ریاض: سعودی حکام نے متنبہ کیا ہے کہ ریاست میں بزرگ افراد کو بے شمار حقوق حاصل ہیں اور ان سے بدسلوکی کی سزا 1 برس قید اور 5 لاکھ ریال جرمانہ ہوسکتی ہے۔
اردو نیوز کے مطابق 15 جون کو منائے جانے والے معمر افراد کے عالمی دن کے موقع پر، ریاست کی جانب سے بزرگوں کو حاصل حقوق سے متعلق آگاہی مہم چلائی گئی۔
سعودی عرب میں بزرگ کل آبادی کا 6 فیصد ہیں، سنہ 2030 تک ریاست کی 15 فیصد آبادی ان افراد پر مشتمل ہوگی جن کی عمر 60 سال سے تجاوز کرچکی ہوگی۔
مملکت میں 81 فیصد سرکاری اداروں میں بزرگوں کو مناسب سہولتیں فراہم کی جاتی ہیں، سعودی قانون میں بزرگوں کے حقوق بھی مقرر ہیں۔
قانون کے مطابق معمر افراد کو اپنے اہلخانہ کے ساتھ رہنے کا حق دیا گیا ہے اور ان کی مرضی کے بغیر ان کی دولت میں تصرف کرنے سے منع کیا گیا ہے۔
سعودی قانون میں بزرگوں کے ساتھ بدسلوکی پر 1 برس قید اور 5 لاکھ ریال جرمانے کی سزا ہے۔
