Tag: north korea

پیانگ یانگ: شمالی کوریا میں دنیا کی مقبول ترین سنسنی خیز ڈراما سیریز اسکوئڈ گیم لانے والے کو گولی مار دی گئی۔

تفصیلات کے مطابق اسکوئڈ گیم جنوبی کورین سنسنی خیز ڈراما سیریز ہے، جس میں لوگ بڑی رقم کے لالچ میں ایک کھیل کا حصہ بنتے ہیں اور پھر بچپن کے مختلف کھیلوں کے دوران ناکامی سے دوچار ہوتے ہوئے دھڑا دھڑ قتل ہوتے ہیں۔

تاہم پوری دنیا میں مقبول ہونے والی نیٹ فلیکس کی اس ویب سیریز ’اسکوئڈ گیم‘ پر شمالی کوریا نے پابندی لگا دی ہے، اور اسے اسمگل کر کے لانے والے ایک شخص کو سزائے موت دے دی گئی۔

کِم جونگ اُن کی حکومت کا کہنا ہے کہ اس سیریز نے جنوبی کوریا کے سرمایہ دارانہ نظام کو فروغ دیا ہے، یہ سیریز ایک شہری چین سے شمالی کوریا لایا، اور اسے ہائی اسکول کے طلبہ کے ساتھ شیئر کیا گیا، مذکورہ شخص اسے پِن ڈرائیو میں اسمگل کر کے لایا تھا، اور اس پر پابندی عائد ہے۔

اسکوئڈ گیم کی گڑیا کو آواز دینے والی اداکارہ کو سیریز دیکھنے کی اجازت کیوں نہیں‌ ملی؟

رپورٹ کے مطابق سیریز کو دیکھنے والے طلبہ، اسکول پرنسپل اور اساتذہ کو بھی سزا سنائی گئی ہے، اور ایک طالبِ علم کو عمر قید اور دیگر کو 5 سال کے لیے جیل بھیج دیا گیا ہے۔

نیوز رپورٹس میں کہا گیا ہے کہ مذکورہ اسکول کے پرنسپل، یوتھ سیکریٹری اور اساتذہ کو سزا کے طور پر اُن کے عہدوں سے برطرف کر دیا گیا ہے۔

پیانگ یانگ: شمالی کوریا کی سرکاری میڈیا پر ایک تصویر سامنے آئی ہے جس نے کئی ممالک میں لوگوں کی توجہ حاصل کر لی ہے، اس تصویر میں شمالی کوریا کے رہنما کم جونگ اُن کے ساتھ فوجی کھڑے ہیں لیکن ایک شخص سوئمنگ سوٹ جیسے تنگ سوٹ میں کھڑا ہے۔

امریکی خبر رساں ادارے اے پی کے مطابق یہ تصویر پیر کو لی گئی، اور یہ اسلحے کی ایک نمائش کے دوران کم جونگ اُن کے ساتھ لی گئی تھی، جس میں 30 فوجی ان کے ساتھ کھڑے تھے۔

تمام فوجیوں نے مخصوص رنگ یونیفارم پہنا تھا، ان میں صرف دو افراد نے مختلف رنگ پہنا ہوا تھا، ایک نے نیلا رنگ اور دوسرے نے نیوی بلیو یونیفارم پہنا تھا، جب کہ شمالی کوریا کے رہنما نے سیاہ رنگ پہنا ہوا تھا۔

نمائش کے اگلے روز جب یہ تصویر سامنے آئی تو لوگ حیران رہ گئے، سوال اٹھا کہ نیلے کپڑوں میں ملبوس ’راکٹ مین‘ شمالی کورین فوجیوں کے درمیان کیا کر رہا ہے؟

تصویر کے سامنے آتے ہی کسی نے فوجی کو ’سپر ہیرو‘ تو کسی نے ’کیپٹن ڈی پی آر کے‘ اور کسی نے ان کو ’راکٹ مین‘ کہا۔

It seems he’s the parachutist. pic.twitter.com/XtRdDsKNII

— Dr. Jeffrey Lewis (@ArmsControlWonk) October 12, 2021

جنوبی کوریا، امریکا اور دیگر جگہوں پر کچھ ٹوئٹر صارفین نے ان کو مذاق کا نشانہ بنایا اور کہا کہ وہ ’انسانی توپ کے گولے‘ جیسا دکھ رہے ہیں۔

شمالی کوریا کی سرکاری میڈیا نے اس شخص کے بارے میں کچھ نہیں کہا تاہم مونٹیری میں مڈل بری انسٹیٹیوٹ آف انٹرنیشنل اسٹڈیز کے ایک تجزیہ کار جیفری لیوئس نے ایک تصویر ٹوئٹ کی کہ ’ایسا لگ رہا ہے کہ وہ پیرا شوٹر تھا۔‘

کوریا کی سرکاری خبر رساں ادارے نے کہا ہے کہ نمائش شروع ہونے سے قبل اعلیٰ درجے کے ایک پیرا شوٹسٹ نے پارٹی کے جھنڈے کو لہراتے ہوئے کرتب دکھائے۔

شمالی کوریا میں ہونے والے پہلے ایئر شو کی تصاویر میں بھی دیکھا جا سکتا ہے کہ پیرا شوٹرز نے نیلے رنگ کے تنگ کپڑے پہنے ہوئے تھے۔

پیانگ یانگ: شمالی کوریائی میڈیا نے تصدیق کر دی ہے کہ ملک نے آواز سے کئی گنا تیز رفتار میزائل تجربہ کیا ہے۔

تفصیلات کے مطابق شمالی کوریا کے حکمران ورکرز پارٹی کے اخبار رودونگ سنمُن نے بدھ کو تصدیق کی ہے کہ اس کے ملک نے نئے تیار کردہ، آواز سے کئی گنا تیز رفتار میزائل کا منگل کی صبح پہلی مرتبہ تجربہ کیا۔

خبر کے مطابق شمالی کوریا نے ‘ہواسونگ 8’ میزائل شمالی صوبے جاگانگ سے لانچ کیا تھا، جس سے قبل پارٹی کے ایک اعلیٰ عہدے دار اور شمالی کوریا کے سپریم لیڈر کِم جونگ اُن کے قریبی مشیر پاک جونگ چون نے میزائل لانچ کا مشاہدہ کیا۔

دفاعی سائنس دانوں نے میزائل کی پرواز کے راستے کے کنٹرول اور استحکام کے حوالے سے اطمینان کا اظہار کیا، انھوں نے میزائل کی رہنمائی کرنے والے نظام کی پینترے بازی اور الگ ہو کر گلائیڈ کرنے والے وارہیڈ کی خصوصیات، اور دیگر تکنیکی تفصیلات کی جانچ بھی کر لی۔

شمالی کوریا نے ایک اور بیلسٹک میزائل کا تجربہ کر لیا

شمالی کوریا نے دعویٰ کیا ہے کہ میزائل تمام مطلوبہ معیارات پر پورا اترا ہے، اور میزائل تجربہ ملکی دفاعی صلاحیت کی مزید بہتری میں اسٹریٹیجک اہمیت رکھتا ہے۔

واضح رہے کہ جاپان کے دفاعی وہائٹ پیپر میں کہا گیا ہے کہ ہائپرسونک میزائل ایک ایسا ہتھیار ہے، جو ماک فائیو سے زیادہ تیز رفتاری سے پرواز کرتا ہے، یہ آواز کی رفتار سے 5 گنا زیادہ تیز رفتار ہے۔

پیانگ یانگ: جنوبی کوریا کی جانب سے آب دوز لانچ ہونے کے چند ہی گھنٹے بعد شمالی کوریا کی طرف سے بھی ایک اور بیلسٹک میزائل کا تجربہ کیا گیا ہے۔

تفصیلات کے مطابق ادھر اقوام متحدہ میں شمالی کوریا کے سفیر نے میزائل تجربات کے خلاف امریکی پالیسی کو مسترد کیا، اور ادھر شمالی کوریا نے ایک اور بیلسٹک میزائل کا تجربہ کر لیا۔

جنوبی کوریا کی ملٹری کی طرف سے بتایا گیا ہے کہ شمالی کوریا کی فوج نے ملک کے مشرقی ساحل کی جانب ایک ’نامعلوم پروجیکٹائل‘ داغا ہے، جب کہ جاپانی وزارت دفاع کا کہنا ہے کہ یہ بظاہر ایک بیلسٹک میزائل تھا۔

میزائل کا تجربہ کرنے سے کچھ دیر پہلے ہی شمالی کوریا کے سفیر کم سانگ نے اقوام متحدہ کی جنرل اسمبلی سے خطاب میں کہا کہ ان کے ملک کو قانونی دفاع کے حق سے کوئی بھی محروم نہیں رکھ سکتا، اور ان کے ملک کو میزائل تجربات کرنے کا حق حاصل ہے۔

ایک ماہ کے دوران شمالی کوریا کا میزائلوں کا یہ تیسرا تجربہ ہے، اس سے قبل اس نے ایک کروز میزائل اور دو بیلسٹک میزائلز کا تجربہ کیا تھا، واضح رہے کہ اقو ام متحدہ نے شمالی کوریا پر میزائلوں کے تجربات پر پابندی عائد کر رکھی ہے۔

میزائل کے تجربے کے فوراً بعد جنوبی کوریا کی حکومت نے قومی سلامتی کونسل کی میٹنگ طلب کی اور میزائل تجربے کی مذمت کرتے ہوئے کہا یہ ایک کم فاصلے تک پہنچنے والا میزائل تھا اور شمالی کوریا نے ایسے وقت اس کا تجربہ کیا ہے جب کوریا جزیرہ نما میں سیاسی استحکام کی صورت حال بہت نازک ہے۔

امریکی وزارت خارجہ نے بھی میزائل تجربے کی مذمت کی ہے اور پیانگ یانگ سے مذاکرات کی اپیل کی ہے۔