ہارورڈ میڈیکل اسکول میں مختلف ویرینٹس کو مانیٹر کرنے والے ڈاکٹر جیکب لیمیوکس کا کہنا ہے کہ کرونا کا اومیکرون ویرینٹ دنیا بھر میں پھیلے ڈیلٹا کی جگہ لے سکتا ہے۔
تفصیلات کے مطابق کرونا وائرس کی نئی قسم اومیکرون کے جنوبی افریقی ممالک میں پھیلنے اور دنیا بھر کے ممالک کو اپنی لپیٹ میں لینے کے بعد، سائنس دان بے چینی سے ایک ایسی جنگ کو دیکھ رہے ہیں جو وبائی مرض کے مستقبل کا تعین کر سکتی ہے۔
سائنس دان اب اس سوال کا جواب تلاش کر رہے ہیں کہ کیا اومیکرون ڈیلٹا کی جگہ لے سکتا ہے، کچھ سائنس دان جنوبی افریقا اور برطانیہ کے اعداد و شمار کو دیکھتے ہوئے کہتے ہیں کہ اومیکرون ایسا کر سکتا ہے۔
ڈاکٹر جیکب لیمیوکس کا کہنا ہے کہ اگرچہ ابھی ابتدائی دن ہیں لیکن اعداد و شمار میں تیزی سے تبدیلی آنا شروع ہو گئی ہے، جس سے پتا چلتا ہے کہ اگر سب جگہوں پر نہیں تو اومیکرون بہت سے مقامات پر ڈیلٹا سے مقابلہ کر سکتا ہے۔
لیکن دوسرے سائنس دانوں کا خیال ہے کہ یہ کہنا قبل از وقت ہے کہ اومیکرون ڈیلٹا سے زیادہ مؤثر طریقے سے پھیلے گا، میو کلینک میں کلینیکل وائرولوجی کے ڈائریکٹر میتھیو بنیکر کا کہنا ہے کہ امریکا میں ڈیلٹا میں نمایاں اضافہ ہوا، کیا اومی کرون اس کی جگہ لے لے گا، مجھے لگتا ہے کہ ہمیں تقریباً دو ہفتوں میں معلوم ہو جائے گا۔
فی الوقت اومیکرون کے بارے میں بہت سے اہم سوالات کے جوابات نہیں دیے گئے ہیں، کہ کیا وائرس ہلکی یا زیادہ شدید بیماری کا سبب بنتا ہے، اور یہ ماضی میں کرونا سے بیمار ہونے والوں یا ویکسین لگوانے والے افراد کو متاثر کر سکتا ہے؟
