Tag: Oman

مسقط: سلطنت عمان میں چند مریضوں میں نئے کرونا وائرس کا شبہ سامنے آیا ہے۔

تفصیلات کے مطابق عمان میں 4 مریضوں میں نئے کرونا وائرس کا شبہ کیا جا رہا ہے، سلطنت کے صحت حکام کا کہنا ہے کہ 4 ایسے مریضوں کا انکشاف ہوا ہے جنھیں نئے کرونا وائرس لاحق ہونے کا شبہ ہے۔

عمان کے وزیر صحت احمد بن محمد السعیدی نے مقامی میڈیا کو بتایا کہ مذکورہ شہری برطانیہ سے آئے ہیں، کو وِڈ 19 کے شبہے کی وجہ سے انھیں انتہائی نگہداشت کے شعبے میں منتقل کر دیا گیا ہے۔

وزیر صحت کا کہنا تھا کہ مریضوں کا کرونا ٹیسٹ مثبت آیا ہے تاہم طبی ٹیم کو شبہ ہے کہ انھیں نیا کرونا وائرس لاحق ہے، اس لیے ٹیسٹ رپورٹ آنے تک انھیں قرنطینہ میں رکھا گیا ہے، مذکورہ مریضوں کا علاج عالمی ادارہ صحت کی ہدایات کے مطابق کیا جا رہا ہے۔

احمد بن محمد السعیدی نے بتایا کہ سلطنت میں کرونا کے حوالے سے معاملات اب قابو میں ہیں، تاہم حکومت نے احتیاطی تدابیر کے طور پر سرحدیں بند کی ہیں۔

لاک ڈاؤن کے حوالے سے ان کا کہنا تھا کہ فی الوقت اس کا کوئی امکان نظر نہیں آ رہا ہے، ملک میں پھر سے لاک ڈاؤن نافذ نہیں کیا جا رہا۔

واضح رہے کہ نئے تبدیل شدہ کرونا وائرس سے متعلق کوئی اشارے ابھی سامنے نہیں آئے، اس لیے یہ زیادہ خطرناک ثابت ہو سکتا ہے۔

مسقط: سلطنت عمان میں آئل پرائس میں اضافہ ہو گیا ہے۔

تفصیلات کے مطابق دبئی مرکنٹائل ایکسچینج نے کہا ہے کہ عمان میں آئل کی قیمت 44.37 امریکی ڈالرز تک پہنچ گئی ہے۔

ڈی ایم ای کے جاری بیان میں کہا گیا ہے کہ جمعرات کو عمان آئل کی قیمت میں 24 سینٹ کا اضافہ ہوا، بدھ کو یہ قیمت 44.13 امریکی ڈالرز تھی۔

عمان کے تیل کی اوسط قیمت (دسمبر 2020 کے لیے) 41.11 امریکی ڈالرز قیمت پر مستحکم ہو گئی ہے، یوں نومبر ڈیلیوری 2020 سے یہ فی بیرل 49 سینٹس کم ہے۔

عمان میں پٹرولیم مصنوعات کی نئی قیمتوں کا اعلان

یاد رہے کہ عمان کی وزارت توانائی و معدنیات نے رواں ماہ کے لیے فیول پرائسز کا اعلان کرتے ہوئے گزشتہ ماہ کی پیٹرولیم مصنوعات کی قیمتوں کو برقرار رکھا تھا۔

نومبر کے لیے مقرر فیول پرائسز کے مطابق M95 پیٹرول کی نئی قیمت 194 بیسہ فی لیٹر مقرر کی گئی، M91 پیٹرول کی نئی قیمت 183 بیسہ فی لیٹر برقرار رکھی گئی، جب کہ ڈیزل کی فی لیٹر قیمت 209 بیسہ رکھی گئی۔

واضح رہے کہ رواں ماہ 12 تاریخ کو عمان نے ہمسایہ ممالک سے ملحقہ سرحدیں کھول کر شہریوں کو کرونا احتیاطی تدابیر کے ساتھ آمد و رفت کی اجازت دے دی ہے، دنیا بھر میں آمد و رفت پر پابندیاں ہٹنے کے ساتھ ہی تیل کے صرف میں بھی اضافہ ہو گیا ہے۔

مسقط: عمان نے نئے سال کے آغاز پر پلاسٹک شاپنگ بیگز کے استعمال پر مکمل پابندی عائد کر دی۔

تفصیلات کے مطابق سلطنت عمان میں 2021 شروع ہوتے ہی سنگل یوز پلاسٹک بیگز پر پابندی لگ جائے گی، اس سلسلے میں ایک فرمان میں کہا گیا ہے کہ اگلے برس سے سلطنت میں پلاسٹک کی تھیلی کے استعمال کی اجازت نہیں ہوگی۔

ماحولیاتی اتھارٹی کی جانب سے جاری بیان میں کہا گیا ہے کہ یہ فیصلہ سلطنت میں ماحول کو بہتر بنانے کے لیے اٹھایا گیا ہے۔

بیان کے مطابق سلطنت میں ایک بار استعمال ہونے والے پلاسٹک شاپنگ بیگز پر پابندی کے اس فیصلے کا اطلاق یکم جنوری 2021 سے ہو جائے گا۔

بیان میں سلطنت کے شہریوں کو پابندی کے اطلاق کے سلسلے میں خبردار بھی کیا گیا ہے، اتھارٹی کی جانب سے کہا گیا کہ ’کیا آپ تیار ہیں؟‘

واضح رہے کے عمان میں ہر سال کروڑوں کی تعداد میں شاپنگ بیگز استعمال کیے جاتے ہیں جس سے زیر زمین آبی مخلوق کو نقصان پہنچتا ہے، علاوہ ازیں یہ پلاسٹک کے لفافے ماحولیاتی آلودگی کا بھی باعث بنتے ہیں۔

پابندی ختم، عمان نے عوام کے لیے اچھا اعلان کردیا

عمان کے محکمہ ماحولیات نے یکم نومبر سے ڈائنامائٹ نامی جزیرہ بھی عوام کے لیے کھول دیا ہے، اپریل میں اس جزیرے کو بند کیا گیا تھا، جس کے بعد مئی کے آغاز سے اکتوبر تک یہاں عوام کے داخلے پر پابندی تھی۔

حکومت کی جانب سے داخلے کی پابندی مچھلیوں، سمندری مخلوق اور کچھوؤں کی افزائش کی وجہ سے عائد کی گئی تھی کیوں کہ سیاحوں کے آنے کی وجہ سے یہاں پر آلودگی پھیل گئی تھی جس نے آبی مخلوق کو نقصان پہنچایا تھا۔

مسقط: سلطنت عمان میں تمام تر احتیاطی تدابیر کے ساتھ اسکول کھول دیے گئے۔

تفصیلات کے مطابق کو وِڈ 19 کی وبا کے باعث ایک لمبے عرصے تک اسکول بند رہنے کے بعد اتوار کو اسکول کھول دیے گئے، 6 لاکھ 75 ہزار سے زائد طلبہ نے نئے تعلیمی سال کا آغاز کر دیا ہے۔

وزارت تعلیم کی جانب سے ایک بیان میں بتایا گیا کہ اتوار کو مخلوط تعلیم دینے والے 1 ہزار 182 اسکولوں میں 6 لاکھ 76 ہزار 943 طلبہ نے حاضری دی۔

الوسطیٰ اسکول کے بارھویں جماعت کے ایک طالب علم سعید بن حماد بن صبیح الجنیبی سے جب اسکول لوٹنے کے بعد خدشات سے متعلق پوچھا گیا تو انھوں نے انتظامات پر اطمینان کا اظہار کیا۔

الجنیبی نے بتایا کہ اسکول جانے سے قبل میں انفیکشن یا حفاظتی انتظامات کی کمی کے خیال سے ڈرا ہوا تھا، لیکن جب اسکول میں داخل ہوا تو خوشی ہوئی کہ تمام تر حفاظتی تدابیر بروئے کار لائے گئے تھے، جن میں درجہ حرارت چیک کرنا اور ماسک بھی شامل ہیں، جب کہ سماجی فاصلے کی پابندی پر بھی عمل ہوتا رہا۔

اسکول کی دیواروں پر جگہ جگہ صحت کے حوالے سے ہدایات چسپاں کی گئی تھیں، کلاس رومز صاف ستھرے تھے، اسپرے کیا گیا تھا، حتیٰ کہ برآمدوں اور ٹوائلٹس میں بھی جراثیم کش اسپرے ہوا تھا۔

ایک اور اسکول کے ساتویں جماعت کے طالب علم نے بتایا کہ لمبے عرصے تک چھٹیوں کے بعد اسکول آنے میں مزا آیا۔