Tag: Noor Mukadam case

اسلام آباد : نور مقدم کیس کے مجرم نے سزا کو کالعدم قرار دینے کیلئے عدالت سے رجوع کرلیا اور کہا کیس میں ملوث ہونے کا کوئی ٹھوس ثبوت نہیں ہے۔

تفصیلات کے مطابق نور مقدم کیس کے مجرم جان محمد نے اسلام آباد ہائی کورٹ میں اپیل دائر کردی ، جس میں 10سال کی سزا کالعدم قرار دینے کی استدعا کی گئی ہے۔

اپیل میں کہا گیا کہ مجھے قتل کی ایف آئی آر میں بطور ملزم نامزد نہیں کیا گیا تھا لیکن بعد میں ضمنی بیان میں ان کا نام شامل کیا گیا،میں پی ایم سیکرٹریٹ کا ملازم ہوں اور ظاہر جعفر کے گھر پر پارٹ ٹائم باغبانی کا کام کرتا ہوں۔

درخواست گزار کا کہنا تھا کہ اس کیس میں ملوث ہونے کا کوئی ٹھوس ثبوت نہیں ہے، عدالت سے استدعا ہے کہ اس کی سزا کو کالعدم قرار دیا جائے۔

یاد رہے اسلام آباد کی ڈسٹرکٹ اینڈ سیشن عدالت کے جج عطا ربانی نے نور مقدم قتل کیس کا فیصلہ سناتے ہوئے مرکزی ملزم ظاہر جعفر کو سزائے موت سنائی تھی۔

عدالت نے کیس کے شریک ملزمان جان محمد اور افتخار کو 10، 10 سال قید کی سزا سنائی تھی ، سزا پانے والا مجرم افتخار چوکیدار اور مجرم جان محمد مالی تھے۔

عدالت نے تھراپی ورکس کے ملزمان سمیت ظاہرجعفر کے والدین کو اعانت جرم کے الزام سے بھی بری کردیا تھا۔

اسلام آباد : عدالت نے نور مقدم قتل کیس کے مرکزی ملزم ظاہر جعفر کے ذہنی مریض ہونے کا جائزہ لینے کے لیے میڈیکل بورڈ تشکیل دینے کی درخواست مسترد کردی۔

تفصیلات کے مطابق اسلام آباد میں نور مقد م قتل کیس کی سماعت ہوئی ، ایڈیشنل سیشن جج عطا ربانی نے کیس کی سماعت کی ، دوران سماعت عدالت نے مرکزی ملزم ظاہر جعفر کے ذہنی مریض ہونے کا جائزہ لینے کے لیے میڈیکل بورڈ تشکیل دینے کی درخواست پر دلائل سننے کے بعد فیصلہ محفوظ کیا۔

بعد ازاں ایڈیشنل سیشن جج نے محفوظ فیصلہ سناتے ہوئے مرکزی ملزم ظاہر جعفر کیلئے میڈیکل بورڈ کی درخواست مسترد کردی۔

خیال رہے نور مقدم قتل کیس میں ملزم ظاہر جعفر کو سزا سے بچانے کیلئے ذہنی مریض ثابت کرنے کی کوشش کی جارہی ہے ، مدعی شوکت مقدم کے وکیل شاہ خاور نے اے آر وائی نیوز سے گفتگو کرتے ہوئے کہا تھا کہ کیس میں ملزم کے ذہنی مریض ہونے کی درخواست شروع میں دی جاتی ہے ، ابھی کیس اپنے انجام کے قریب ہے۔

وکیل شاہ خاور کا کہنا تھا کہ ملزم کوبچانےکےلئے سوچی سمجھی منصوبہ بندی کےتحت یہ درخواست دی گئی لیکن یہ آخری حربہ تھا، میرا خیال ہےکہ ان کا یہ حربہ ناکام ہو جائے گا۔

مدعی وکیل نے مزید کہا تھا ملزم کےخلاف شواہداس قدر مضبوط ہیں کہ امیدہے کہ اسے سخت سزا ملے گی۔

اسلام آباد : مقامی عدالت نے سابق سفیر کی بیٹی نور مقدم کے قاتل ظاہر جعفر کے جسمانی ریمانڈ میں دو دن کی توسیع کردی۔

تفصیلات کے مطابق اسلام آباد کی مقامی عدالت میں سابق سفیر کی بیٹی نور مقدم قتل کیس سےمتعلق سماعت ہوئی ، پولیس نے ملزم ظاہرجعفر کو ڈیوٹی مجسٹریٹ صہیب بلال رانجھا کی عدالت میں پیش کیا۔

دوران سماعت جج نے استفسار کیا مقدمے کا تفتیشی افسرکون ہے؟َ سرکاری وکیل ساجد چیمہ نے بتایا کہ 3دن میں ہم نے آلہ قتل، پستول،آہنی مکہ، سگریٹ،بلڈ سیمپل سمیت مقتول کے کپڑے برآمد کرلئے ہیں۔

پولیس نے عدالت سے استدعا کی کہ مقتولہ اورملزم کا موبائل برآمد کرنا ہے، اس لئے زیادہ سے زیادہ جسمانی ریمانڈ درکار ہے جبکہ وکیل شاہ خاور کا کہنا تھا کہ میں مدعی کی طرف سے وکیل ہوں، موبائل فون کی برآمدگی بہت ضروری ہے۔

دلائل کے بعد :ڈیوٹی مجسٹریٹ صہیب بلال رانجھا نے قتل کے ملزم ظاہر جعفر کو دو روزہ مزید جسمانی ریمانڈ پر پولیس کے حوالے کردیا۔

واضح رہے کہ عید کی رات وفاقی دارالحکومت اسلام آباد کے علاقے سیکٹر ایف سیون سے ایک سربریدہ لاش ملی تھی، جسے سابق سفیر شوکت مقدم کی 27 سالہ بیٹی نور مقدم کے نام سے شناخت کیا گیا، پولیس کے بیان کے مطابق جب اطلاع پر اہل کار وہاں پہنچے تو انھیں ہاتھ پاؤں بندھا ملزم ظاہر جعفر بھی ملا، جو نشے میں نہیں تھا۔

بعد ازاں سابق سفیر کی بیٹی نور مقدم کے قتل میں ملزم ظاہر جعفر کو گرفتار کرکے تھانہ کوہسار میں مقدمہ درج کرلیا تھا۔