لاہور: لاہور کے جناح اسپتال میں ینگ نرسز نے ڈاکٹر کی تحریری معذرت کے بعد ہڑتال ختم کرنے کا اعلان کر دیا ہے اور نرسوں کی جانب سے صوبے بھر میں کام شروع کردیا گیا ہے۔
جناح اسپتال لاہور کے آئی سی یو میں ڈاکٹر کی نرس کے ساتھ مبینہ بدتمیزی پر ینگ نرسز نے ہڑتال کا اعلان کرنے کے بعد کام کرنے سے انکا کر دیا تھا۔ جس کے بعد گذشتہ روز نرسز اور حکومتی اہلکاروں کے درمیان مزاکرات ہوئے تھے۔
جنرل سیکرٹری ینگ نرسز سسٹر شہناز کا کہنا ہے کہ ڈاکٹر کی جانب سے تحریری طور پر معذرت کر لی گئی ہے جس کے بعد وہ ہڑتال ختم کرنے کا اعلان کرتی ہیں۔ مذکورہ اعلان کے بعد ینگ نرسز نے اپنے شعبوں میں کام دوبارہ شروع کر دیا ہے جبکہ صوبے بھر میں احتجاج ختم کردیا گیا اور اسپتالوں میں کام شروع ہو گیا ہے۔
