ARYNews.tv | Urdu – Har Lamha Bakhabar

Tag: Nigeria

  • پاکستان کی نائیجیریا میں سائنس و ٹیکنالوجی یونیورسٹی بنانے کی پیشکش

    پاکستان کی نائیجیریا میں سائنس و ٹیکنالوجی یونیورسٹی بنانے کی پیشکش

    جدہ: وفاقی وزیر برائے سائنس و ٹیکنالوجی فواد چوہدری نے نائیجیرین ہم منصب سے ملاقات کے دوران نائیجیریا میں سائنس و ٹیکنالوجی یونیورسٹی بنانے کی پیشکش کی۔

    تفصیلات کے مطابق جدہ میں سائنس ڈپلومیسی ورکشاپ کی افتتاحی تقریب منعقد ہوئی جس میں وفاقی وزیر برائے سائنس و ٹیکنالوجی فواد چوہدری نے شرکت کی۔

    ورکشاپ میں مختلف مسلم ممالک کے سائنسدانوں اور سائنسی منتظمین نے شرکت کی۔

    اس موقع پر وفاقی وزیر فواد چوہدری کی نائیجیریا کے وزیر سائنس و ٹیکنالوجی سے ملاقات ہوئی۔ ملاقات میں سائنس اور ٹیکنالوجی میں دونوں ممالک کے درمیان تعاون پر بات چیت ہوئی۔

    وفاقی وزیر فواد چوہدری کا کہنا تھا کہ ٹیکنالوجی کے شعبے میں پاکستان کے تعاون کی پیشکش کی، پاکستان نے نائیجیریا میں سائنس و ٹیکنالوجی یونیورسٹی بنانے کی پیشکش کی۔

    انہوں نے کہا کہ نائیجیریا کے وزیر کو پاکستان کے دورے کی دعوت بھی دی۔

    نائیجیرین وزیر کا اس موقع پر کہنا تھا کہ پاکستان کے تجربات سے فائدہ اٹھائیں گے، پاکستان سے قریبی دوستانہ تعلقات ہیں۔ انہوں نے سائنس کے شعبے میں پاکستان کی ترقی کو بھی سراہا۔

  • غیر ملکیوں پر حملے، نائیجیریا نے جنوبی افریقا سے اپنے شہری نکالنا شروع کر دیے

    غیر ملکیوں پر حملے، نائیجیریا نے جنوبی افریقا سے اپنے شہری نکالنا شروع کر دیے

    ابوجا:‌ جنوبی افریقا میں غیرملکیوں پر حملوں اور  جھڑپوں کے بعد نائیجیریا نے اپنے شہریوں کو نکالنا شروع کر دیا.

    تفصیلات کے مطابق جنوبی افریقا میں حملوں کے بڑھتے خطرے کے پیش نظر نائیجیریا کی حکومت حرکت میں‌ آگئی.

    نائیجیریا کی حکومت اب تک 180 افراد کو جنوبی افریقا سے نکال چکی ہے، البتہ اب بھی اس کے کئی شہری جنوبی افریقا کے ایئرپورٹس پر موجود ہیں.

    میڈیا کے مطابق ساؤتھ افریقی حکام نے نائیجیریاکے درجنوں شہریوں کو کاغذات نامکمل ہونے کی وجہ سے ہوائی اڈوں پر روک رکھا ہے، ان افراد میں خواتین اور بچے بھی ہیں، جنھیں واپس جانے کی اجازت فراہم نہیں کی گئی۔

    خیال رہے کہ جنوبی افریقا میں غیرملکیوں پر حملوں کا آغاز ماہ اگست میں ہوا تھا، جس میں دھیرے دھیرے شدت آتی گئی.

    اوائل میں‌ اس کا مرکز دارالحکومت پریٹوریا تھا، مگر پھر یہ جھڑپیں دیگر شہروں میں بھی پھیل گئی.  اب یہ پرتشدد واقعات بارہ افراد ہلاک ہوچکے ہیں، جب کہ تین درجے افراد کے زخمی ہونے کی بھی اطلاعات ہیں.

    پولیس نے شر پسندوں پر ربڑ کی گولیاں برسائیں اور بہت سوں کو گرفتار کیا، مگر اس  خطرہ اب بھی موجود ہے، جس کے پیش نظر نائیجیریا نے اپنے چھ سو شہریوں کو جنوبی افریقا سے نکالنے کا فیصلہ کیا۔

  • ٹوٹے ہوئے اسمارٹ فون سے سائنس فکشن فلم تیار

    ٹوٹے ہوئے اسمارٹ فون سے سائنس فکشن فلم تیار

    سائنس فکشن فلم کا سنتے ہی ذہن میں بڑے بڑے سیٹ، فلم سازی کے جدید آلات اور بہت سارے لوگوں کی ٹیم آجاتی ہے، یہ تصور کرنا محال ہے کہ عام سے ساز و سامان کے ساتھ کوئی سائنس فکشن اور اسپیشل افیکٹس والی فلم تیار ہوسکتی ہے۔

    تاہم افریقی ملک نائیجیریا میں کچھ نوجوان لڑکے ایک ٹوٹے ہوئے موبائل فون اور نہایت محدود وسائل کے ذریعے سائنس فکشن فلمیں بنا رہے ہیں۔

    نائیجیریا کے ایک چھوٹے سے شہر کے رہائشی یہ 8 نوجوان شارٹ فلم بنانے کے لیے ٹوٹا پھوٹا سا اسمارٹ فون اور ایک خستہ حال اسٹینڈ استعمال کرتے ہیں۔ ان لڑکوں نے خود کو ’کرٹکس کمپنی‘ کا نام دیا ہے۔

    کرٹکس کمپنی کے کریو نے انٹرنیٹ پر موجود ٹیوٹوریل ویڈیوز سے اسپیشل افیکٹس کا استعمال سیکھا ہے جسے وہ اپنی فلموں میں استعمال کرتے ہیں۔

    ان کا کہنا ہے کہ وہ اپنی ویڈیوز کو وائرل نہیں کرنا چاہتے، بس یہ بتانا چاہتے ہیں کہ ایک چھوٹے سے شہر میں موجود لڑکے کچھ نیا کر رہے ہیں۔

    ان لڑکوں کے پاس نہایت پرانا سامان اور عام سی اسپیڈ کا انٹرنیٹ ہے اور وہ بھی اکثر بجلی جانے کی وجہ سے ٹھپ ہوجاتا ہے۔ ایک 5 منٹ کی شارٹ فلم کو رینڈر کرنے میں انہیں 2 دن لگ گئے۔

    ان کا کہنا ہے کہ وہ زیادہ سے زیادہ 10 منٹ کی فلم تیار کرسکتے ہیں کیونکہ اس فلم کو اپ لوڈ ہونے میں بھی خاصا وقت لگ جاتا ہے۔ کچھ دن قبل کی جانے والی فنڈ ریزنگ میں انہیں 6 ہزار ڈالر حاصل ہوئے جس سے انہوں نے کچھ نیا سامان خریدا ہے۔

    ان لڑکوں کا کہنا ہے کہ وہ ایسا کچھ کرنا چاہتے ہیں جو آج سے پہلے کبھی نہیں ہوا۔

    نائیجیریا کی فلم انڈسٹری نولی ووڈ فلموں کی تعداد کے حوالے سے دنیا کی دوسری بڑی فلم انڈسٹری سمجھی جاتی ہے۔ کرٹکس کپمنی کو امید ہے کہ ان کا مستقبل روشن ہے اور وہ بہت جلد اپنی منزل حاصل کرلیں گے۔

  • نائیجیریا : قزاقوں کا بحری جہاز پر حملہ، 10 ترک ملازمین اغواء کرلیے

    نائیجیریا : قزاقوں کا بحری جہاز پر حملہ، 10 ترک ملازمین اغواء کرلیے

    انقرہ : نائیجیریا کی بندرگاہ پر قزاقوں نے مال بردار بحری جہاز میں سوار عملے کے دس ترک ملازمین کو اغواء کرلیا۔ غیرملکی خبررساں ادارے کے مطابق ترک وزرات خارجہ نے بتایا کہ بحری جہاز کے عملے کو13 جولائی کی شام کو یرغمال بنایا گیا۔

    اس حوالے سے وزارت خارجہ نے کہا کہ قزاقوں کی جانب سے جہاز چھوڑنے کے بعد اسے گھانا کی بندرگاہ ٹیما لے جایا گیا جہاں گھانا اور نائیجیریا کے حکام مغوی عملے کی واپسی کی کوششیں کررہے ہیں۔

    شپنگ کمپنی کیدیوگلو ڈینیزچلیک کے تحت چلنے والے ترک مال بردار بحری جہاز پک سوئے ون پر گزشتہ شب حملہ کیا گیا۔ کیدیوگلو ڈینیزچلیک کمپنی کے ملازم نے شناخت ظاہر نہ کرنے کی شرط پر بتایا کہ18 افراد پر مشتمل بحری جہاز کے عملے میں سے دس ترک شہریوں کو اغوا کیا گیا۔

    انہوں نے دو ملازمین کو رہا کرنے سے متعلق مقامی میڈیا کی رپورٹس کو مسترد کردیا۔ ترک میڈیا میں کمپنی کی جانب سے نشر کیے گئے بیان کے مطابق جب قزاقوں نے حملہ کیا اس وقت بحری جہاز کیمرون سے آئیوری کوسٹ کی جانب رواں دواں تھا اور اس میں کوئی سامان نہیں تھا۔

    بیان میں مزیدکہا گیا کہ ابتدائی معلومات کے مطابق حملے میں کوئی زخمی یا ہلاک نہیں ہوا اور ہمارے ملازمین کی باحفاظت رہائی کے لیے کوششیں جاری ہیں۔

    ترکی کی حکمراں جماعت کے ترجمان عمر چیلیک نے کہا کہ ترک عملے پر مبنی بحری جہاز کو نائیجریا میں یرغمال بنایا گیا لیکن انہوں نے مزید تفصیلات فراہم نہیں کیں۔

    خیال رہے کہ قزاق عموماً تاوان وصول کرنے کے لیے بحری جہاز کے عملے کو اغوا کرتے ہیں، 2019 کے پہلی سہ ماہی میں نائیجیریا میں بحری قزاقوں نے 14 حملے کیے تھے جبکہ 2018 میں اسی دورانیے میں 22 حملے کئے گئے تھے۔

  • افریقی بچوں نے ذاتی کاموں میں مدد کے لیے روبوٹ تیار کرلیے

    افریقی بچوں نے ذاتی کاموں میں مدد کے لیے روبوٹ تیار کرلیے

    افریقی ملک نائجیریا میں 2 بچوں نے ایسے ذاتی روبوٹ تیار کیے ہیں جو گھر کے کاموں میں ان کی مدد کرسکتے ہیں۔ دونوں بچوں کی عمریں 12 سال ہیں۔

    اوولولا اور فتحیہ عبدالہی نامی ان دو بچوں نے صرف ایک سال قبل ہی کوڈنگ کرنا سیکھی ہے اور اب ایک سال بعد وہ اس قابل ہوگئے ہیں کہ اپنے ذاتی کاموں کی مدد کے لیے روبوٹ تیار کرسکیں۔

    اوولولا کا روبوٹ چیزوں کو پہچان کر انہیں ایک سے دوسری جگہ پر منتقل کرسکتا ہے جبکہ فتحیہ کا روبوٹ کپڑے دھونے کے بعد انہیں تہہ کر کے رکھ سکتا ہے۔

    فتحیہ کہتی ہیں کپڑوں کو تہہ کرنا انہیں ایک مشکل عمل لگتا تھا چنانچہ انہوں نے ایسی مشین تیار کرنے کا سوچا جو ان کی مدد کرسکے۔ مستقبل میں وہ فوڈ سائنٹسٹ بننا چاہتی ہیں۔

    دوسری جانب اوولولا روبوٹک انجینئر بننے کی خواہش رکھتا ہے۔ دونوں بچوں کی ذہانت کو دیکھتے ہوئے یہ کہنا مشکل نہیں کہ یہ مستقبل میں ضرور اپنی منزل حاصل کرلیں گے۔

  • نائجیریا : آئل ٹینکر دھماکے سے پھٹ گیا،50افراد ہلاک، سو سے زائد زخمی

    نائجیریا : آئل ٹینکر دھماکے سے پھٹ گیا،50افراد ہلاک، سو سے زائد زخمی

    ابوجا : نائجیریا میں آئل ٹینکر دھماکے سے پھٹ گیا، حادثے میں 50افراد ہلاک اور سو سے زائد زخمی ہوگئے، جائے حادثہ سے دس لاشیں نکال لی گئیں باقی کی شناخت ناممکن ہوگئی ہے۔

    تفصیلات کے مطابق وسطی نائیجیریا کے علاقے میں پیٹرول کے ٹینکر میں دھماکے کے بعد آگ لگنے سے 50 افراد ہلاک اور 100 سے زائد زخمی ہو گئے۔

    غیر ملکی خبر رساں ادارے کے مطابق وسطی نائیجیریا کی ریاست بینو کے گاؤں اہمبے میں جائے حادثہ پر ہر طرف لاشیں ہی لاشیں نظر آرہی ہیں، دھماکے کی آواز دور ودر تک سنی گئی۔

    آگ اس قدر شدید تھی کہ اس کے شعلے آسمان کو چھو رہے تھے، پولیس حکام کا کہنا ہے کہ آئل ٹینکر کے ڈرائیور نے روڈ پر واقع گڑھے سے بچنے کی کوشش کی لیکن ٹینکر بے قابو ہو کر الٹ گیا اور اس میں آگ بھڑک اٹھی۔

    جس کی زد میں آکر قریب موجود گاڑیوں میں بھی آگ لگ گئی اور کچھ مقامی افراد بھی جان سے ہاتھ دھو بیٹھے، مقامی حکام کا کہنا ہے کہ جائے وقوعہ سے کم از کم 10 افراد کی لاشیں برآمد کرلی گئی ہیں۔

    جب کہ کم سے کم 70 افراد آگ لگنے کہ وجہ سے شدید جھلس کر زخمی ہوگئے ہیں جنہیں طبی امداد کیلئے مقامی اسپتال منتقل کردیا گیا ہے۔

  • نائجیریا میں اسکول کی عمارت گرنے سے 9 بچے جاں بحق

    نائجیریا میں اسکول کی عمارت گرنے سے 9 بچے جاں بحق

    ابوجا : نائجیریا میں اسکول کی عمارت منہدم ہونے سے نرسری اور پرائمری کلاس کے 9 بچے جاں بحق ہوگئے۔

    تفصیلات کے مطابق نائجیریا کے شہر لاگوس میں افسوس ناک واقعہ پیش آیا، اسکول کی عمارت گرنے سے 9 بچے جان کی بازی ہار گئے۔

    ریسکیو حکام کے مطابق اسکول میں 100 سے زائد بچے تھے اور متعدد بچے تاحال ملبے تلے پھنسے ہوئے ہیں۔

    پولیس حکام کے مطابق بچوں کو عمارت کے ملبے سے نکالنے کے لیے ریسکیو آپریشن جاری ہے، عمارت منہدم ہونے کی وجہ فوری طور پر معلوم نہیں ہوسکی۔

    یاد رہے کہ گزشتہ روز برازیل کے شہر ساؤ پاؤلو کے اسکول میں فائرنگ سے 5 طالب علموں سمیت 8 افراد ہلاک ہوگئے تھے۔

    برازیل اسکول میں فائرنگ، طالب علموں سمیت 8 افراد ہلاک

    حملہ آوروں کی فائرنگ سے 17 طالب علم زخمی ہوئے تھے جنہیں طبی امداد کے لیے اسپتال منتقل کردیا گیا تھا۔

    واضح رہے کہ 2014 میں نائجیریا کے شہر لاگوس میں 6 منزلہ عمارت گرنے سے 116 افراد ہلاک جبکہ متعدد زخمی ہوگئے تھے۔

    نائیجریا میں سال 2016 میں چرچ کی عمارت منہدم ہونے کے نتیجے میں 100 افراد ہلاک جبکہ درجنوں زخمی ہوئے تھے۔

  • نائجیریا: مسلح افراد کا گاؤں پر حملہ، بچوں سمیت 45 افراد ہلاک

    نائجیریا: مسلح افراد کا گاؤں پر حملہ، بچوں سمیت 45 افراد ہلاک

    ابوجا : نائجیریا کی ریاست گواسکا کے گاؤں میں مسلح جرائم پیشہ گروہ نے حملہ کرکے بچوں اور عورتوں سمیت 45 افراد کو ہلاک کردیا۔

    تفصیلات کے مطابق براعظم افریقہ کے وسط میں واقع مسلم اکثریتی ملک نائجیریا کی ریاست گواسکا کے ایک گاؤں کاڈونا میں اتوار کی شام ڈاکوؤں نے حملہ کردیا، ڈاکوؤں کی فائرنگ سے 45 افراد کو ہلاک کردیا جن میں بچے بھی شامل ہیں۔

    غیر ملکی خبر رساں ادارے کا کہنا تھا کہ علاقائی حکومت نے کاڈونا میں متاثرہ افراد کی امداد کے لیے مقامی پولیس طبی خدمات انجام دینے والے عملے کو فوری طور پر روانہ کردیا تھا۔

    پولیس ترجمان مختار علی کا کہنا تھا کہ حملہ آوروں کا تعلق ہمسایہ ریاست زام فارا سے ہے جو راہزنی، اغواء برائے تعاون جیسی وارداتوں میں ملوث ہی۔

    مختار علی نے میڈیا کو بتایا کہ جرائم پیشہ عناصر تین گھنٹے تک متاثرہ گاؤں کا میں خودکار اسلحہ لے کر دندناتے پھرے اور عام افراد کو قتل کرکے ان کے گھروں کو آگ لگاتے رہے۔

    پولیس ترجمان کا کہنا ہے کہ حملہ آوروں نے خصوصاً ان افراد کو ڈھونڈ ڈھونڈ کر گولیوں کا نشانہ بنایا جو ’جو اپنا دفاع خود کرو‘ کی مہم چلارہے تھے۔

    ضلعی حکومت نے واقعے کی تصدیق کرتے ہوئے میڈیا کو بتایا کہ مذکورہ مسلح گروہوں سے نمٹنے کے لیے مستقل طور پر علاقے میں آرمی کو تعینات کردیا گیا ہے۔ تاکہ عام افراد کے قتل عام کو روکا جاسکے۔

    خیال رہے کہ نائجیریا کی ایک اور ریاست جنوارا میں ایک ہفتہ قبل ہی مذکورہ گروہ نے کوئلے کی سرنگوں میں کام کرنے والے 14 افراد کو قتل کیا تھا۔

    یاد رہے کہ نائجیریا گذشتہ کئی برسوں سے سیکیورٹی بحران کا شکار ہے، اس سے قبل نائجیریا میں آئے روز داعش سے منسلک دہشت گرد تنظیم بوکوحرام نے عام شہریوں کو قتل اور اغواء کرنے کا سلسلہ شروع کررکھا تھا۔ سیکیورٹی اداروں نے بوکوحرام پر کسی حد تک قابو پایا ہے تو ڈاکوؤں کے مسلح گروپ سر اٹھانے لگے ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • نائیجیریا:‌ مسجد اور مارکیٹ میں خودکش دھماکے، 60 افراد جاں بحق

    نائیجیریا:‌ مسجد اور مارکیٹ میں خودکش دھماکے، 60 افراد جاں بحق

    ابوجا: نائیجیریا کے شمال مشرقی علاقے میں مسجد اور مارکیٹ میں 2 خودکش بم دھماکے ہوئے جس کے نتیجے میں 60 افراد جاں بحق اور متعدد زخمی ہوگئے۔

    غیر ملکی خبررساں ادارے کی رپورٹ کے مطابق نائیجیریا کی ریاست ایداموا میں واقع علاقے موبی بور میں 2 خودکش حملہ آوروں نے مسجد اور مارکیٹ کو نشانہ بنایا جس کے بعد ہر طرف انسانی لاشوں کے ڈھیر پھیل گئے۔

    پولیس ترجمان کے مطابق ’مسجد میں ہونے والے دھماکے کے نتیجے میں 24 نمازی جاں بحق اور متعدد زخمی ہوئے جن کی ہلاکتیں بڑھنے کا خدشہ ہے جبکہ شمالی دوسرا دھماکا مارکیٹ میں ہوا جس میں 30 سے زائد افراد کے مرنے کی تصدیق ہوچکی‘۔

    نائیجیریا میڈیا کے مطابق پہلا دھماکا شمالی مشرقی علاقے یولا سے 200 کلومیٹر دور واقع شہر موبی میں ہوا جس میں مسجد کو نشانہ بنایا گیا جب کہ دوسرے بمبار نے خود کو قریبی مارکیٹ میں دھماکے سے اڑایا جہاں عوام بڑی تعداد میں موجود تھے۔

    عرب میڈیا سے عینی شاہدین نے گفتگو کرتے ہوئے بتایا کہ نوعمر لڑکا جیکٹ پہن کر  ظہر کی نماز کے وقت مسجد میں داخل ہوا اور چند ہی لمحوں میں بعد زوردار دھماکا ہوگیا جس کے بعدہرطرف دھواں بھر گیا اور چھت اڑ گئی۔

    مسجد میں ہونے والے بم دھماکے کے بعد امدادی کارروائیاں جاری تھی کہ اچانک دوسرے دھماکے کی زور دار آواز سنائی دی، انتظامیہ نے اسپتالوں میں ہنگامی حالت نافذ کردی جبکہ تمام متاثرہ افراد کو اسپتال منتقل کردیا۔

    حکام کے مطابق دھماکوں کی ذمہ داری تاحال کسی دہشت گرد تنظیم نے قبول نہیں کی۔ ڈاکٹرز کا کہنا ہے کہ 100 سے زائد زخمیوں کی حالت بہت زیادہ تشویشناک ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • نائیجیریا: بوکوحرام نے 100 لڑکیوں کو رہا کردیا

    نائیجیریا: بوکوحرام نے 100 لڑکیوں کو رہا کردیا

    ابوجا: نائیجیریا کی شدت پسند تنظیم بوکو حرام نے شمال مشرقی نائیجیریا سے اغوا کی گئی لڑکیوں میں سے 100 کو رہا کردیا۔

    نائیجیریا کے سرکاری ذرائع کی جانب سے 110 لڑکیوں میں سے 100 کے رہا ہونے کی تصدیق کردی گئی ہے، نائیجیریا کے وزارت اطلاعات کے مطابق رہا ہونے والی تمام لڑکیوں کو ان کے گھروں پر پہنچا دیا گیا ہے، رہائی پانے والی ایک لڑکی کے والد کا کہنا ہے کہ ان لڑکیوں کو شدت پسندوں نے خود دامچی نامی شہر پہنچایا ہے۔

     شدت پسند تنظیم بوکو حرام نے مزید لڑکیاں اغواء کرلیں

    واضح رہے کہ رواں برس فروری میں بوکو حرام نے ریاست یوبے میں ایک اسکول پر حملہ کیا تھا، اس دوران شدت پسند گیارہ سے انیس سال کی درمیانی عمر کی 110 لڑکیوں کو اغوا کرکے اپنے ساتھ لے گئے تھے۔

    یاد رہے کہ شدت پسند نائیجیرین تنظیم بوکو حرام نے دو سال قبل اغوا کی گئی 276 لڑکیوں کی ویڈیو جاری کرتے ہوئے حکومت سے لڑکیوں کے عوض اپنے ساتھیوں کی رہائی کا مطالبہ کیا تھا۔

    خیال رہے کہ نائیجیریا کے شمال مشرقی علاقے میں بوکوحرام کی فائرنگ سے چوبیس افراد ہلاک ہوگئے تھے، حملہ مقامی رہنما کی موت پر ہونے والے سوگ کی تقریب کے موقع پر کیا گیا تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔