Tag: عمان

مسقط: 300 سے زائد اسمگلر اور درانداز غیر قانونی طور پر عمان میں داخل ہوتے ہوئے پکڑے گئے۔

عرب میڈیا کے مطابق 2020 کی تیسری سہ ماہی کے دوران کوسٹ گارڈ پولیس نے مختلف کارروائیوں میں مختلف ممالک سے تعلق رکھنے والے 322 اسمگلرز اور غیر قانونی طور پر داخل ہونے کی کوشش کرنے والوں کو گرفتار کیا۔

عمانی پولیس کا کہنا تھا کہ دراندازی کرنے والوں کو عمانی سمندری حدود میں پکڑا گیا ہے۔

جاری اعلامیے میں کہا گیا ہے کہ کوسٹ گارڈ نے دیگر پولیس اداروں کے ساتھ مل کر سمندری راستے سے ہونے والی منشیات اسمگلنگ کے خلاف کامیاب آپریشن کیے۔

کوسٹ گارڈ پولیس کمانڈ کے ڈائریکٹر آپریشنز لیفٹیننٹ کرنل عبد العزیز الجبری کا کہنا تھا کہ کوسٹ گارڈ اہل کاروں کو عمانی سمندری حدود میں ایسے واقعات سے نمٹنے کے لیے مستقل طور پر تربیت دی جاتی ہے۔

انھوں نے کہا کہ کوسٹ گارڈ اہل کار مستقل طور پر اسمگلرز اور غیر قانونی تارکین وطن کا مقابلہ کرتے ہوئے اپنی جانیں بھی خطرے میں ڈالے رکھتے ہیں، بالخصوص رات کے مشکل ترین وقت میں جو خطرات اور چیلنجز سے بھرپور ہوتا ہے۔

الجبری کا کہنا تھا کہ یہ کوسٹ گارڈ عملے کے تجربات ہیں جن کی وجہ سے وہ اسمگلنگ کرنے والی کشتیوں سے بخوبی نمٹ رہے ہیں۔

انھوں نے کہا کہ کرونا وبا کے دوران اسمگلرز سے نمٹنا اور بھی مشکل ہو گیا ہے، کیوں کہ غیر قانونی طور پر عمان میں داخل ہونے والوں کو وبا کے سلسلے میں حفاظتی اقدامات کی آگاہی نہیں ہوتی، تاہم پولیس کی کشتیوں کا عملہ ان کے ساتھ بالکل درست طریقہ کار پر عمل کرتے ہوئے نمٹتا ہے تاکہ وائرس کی منتقلی نہ ہو سکے۔

کرنل عبدالعزیز الجبری نے کہا کہ وائرس کی روک تھام کے سلسلے میں کوسٹ گارڈ پولیس کا وزارت صحت کے حکام سے بھی رابطہ رہتا ہے، تاکہ دراندازی کرنے والوں جب کرونا کی طبی جانچ کے لیے متعلقہ مراکز لایا جائے تو خصوصی طبی عملہ بھی ساتھ ہو۔

انھوں نے رائل عمان پولیس کی جانب سے ان شہریوں کا شکریہ بھی ادا کیا جو سمندری حدود میں کسی مشتبہ شخص یا کشتی کے داخلے پر پولیس کو بروقت مطلع کر دیتے ہیں۔

مسقط: عمان نے اپنے ایئرپورٹس پر مسافروں کے لیے کرونا وائرس ٹیسٹ کی سہولت کا اعلان کر دیا ہے۔

تفصیلات کے مطابق عمان ایئرپورٹس کی جانب سے ایک بیان میں کہا گیا ہے کہ یکم اکتوبر 2020 سے سلطنت کے شہریوں اور رہائشیوں کے لیے پی سی آر ٹیسٹ کی سہولت دستیاب ہوگی۔

یہ بھی کہا گیا ہے کہ ہوائی جہاز سے سفر کرنے والے تمام مسافروں کے لیے کرونا وائرس پی سی آر ٹیسٹ لازمی ہوگا۔

اس سلسلے میں سپلائی انٹرنیشنل اور چینی کمپنی BGI کے اشتراک سے عمان کے ایئر پورٹس مسقط انٹرنیشنل ایئرپورٹ، صلاح ایئرپورٹ، سحر ایئرپورٹ اور دقم ایئرپورٹ پر کو وِڈ 19 کے لیے ٹیسٹنگ سہولت کی فراہمی کے حتمی مراحل طے کیے جا رہے ہیں۔

اس سہولت کا مقصد مسافروں کے لیے آسانی فراہم کرنا اور وائرس سے متاثرہ افراد کی جلد تشخیص ہے، یہ قدم ہیلتھ سیفٹی پروٹوکولز کے تحت اٹھایا گیا ہے تاکہ مسافروں، طیارے کے عملے اور ملازمین کی صحت کو محفوظ بنایا جا سکے۔

واضح رہے کہ اکتوبر شروع ہوتے ہی انٹرنیشنل ایئر ٹریول کا پھر سے آغاز ہونے والا ہے، جس کی وجہ سے بین الاقوامی اور مقامی فلائٹس سلطنت عمان کے ایئرپورٹس کو استعمال کرنے لگیں گی، اسی کے پیش نظر عمان ایئرپورٹس نے حفاظتی اقدامات شروع کر دیے ہیں۔

وزارت صحت اور سول ایوی ایشن اتھارٹی کے طے شدہ قواعد کے تحت تمام مسافروں کو سلطنت میں داخل ہونے کے لیے اپنے خرچ پر پی سی آر ٹیسٹ کرانا لازمی ہوگا۔

ایئرپورٹس کی جانب سے جاری بیان میں کہا گیا ہے کہ پی سی آر ٹیسٹ کے لیے پہلے موبائل ایپلی کیشن کے ذریعے بکنگ کرانی ہوگی، ایک ٹیسٹ کی قیمت 25 عمانی ریال رکھی گئی ہے، اس سلسلے میں مسافروں کو ایپ ڈاؤن لوڈ کرنی ہوگی، اس سے ایئر پورٹ پر ان کا وقت انتظار میں ضائع ہونے سے بچے گا۔

اگر ٹیسٹ منفی آ گیا تو وہ مسافر جنھیں 7 دن سے کم ٹھہرنا ہو، وہ سلطنت میں اپنا قیام جاری رکھیں گے اور وزارت صحت کی ہدایات پر عمل پیرا ہوں گے، 7 دن سے زیادہ قیام کرنے والے مسافروں کو کلائی پر ایک پٹی باندھنی ہوگی اور 14 دن قرنطینہ کرنا ہوگا۔ اگر ٹیسٹ مثبت آ گیا تو مسافر کو سیلف آئسولیشن میں جانا پڑے گا۔

مسقط: عمانی بچے نے اپنی جان داؤ پر لگا کر معذور والدہ اور بہن بھائیوں کو موت کے منہ سے بچا لیا۔

تفصیلات کے مطابق نو سالہ عمانی لڑکے المتسیم الشکسی نے بتایا کہ میں اپنے چھوٹے بھائی کے ساتھ ٹی وی دیکھ رہا تھا کہ اچانک میں نے اپنی بہن کو چیختا ہوا سنا اور دیکھا کہ ہمارے کمرے میں آگ لگ گئی ہے اور دھواں تیزی سے پھیل رہا ہے۔

المتسیم الشکسی کا کہنا تھا کہ سب سے پہلے میں اپنی پانچ سالہ بہن، سات سالہ اور ایک سالہ بھائی کو فوراََ لے کر گھر سے باہر نکلا اور پھر دوبارہ گھر میں داخل ہوا تاکہ اپنی معذور والدہ کو بچا سکوں۔

نو سالہ بہادر بچے کی والدہ نے بتایا کہ میرے بیٹے نے بہادری کا مظاہرہ کرتے ہوئے مجھے اور اپنی بہن بھائیوں کو نہ صرف بچایا بلکہ مدد کے لیے پڑوسیوں کو بھی پکارا۔انہوں نے کہا کہ خدا کے فضل سے حادثے میں کوئی زخمی نہیں ہوا۔

المتسیم الشکسی کی والدہ کا کہنا تھا کہ مجھے اپنے بیٹے پر فخر ہے اس نے اپنی جان داؤ پر لگا کر ہم سب کو بچایا۔

پبلک اتھارٹی فار سول ڈیفنس اینڈ ایمبولینس کے بریگیڈیئر جنرل نے التصیلیہ کے گورنری دفتر میں اپنے اہل خانہ کو آگ سے بچانے پر المتسیم الشکسی کو اعزاز سے نواز اور ان کی بہادری کی تعریف کی۔

مسقط : مسقط بلدیہ نے کیفے اور ریستورانوں کو ہدایات جاری کی ہیں کہ وہ کھانے اور مشروبات کے لیے برتن اور کپ کو ایک بار ہی استعمال کریں۔

تفصیلات کے مطابق عمان میں کرونا کے باعث بند ہونے والے کیفے اور ریستوران 5 ماہ بعد سخت احتیاطی تدابیر کے ساتھ عوام کے لیے کھول دیے گئے۔

اس حوالے سے مسقط بلدیہ کی جانب سے فہرست جاری کی گئی ہے جس میں کہا گیا ہے کہ کیفے اور ریستوران شیشے کے علاوہ دیگر خدمات کسٹمرز کو فراہم کرسکتے ہیں، جبکہ ایک ٹیبل پر 4 سے زائد افراد کے بیٹھنے پر پابندی ہوگی۔

مسقط بلدیہ کے مطابق سیلف سروس ٹیبلز اور کھلی بوفے استعمال کرنا ممنوع ہوگا، کھانے، مشروبات، کالی مرچ اور نمک کو ڈسپوزیبل برتنوں میں پیش کیا جائے گا۔

ریستوران اور کیفے میں کام کرنے والے ملازمین اور کسٹمرز کے لیے ہینڈ سینیٹائزر فراہم کرنا ضروری ہوگا،اس کے ساتھ صفائی کا بھی خاص خیال رکھا جائے۔

مسقط بلدیہ کے مطابق کسٹمرز کھانے کے وقت کے علاوہ ہر وقت ماسک پہنیں رکھیں گے اور کھانے کے بعد فوری طور پر جگہ خالی کرنے ہوگی، کیفے اور ریستورانوں میں دو میٹر کا سماجی فاصلہ رکھنا ہوگا۔

بلدیہ کی جانب سے کہا گیا کہ ریستورانوں اور کیفے میں بنیادی حفاظتی اقدامات پر عمل نہ کرنے کی صورت میں کسٹمرز متعلقہ حکام کو اطلاع دیں۔