Tag: officials warn

ریاض : سعودی وزارت صحت نے اعلان کیا ہے کہ شہری ٹڈیوں کو کھانے سے گریز کریں کیونکہ ٹڈی دل کے خاتمے کےلیے کیے گئے اسپرے کے باعث یہ زہریلی ہوسکتی ہیں۔

غیر ملکی خبر رساں ادارے کی رپورٹ کے مطابق سعودی عرب مشرقی ریجن میں ٹڈی دل نے حملہ کردیا، ٹڈی دل کے حملے کی ویڈیو سوشل میڈیا پر بھی وائرل ہوگئی ہے، جس میں لاکھوں ٹڈیوں کو سڑکوں اور مختلف مقامات پر دیکھا جاسکتا ہے۔

سعودی عرب کی وزارت ماحولیات و پانی و زراعت نے کہا ہے کہ حکومت ٹڈی دل سے حملوں سے شہریوں کو بچانے کےلیے خصوصی مہم چلارہی ہے اور اس مہم میں عوام کو شریک ہونے کی دعوت دی گئی ہے۔

وزارت ماحولیات کی جانب سے اعلان کیا گیا ہے کہ شہری جہاں بھی ٹڈی دل کا حملہ دیکھیں فوری طور پر وزارت ماحولیات کو اطلاع کریں وہ فوری طور پر مناسب اقدامات کریں گے۔

وزارت ماحولیات نے ان علاقوں میں رہنے والے شہریوں کو متنبہ کیا ہے کہ ٹڈیوں کے خاتمے کے لیے کیے جانے والے اسپرے کی وجہ سے ٹڈیوں کو کھانے سے گریز کیا جائے، سپرے کے باعث یہ ٹڈیاں زہریلی ہوسکتی ہیں۔

واضح رہے کہ وزارت کی جانب سے گذشتہ ماہ ٹڈی دل حملوں کی پیشگی اطلاع دی گئی تھی۔

سعودی وزارت کا کہنا تھا کہ یکم تا پندرہ جنوری تک ایک لاکھ چالیس ہزار سے دو لاکھ 55 ہزار ہیکٹر رقبے پر ٹڈیوں کے خاتمے کے لیے اسپرے کیا تھا۔