لاہور : امیر جماعت اسلامی سراج الحق نے کہا ہے کہ مقبوضہ کشمیر میں ہزاروں نیلسن منڈیلا ہیں، اس کا مسئلہ اقوام متحدہ کی قراردادوں کے مطابق حل کیا جائے۔
یہ بات انہوں نے مسئلہ کشمیر کے حوالے سے مختلف ممالک کے سفراء سے ملاقات کے موقع پر کہی، انہوں نے کہا کہ مقبوضہ کشمیر دنیا کی سب سے بڑی جیل اور قبرستان بن چکا ہے۔
سراج الحق کا کہنا تھا کہ وادی کشمیر میں انسانی المیہ روکنے کیلئے دنیا بھر کے سفیروں کو اپنا کردار ادا کرنا چاہیے۔ ایک موقع پر امیر جماعت اسلامی نے کہا کہ ایک نہیں مقبوضہ کشمیر میں ہزاروں نیلسن منڈیلا موجود ہیں۔
سراج الحق کا کہنا تھا کہ مسئلہ کشمیر یو این اور سلامتی کونسل کی قراردادوں کے مطابق حل کیا جائے، جب مشرقی تیمور، مغربی سوڈان دیگر ممالک میں استصواب رائے ہوسکتا ہے تو مقبوضہ کشمیر میں کیوں نہیں؟
امیرجماعت اسلامی کا مزید کہنا تھا کہ مقبوضہ کشمیر کے عوام آزادی اور خوشحال زندگی سے محروم ہیں۔
