اسلام آباد : حج درخواست گزاروں کی آسانی کیلئے بینکوں کو مزید ہدایات جاری کردی گئیں ہیں ، منظور شدہ ویکسین میں سے کسی ایک کی پہلی ڈوز لگوا کر درخواست جمع کراسکتے ہیں۔
تفصیلات کے مطابق سرکاری حج اسکیم میں درخواستوں کی وصولی جاری ہے ، 22 مارچ تک 26 ہزار سے زائد درخواستیں موصول ہوئیں۔
حج درخواست گزاروں کی آسانی کیلئے بینکوں کو مزید ہدایات جاری کردی گئیں ہیں ، سمندر پار پاکستانی میڈیکل فٹنس سرٹیفکیٹ بھی بینک میں جمع کروا سکتے ہیں۔
سمندر پار پاکستانیوں کو پاکستان پہنچنے کے بعد حج پرواز سے پہلے سرٹیفکیٹ بنوا کر جمع کروانے کی ہدایت کی گئی ہے ، منظور شدہ ویکسین میں سے کسی ایک کی پہلی ڈوز لگوا کر درخواست جمع کراسکتے ہیں۔
وزارت مذہبی امور کا کہنا تھا کہ روانگی سے قبل مکمل ڈوز لگوا کر بینک میں سرٹیفکیٹ جمع کرانا ہو گا ، نادرا کے علاوہ غیر ملکی ویکسین سرٹیفکیٹ بھی قابل قبول ہو گا۔
حکام نے بتایا کہ نامزد بینکوں کی مخصوص شاخیں 25 اور 26 مارچ کو درخواستیں وصول کریں گی تاہم اسپانسر شپ بھجوانے والے کا عازمین حج سے Blood Relation ہونا ضروری نہیں۔
وزارت مذہبی امور کے مطابق آسان اکاؤنٹ کی حد 10 لاکھ سے بڑھا کر 15 لاکھ کی جا چکی ہے، حجاج کرام کو سعودی عرب میں قربانی کا کوپن خود خریدنا ہو گا، قربانی کوپن کی رقم 700 تا 1 ہزار ریال تک ہو سکتی ہے اور حج درخواستیں نامزد بینکوں کے ذریعے ہی پراسیس ہوں گی۔
