ARYNews.tv | Urdu – Har Lamha Bakhabar

Tag: North America

  • را پہلی بار شمالی امریکا میں اپنے آپریشن بند کرنے پر مجبور ہو گئی

    را پہلی بار شمالی امریکا میں اپنے آپریشن بند کرنے پر مجبور ہو گئی

    بھارتی خفیہ ایجنسی را کی مغربی ممالک میں دہشت گردی کی کارروائیاں بے نقاب ہونے کے بعد پہلی بار شمالی امریکا میں اپنے آپریشن بند کرنے پر مجبور ہو گئی ہے۔

    تفصیلات کے مطابق خالصتان کے حامی کارکنان کے خلاف قتل کی مہم میں را کی مبینہ شمولیت سے متعلق امریکا نے سنجیدگی سے نوٹس لے لیا، خصوصی رپورٹ کے مطابق بھارتی انٹیلیجنس ایجنسی را دنیا بھر میں خاص طور پر مغربی ممالک میں اپنے نیٹ ورک کے قیام میں 2008 کے بعد زیادہ تیزی لے آئی تھی، جس کا مقصد دنیا بھر میں بھارت مخالف کسی بھی تحریک کے خلاف کارروائی کرنا تھا۔

    را نے سکھوں کے خلاف ایک منظم مہم چلائی اور مغربی ممالک میں مقیم سکھوں کے قتل کا منصوبہ بنایا، لیکن سب سے پہلے کینیڈا نے را کی اس کارروائی کو عالمی سطح پر بے نقاب کیا اور بھارت نے اس بات سے انکار کیا، لیکن حال ہی میں امریکا نے بھی را کے ایجنٹوں کا نیٹ ورک بے نقاب کر دیا۔

    امریکا نے بھارتی سفارت خانے اور قونصلیٹ سے را کے ایجنٹوں کو نکل جانے کا حکم دیا، امریکی حکام کی جانب سے نکالے گئے اہلکار سان فرانسسکو میں را اسٹیشن کے سربراہ اور لندن میں را آپریشنز کے سیکنڈ ان کمانڈ تھے۔ سان فرانسسکو میں را کے افسر کی بے دخلی کے ساتھ اس خدشے کا اظہار کیا گیا کہ اگر را نے مغرب میں جارحانہ کارروائیاں جاری رکھیں تو امریکا بھارت کے ساتھ تعاون نہیں کرے گا۔

    را نے خالصتان تحریک کے کئی سرگرم کارکنوں کو قتل کرنے کی سازش کی، امریکا نے را کے خلاف آپریشن کرتے ہوئے نکھل گپتا کو گرفتار کر کے عدالت میں پیش کیا، نکھل گپتا کو امریکا میں را نے سکھ امریکی شہری کو قتل کروانے کے لیے استعمال کیا تھا۔

    را کی کارروائیاں عالمی سطح پر خاص طور پر اس وقت توجہ کا مرکز بنیں جب ستمبر 2023 میں کینیڈا کے وزیر اعظم جسٹن ٹروڈو نے یہ الزام لگایا تھا کہ جون میں وینکوور کے نواحی علاقے میں سکھ علیحدگی پسند رہنما ہردیپ سنگھ نجر کے قتل میں بھارتی حکومت کے ایجنٹ ملوث تھے۔

    ستمبر 2023 میں کینیڈین وزیر اعظم نے ہردیپ سنگھ کے قتل میں را کو مورد الزام ٹھہرایا اور بھارتی سفیر کو ملک بدر کر دیا تھا، کینیڈین وزیر اعظم کے بیان کے بعد را کا عالمی سطح پر دہشت گرد تنظیم ہونے کا تاثر سامنے آیا۔ برطانوی انٹیلیجنس ایجنسی نے را کے سابق چیف افسر سمنت کمار گوئیل کی نشان دہی بھی کی اور تحریک خالصتان کے حامی سکھوں کے خلاف بڑھتی دہشت گردی پر تشویش کا اظہار کیا۔

    پاکستان نے بھی گزشتہ ہفتے عالمی سطح پر جاسوسی اور ماورائے عدالت قتل سمیت ہندوستان کی خفیہ کارروائیوں کے خطرناک پھیلاؤ پر تشویش کا اظہار کیا تھا اور ان کارروائیوں کو بین الاقوامی قوانین کی صریح خلاف ورزی قرار دیتے ہوئے مذمت کی تھی۔

  • پاکستانی کوہ پیما اسد میمن کا شاندار کارنامہ، شمالی امریکہ کی بلند ترین چوٹی سر کرلی

    پاکستانی کوہ پیما اسد میمن کا شاندار کارنامہ، شمالی امریکہ کی بلند ترین چوٹی سر کرلی

    وطن عزیز کے ابھرتے ہوئے نوجوان کوہ پیما اسد علی میمن نے ایک بار پھر اپنی محنت اور عزم کے ساتھ شمالی امریکہ کی بلند ترین چوٹی دینالی کو سر کرکے پاکستانیوں کا سرفخر سے بلند کردیا۔

    سندھ کے شہر لاڑکانہ سے تعلق رکھنے والے اس پاک وطن کے سپوت نے صفر درجہ حرارت اور یخ بستہ طوفانی ہواؤں کا جواں مردی سے مقابلہ کیا، انہوں نے یہ کارنامہ 28مئی 2022 کی سہ پہر کو چوٹی کو سر کرکے مکمل کیا۔

    یہ کارنامہ سات براعظموں کی بلند ترین چوٹی کو سر کرنے کی اسد علی کی جستجو کا تازہ ترین اقدام ہے، اگر وہ کامیاب ہوجاتے ہیں تو اسد علی اندرون اور بیرون ملک یہ کارنامہ انجام دینے والے چند منتخب پاکستانیوں میں سے ایک ہوں گے۔

    اسد علی میمن اس سے قبل ماؤنٹ کیلی مانجرو، اکونگوا اور البروس کو سر کرچکے ہیں، وہ اپنے دیگر ساتھیوں کے ساتھ07 چوٹیوں اور اس سے آگے کا مشن پورا کرنے کے خواب کو مکمل کرنے کیلیے اب تک آدھا سفر طے کرچکے ہیں۔

    اگر وہ کامیاب ہوگئے تو وہ پہلے پاکستانی ہوں گے جنہوں نے ساتوں براعظموں کی سات بلند ترین چوٹیاں سرکیں اور ایکسپلورر کا ہدف حاصل کیا۔

    شمالی امریکہ کی بلند ترین چوٹی دینالی کو سر کرنے کے بعد انہوں نے ایک ویڈیو پیغام میں اپنے جذبات کا اظہار کیا اور کہا کہ مجھے بےحد خوشی ہے کہ میں نے یہ کام بخوبی انجام دیا۔

    اسد علی میمن کا کہنا تھا کہ میں ان تمام پاکستانی دوستوں کا شکریہ ادا کرتا ہوں جنہوں نے میری حوصلہ افزائی کی اور اس مقام تک پہنچنے کیلئے میری مدد کی۔

    اپنے اگلی منزل پر نظر رکھتے ہوئے انہوں نے اس سال کے آخر میں انڈونیشیا کے کارسٹینز پیرامڈ میں اوقیانوس ایشیا کی بلند ترین چوٹی کے لیے بھی خود کو تیار کیا ہوا ہے۔

    View this post on Instagram

     

    A post shared by Asad Memon (@asadmnpak)

    اسد علی میمن کا ملی جذبہ اور کوہ پیمائی سے بے انتہا محبت نے انہیں کھیلوں کے میدان میں بھی مقبول بنا دیا ہے۔ اسد علی کا مقصد سال 2023 کے آخر تک سات براعظموں کا سفر مکمل کرنا ہے۔

    اس سے قبل کوہ پیما اسد علی میمن نے براعظم افریقہ کی بلند ترین چوٹی کو دنوں کے بجائے چند گھنٹوں میں سر کیا تھا۔

    لاڑکانہ سے تعلق رکھنے والے کوہ پیما اسد علی میمن نے اپنا وعدہ پورا کرتے ہوئےبراعظم افریقہ کی بلند ترین ماؤنٹ کیلی منجیرو صرف چودہ گھنٹے میں سر کیا تھا۔

    ماونٹ کیلی منجیرو کی اونچائی 5,895 میٹر ہے، کوہ پیماں کو یہ چوٹی سر کرنے میں پانچ سے سات دن لگتے ہیں، اسد علی میمن ریکارڈ وقت میں چوٹی سر کرنے والے واحد ایشیائی اور پاکستانی کوہ پیما بن گئے ہیں۔

  • وینزویلا کے صدر پر قاتلانہ حملے میں ملوث 6 افراد گرفتار

    وینزویلا کے صدر پر قاتلانہ حملے میں ملوث 6 افراد گرفتار

    کراکس: جنوبی امریکی ملک وینزویلا کے صدر نکولس مادورو پر قاتلانہ حملے میں ملوث 6 افراد کو گرفتار کر لیا گیا۔

    تفصیلات کے مطابق دو روز قبل نکولس مادورو پر ڈرون طیاروں کے ذریعے قاتلانہ حملہ ہوا تھا جس میں وہ بال بال بچے تھے، حکام کا دعویٰ ہے کہ اس حملے کی سازش کرنے والے 6 افراد کو گرفتار کیا گیا ہے۔

    غیر ملکی خبر رساں ادارے کے مطابق وینزویلا حکام کی جانب سے یہ بھی دعویٰ کیا جارہا ہے کہ چند گھنٹوں کے اندر مذکورہ حملے میں ملوث دیگر افراد کی بھی گرفتاریاں عمل میں آئیں گی۔

    خیال رہے کہ دو روز قبل دارالحکومت کراکس میں صدر نکولس مادورو نیشنل گارڈز کی تقریب سے خطاب کررہے تھے کہ اسی دوران ڈرون طیاروں کے ذریعے حملہ ہوا تھا جس کے باعث سات سیکیورٹی اہلکار ہلاک ہوئے تھے۔

    وینزویلا کے صدر پر قاتلانہ حملہ، 7 سیکیورٹی اہلکار زخمی

    مذکورہ ڈرون حملے سے ہونے والے دھماکے کے بعد پریڈ گراؤنڈ میں موجود فوجیوں میں بھی خوف پھیل گیا اور وہ بھاگنے پر مجبور ہو گئے۔

    اس تقریب میں وینزویلا کی اعلیٰ قیادت سمیت ملک کے سترہ ہزار فوجی بھی شریک تھے، اس واقعے میں سات فوجی زخمی ہوئے۔

    واضح رہے کہ وینزویلا حکام کی جانب سے اس مبینہ حملے کا الزام انتہائی دائیں بازو کے گروہوں اور کولمبیا کے صدر خوان مانوئل سانتوس پر عائد کیا گیا ہے، تاہم ردعمل کے طور پر کولمبیا کی جانب سے اب تک کوئی بیان سامنے نہیں آیا۔