اسلام آباد: دفتر خارجہ کا کہنا ہے کہ پاکستان اور بھارت کے درمیان جوہری تنصیبات اور سہولتوں کی فہرست کا تبادلہ ہوا ہے، پاکستان نے بھارتی قیدیوں کی فہرست بھی بھارت کے حوالے کی ہے جبکہ بھارت بھی پاکستانی قیدیوں کی فہرست دے گا۔
تفصیلات کے مطابق ترجمان دفتر خارجہ ڈاکٹر محمد فیصل کا کہنا ہے کہ اسلام آباد میں بھارتی ہائی کمیشن کو بھارتی قیدیوں کی فہرست دے دی ہے۔ 537 بھارتی پاکستان میں قید ہیں۔
دفتر خارجہ کے مطابق قید بھارتیوں میں 54 شہری اور 583 ماہی گیر ہیں۔
ترجمان کا کہنا ہے کہ معلومات 21 مئی 2008 میں معاہدے کے تحت دی گئی، دونوں ممالک سال میں 2 بار قیدیوں کی فہرست کے تبادلے کے پابند ہیں۔ بھارتی حکومت بھی پاکستانی ہائی کمیشن کو پاکستانی قیدیوں کی فہرست دے گی۔
دفتر خارجہ کا کہنا ہے کہ پاکستان اور بھارت میں جوہری تنصیبات اور سہولتوں کی فہرست کا تبادلہ بھی ہوا ہے۔ تبادلہ 1988 کے معاہدے کے تحت کیا گیا۔
ترجمان کا کہنا تھا کہ فہرست اسلام آباد میں بھارتی ہائی کمیشن کے نمائندے کے حوالے کردی گئی ہے جبکہ بھارتی دفتر خارجہ نے بھی اپنی فہرست پاکستانی ہائی کمیشن کے حوالے کی۔
ان کے مطابق دونوں ممالک کو جوہری تنصیبات اور سہولتوں کی فہرست یکم جنوری کو دینی ہوتی ہے۔
