لاہور : پنجاب کی نگراں کابینہ سے خطاب کرتے ہوئے ڈاکٹر حسن عسکری نے کہا ہے کہ غیر جانبدار اور غیر سیاسی ہونے کا دعویٰ اپنے قول و فعل سے ثابت کریں گے۔
تفصیلات کے مطابق پنجاب کی نگراں کابینہ میں 4 نئے وزرا نے شمولیت اختیار کی ہے، جن سے گورنر پنجاب گورنر ہاوس میں چاروں نگراں وزرا سے حلف لیا تھا، نگراں کابینہ میں شامل ہونے والے وزرا سعیداللہ بابر، سردار تنویر الیاس، میاں نعمان کبیر، چوہدری فیصل ہیں۔
نگراں وزیر اعلیٰ پنجاب ڈاکٹر حسن عسکری کی زیر صدارت نو منتخب نگراں کابینہ کا اجلاس منعقد ہوا جس میں نگراں وزیر اعلیٰ نے حلف اٹھانے والے نئے وزرا کو مبارک باد پیش کی۔
ڈاکٹر حسن عسکری نے اجلاس سے خطاب کرتے ہوئے کہا ہے کہ صاف، شفاف الیکشن پر بھر پور توجہ مرکوزکی جائے، نگران حکومت غیر سیاسی ہے، اپنے قول و فعل سے ثابت کریں گے، انتخابات میں جو بھی جیت کر آئے گا اقتدار اسے سونپیں گے۔
نگراں وزیر اعلیٰ کا کہنا ہے کہ کابینہ میں شامل تمام وزرا متعلقہ محکموں میں فیصلوں کیلئے با اختیار ہوں گے، کابینہ آزادانہ اور منصفانہ فیصلوں سے انفرادی حیثیت نمایاں کرے گی، کابینہ ارکان کیلئے ہمہ وقت میسر رہوں گا۔
ان کا کہنا تھا کہ فیصلے باہمی مشاورت سے کریں گے، ہمارے عمل سے اجتماعیت اور غیرجانبداری نظر آئے گی، ہر جماعت کو برابری کی بنیاد پر مواقع مہیا کریں گے، عوامی خدمت اور بروقت الیکشن کے مینڈیٹ پر پورا اتریں گے۔
پنجاب کی نگراں کابینہ کے اجلاس کے دوران عوامی فلاح و بہبود اور خدمت کے پروگرامز پر بھی تبادلہ خیال کیا گیا۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
