Tag: Nov 2020

  • ترقیاتی پروگرامز کے لیے کتنے فنڈز جاری ہوئے؟

    ترقیاتی پروگرامز کے لیے کتنے فنڈز جاری ہوئے؟

    اسلام آباد: رواں مالی سال 21-2020 میں نومبر کے اختتام تک ترقیاتی پروگرامز کے لیے 299 ارب 70 کروڑ روپے کے فنڈز جاری کیے گئے۔

    تفصیلات کے مطابق رواں مالی سال کے اب تک جاری ترقیاتی پروگرام کے فنڈز کی تفصیلات جاری کردی گئی، نومبر 2020 کے اختتام تک پی ایس ڈی پی کی مد میں 299 ارب 70 کروڑ روپے کے فنڈز جاری کیے گئے۔

    دستاویز کے مطابق وفاقی وزارتوں کے منصوبوں کے لیے 198 ارب 34 کروڑ روپے جاری کیے گئے، وزارت آبی وسائل کے ترقیاتی منصوبوں کے لیے 43 ارب 26 کروڑ روپے، کابینہ ڈویژن کے لیے 38 ارب 22 کروڑ روپے سے زائد اور وزارت خزانہ کے لیے 32 ارب 34 کروڑ روپے سے زائد کے فنڈز جاری کیے گئے۔

    نیشنل ہائی وے اتھارٹی کے ترقیاتی منصوبوں کے لیے 53 ارب 43 کروڑ روپے، اعلیٰ تعلیمی کمیشن کے لیے 14 ارب 4 کروڑ روپے اور این ٹی ڈی سی اور پیپکو کے لیے 23 ارب 3 کروڑ روپے جاری کیے گئے۔

    دستاویز میں کہا گیا کہ وزارت ریلویز کے لیے 11 ارب 75 کروڑ روپے سے زائد، وزارت صحت کے منصوبوں کے لیے 6 ارب 88 کروڑ روپے اور وزارت قومی تحفظ خوراک کے لیے 6 ارب روپے کے فنڈز جاری کیے گئے۔

    اسی طرح آزاد کشمیر اور گلگت بلتستان کے لیے 24 ارب 14 کروڑ سے زائد، تخفیف غربت ڈویژن کے لیے 6 ارب 75 کروڑ روپے اور ایرا کے لیے 75 کروڑ روپے کے ترقیاتی فنڈز جاری کیے گئے۔

  • گزشتہ ہفتے مہنگائی کی شرح میں کمی

    گزشتہ ہفتے مہنگائی کی شرح میں کمی

    اسلام آباد: قومی ادارہ شماریات کا کہنا ہے کہ گزشتہ ہفتے کے دوران مہنگائی میں 0.92 فیصد کمی واقع ہوئی، اس دوران 11 اشیائے ضروریہ کی قیمتوں میں اضافہ، 10 میں کمی جبکہ 30 اشیائے ضروریہ کی قیمتوں میں استحکام رہا۔

    تفصیلات کے مطابق قومی ادارہ شماریات کا کہنا ہے کہ 23 نومبر سے 27 نومبر 2020 کے دوران مہنگائی میں 0.92 فیصد کمی واقع ہوئی۔ رواں ہفتے ملک میں مہنگائی کی شرح 7.48 فیصد رہی۔

    ادارہ شماریات کے مطابق رواں ہفتے 11 اشیائے ضروریہ کی قیمتوں میں اضافہ ہوا، 10 اشیائے ضروریہ کی قیمتوں میں کمی ہوئی جن میں ٹماٹر، پیاز، آلو، مرغی، آٹا، چینی اور دالیں شامل ہیں۔

    ادارہ شماریات کا کہنا ہے کہ گزشتہ ہفتے 30 اشیائے ضروریہ کی قیمتوں میں استحکام رہا۔

    اس سے قبل 16 سے 20 نومبر کے دوران مہنگائی کی شرح میں 0.24 فیصد اضافہ ہوا تھا، اس ہفتے ملک میں مہنگائی کی شرح 7.07 فیصد رہی۔

    مذکورہ ہفتے میں 13 اشیا کی قیمتوں میں اضافہ، 18 اشیا کی قیمتوں میں کمی جبکہ 20 اشیا کی قیمتوں میں استحکام رہا تھا۔