اسلام آباد : تحریک انصاف کے ترجمان نعیم الحق نے پی ٹی آئی کو ایک بار پھر احتساب کے لیے پیش کر کے حکومت کو مشکل میں ڈال دیا ہے۔ عمران خان کی جانب سے آف شور کمپنی بنانے کےاعتراف نے نیا پنڈورا باکس کھول دیا۔
تفصیلات کے مطابق تحریک انصاف کے ترجمان نعیم الحق نے پرویز رشید کو چیلنج کرتے ہوئے کہا ہے کہ پرویز رشید تحریک انصاف کے ان چھ رہنماؤں کے خلاف 24گھنٹے میں کارروائی کریں جن پر انہوں نے اپنی پریس کانفرنس میں الزام لگا یا ہے۔
ان خیالات کا اظہارانہوں نے وفاقی وزیراطلاعات پرویزرشید کی پریس کانفرنس کے جواب میں اسلام آباد میں میڈیا سے بات کرتے ہوئے کیا۔
نعیم الحق کا کہنا تھا پاکستان تحریک انصاف ہر طرح کے احتساب کے لیے تیار ہے ،عمران خان کے تمام اثاثوں کی تفصیل ویب سائٹ پر موجود ہے۔
انصاف نعیم الحق نے کہا کہ عمران خان نے محنت کے پیسے سے آف شورکمپنی بنائی جو اب ختم بھی ہوچکی ہے جب کہ نوازشریف بتائیں کہ انہوں نے آف شورکمپنیوں کے لیے پیسہ کہاں سے کمایا۔
ترجمان پی ٹی آئی نے کہا کہ نوازشریف بتائیں آف شورکمپنیاں کب بنائیں، پیسہ کہاں سے کمایا اور کس طرح وہ ملک سے باہر گیا۔
وزیراعظم نے مزاحمت کو طول دیا تو معاملات بگڑ جائیں گے۔ ایک سوال پر انہوں نے کہا کہ سپریم کورٹ کے جواب سے ہمارے مؤقف کی تائید ہوئی،ٹی او آرز نئے قانون کے تحت بنائے جائیں ،اپوزیشن اور حکومت بیٹھ کر ٹی او آرز طے کر ے ورنہ حالات مزید خراب ہونگے۔
