اسلام آباد: وزیرِداخلہ کے حکم پرایف آئی اے نے انسانی اسمگلروں کے گرد گھیرا تنگ کرتےہوئے ملک بھرمیں ایک درجن سے زائد انسانی اسمگلر گرفتارکرکے بڑی تعداد میں پاسپورٹس اوردیگر دستاویزات برآمد کرلی گئیں۔
ایف آئی اے کے ہیومن ٹریفکنگ سیل نے انسانی اسمگلرز کے خلاف آپریشن کے پہلے مرحلے میں کراچی کے علاقے لیاری میں چھاپے مارکرمتعدد ملزمان کو گرفتار کرلیا، ایف آئی اے ذرائع کے مطابق ملزمان سے نوے پاسپورٹس اور دیگر دستاویزات برآمد کی گئیں۔
کراچی ہی میں اسٹار گیٹ کے قریب ایف آئی اے نے چھاپے مارکرانسانی اسمگلنگ میں ملوث دوافرادکوگرفتارکرلیا جن کے قبضے سے ساٹھ سےزائدپاسپورٹ برآمدکیے گئے۔
راولپنڈی میں سات چھاپوں کے دوران سات انسانی اسمگلر گرفتارکرلیے گئے جبکہ اسلام آباد میں ایف سیون ٹو اور جی الیون میں چھاپوں کے دوران دو افراد کو گرفتار کر کے 57 پاسپورٹ اور دیگر دستاویزات بر آمد کرلی گئیں۔
خانپورسے بھی انسانی اسمگلنگ میں ملوث دو افراد گرفتارکیے گئے ہیں۔
فیصل آباد میں ایف آئی اے کے چھاپوں کے خلاف ٹریول ایجنٹس سڑکوں پرنکل آئے اور شدید نعرے بازی کی۔
ٹریول ایجنٹس کا کہنا تھا اگروزیر داخلہ نے بلاجواز گرفتاریاں اورچھاپے نہ رکوائے تو ہفتے کو شٹر ڈاون ہڑتال اور ایف آئی اے کے دفترکے باہر دھرنا دیا جائے گا۔
