کراچی : پیپلزپارٹی نے الیکشن کمیشن سے الیکشن جلد کرانے کا مطالبہ کردیا، پی پی رہنما اور سابق سینیٹر نثار کھوڑو نے کہا ہے کہ الیکشن کمیشن چار مہینے کا شیڈول کم کرے۔
کراچی میں پیپلز پارٹی کے سینیئر رہنماؤں کے ہمراہ پریس کانفرنس سے خطاب کرتے ہوئے انہوں نے کہا کہ آئندہ الیکشن کب ہوں گے؟ یہ ان ہی کو پتہ ہے جنہوں نے اعلان کرنا ہے۔
انہوں نے کہا کہ آئین کے مطابق 90روز کے اندر الیکشن ہونے چاہئیں، میں3ماہ سے زیادہ الیکشن آگے لےجانے کے حق نہیں ہوں۔
نثار کھوڑو نے کہا کہ ڈیجیٹل مردم شماری چیئرمین پی ٹی آئی کا فیصلہ تھا، جس پر اربوں روپے خرچہ کیا گیا لیکن اب تک الیکشن کمیشن نے الیکشن کے شیڈول کا اعلان نہیں کیا ہے۔
پی پی سندھ کے رہنما نے کہا کہ یہ تاثر ختم ہونا چاہیے کہ ترقیاتی کاموں کے فنڈز جاری نہیں ہونگے، بجٹ میں منظور پروجیکٹ منجمد کرنا غلط ہے، مجھے یقین دہانی کرائی گئی ہے کہ بجٹ میں شامل کام نہیں رکیں گے۔ کچھ افسران کے ایشوز تھے جنہیں وزیراعظم سے ملاقات کے موقع پر اٹھایا گیا۔ل
ان کا کہنا تھا کہ ہماری الیکشن کمیشن سے استدعا ہے کہ حلقہ بندیوں کا شیڈول کم کریں، قومی و صوبائی اسمبلی کی نشستیں بڑھ نہیں رہی، مطالبہ ہے جلد سے جلد حلقہ بندیوں کا کام مکمل کرلیا جائے۔
پیپلزپارٹی کے رہنما نے صدر عارف علوی اور متنازع بلوں کے حوالے سے کہا کہ عارف علوی صدارتی منصب کو نشانے پر کیوں لے آئے ہیں؟ اگر ان کو وہ قانون اچھا نہیں لگ رہا تھا تو لکھ کر دینا تھا۔
