے کے لیے استعمال کرتے ہیں۔

میئر نے کہا کہ ان میں سے بہت سے بائیک والوں کے پاس انشورنس نہیں ہے، اگر وہ کسی کو اس سے زخمی کرتے ہیں، تو زخمی شخص پر طبی اخراجات کا بوجھ بھی پڑ جاتا ہے۔