پشاور : صوبائی وزیر اطلاعات اجمل وزیر نے کہا ہے کہ صورتحال دیکھتے ہوئے سختیاں کر رہے ہیں، نئے ایس او پیز کے تحت کے پی میں 5بجے دکانیں بند ہوجائیں گی۔
تفصیلات کے مطابق خیبر پختونخوا کے وزیر اطلاعات اجمل وزیر نے کرونا وائرس سے متعلق گفتگو کرتے ہوئے کہا کہ چیف سیکریٹری کے پی کا کرونا ٹیسٹ مثبت آیا ہے لیکن پھر بھی ہم وزیر اعظم کے وژن کے مطابق خود فرنٹ لائن پر ہیں۔
انہوں نے کہا کہ ذخیرہ اندوزی، مہنگائی کرنے والوں کے خلاف زیرو ٹالیرنس ہے، ذخیرہ اندوزی ناقابل برداشت ہے، آرڈیننس کے تحت کارروائی ہوگی۔
اجمل وزیر کا کہنا تھا کہ لاک ڈاؤن سے متعلق فیصلے میٹنگ میں ہونگے، ہم صورتحال دیکھتے ہوئے سختیاں کررہے ہیں، عوام یاد رکھیں کرونا وائرس کا واحد علاج احتیاط اور سماجی دوری ہے۔
وزیر اطلاعات نے کہا کہ ایمرجنسی کیش جیسا کوئی پروگرام اب تک ملک میں نہیں آیا تھا، ایک لاکھ فیملیز تک زکوة پیکج بڑھایا ہے۔
ڈاکٹرز، پیرا میڈیکس اسٹاف اور صحافی اپنا پلازمہ عطیہ کر رہے ہیں: اجمل وزیر
ان کا کہنا تھا کہ عوام کو کرونا سے بچانا اور معیشت بھی دیکھنی ہے، عید کے دنوں میں جو اوقات کار کی سہولت دی تھی وہ ختم ہوگئی، عید سے پہلے لاک ڈاؤن سے متعلق جو اوقات کار تھے اب وہی ہونگے۔