کراچی میں جعلی سرکاری افسر اصلی پولیس کے ہتھے چڑھ گیا، ملزم رعب جمانے کیلیے اپنے ساتھ سیکیورٹی گارڈ بھی رکھتا تھا۔
اے آر وائی نیوز کی رپورٹ کے مطابق کراچی کے علاقے گارڈن سے پولیس نے جعلی سرکاری افسر کو گرفتار کیا ہے، ملزم سبز رنگ کی نمبر پلیٹ کی گاڑی میں پولیس لائٹ لگا کر گھومتا تھا۔
اس حوالے سے پولیس حکام کا کہنا ہے کہ ملزم خود کو سرکاری افسر ظاہر کرتا تھا اور لوگوں پر رعب جمانے کیلیے سیکیورٹی گارڈ بھی ساتھ رکھتا تھا۔
پولیس حکام کا بتانا ہے کہ ملزم کے ساتھ اس کے سادہ لباس سیکیورٹی اہلکار کو بھی گرفتار کرلیا گیا ہے، ملزمان کی شناخت بابر خان نیازی اور نبی بخش کے ناموں سے ہوئی ہے۔
ملزمان سے سرکاری نمبر پلیٹ والی گاڑی اور رائفل برآمد کرلی گئی۔ ملزم بابر خان نیازی اپنے آپ کو سرکاری افسر ظاہر کرتا رہا۔
پولیس حکام کے مطابق گرفتار ملزمان کے خلاف مقدمہ درج کرلیا گیا ہے اور مزید تفتیش جاری ہے۔
یاد رہے کہ گزشتہ ماہ دسمبر میں کراچی کے علاقے گلشن معمار سے جعلی پولیس افسر کو گرفتار کیا گیا تھا۔ ملزم پولیس یونیفارم پہن خود کو اے ایس آئی بتا رہا تھا۔
پولیس کے مطابق جعلی پولیس افسر اشفاق دکاندار سے جھگڑا کررہا تھا کہ اس موقع پر پولیس پہنچ گئی، پولیس نے شبہ ہونے پر پوچھا تو ملزم اپنی پوسٹنگ کا واضح جواب نہیں دے سکا اور کہا درخشاں تھانے میں تعینات ہے اس کے بعد بولا کہ ڈیفنس تھانے میں تعینات ہے۔
