اسلام آباد : سپریم کورٹ ترجمان کا کہنا ہے کہ چیف جسٹس آف پاکستان نے دیا میربھاشا ڈیم کے لیے مزید ایک لاکھ روپے عطیہ دے دیا۔
تفصیلات کے مطابق ترجمان سپریم کورٹ کی جانب سے بیان جاری کیا گیا ہے کہ چیف حسٹس آف پاکستان جسٹس ثاقب نثار دیا میربھاشا ڈیم کے لیے مزید ایک لاکھ روپے عطیہ جمع کرادیئے۔
یاد رہے چند روز قبل پاکستان کو خشک سالی سے بچانے کے لئے اور چیف جسٹس کی مہم کے لئے اے آر وائی نیٹ ورک نے فنڈ ریزنگ ٹیلی تھون کا اہتمام کیا تھا، جس پر چیف جسٹس میاں ثاقب نثار نے اے آر وائی نیٹ ورک کو شاندار خراج تحسین پیش کیا تھا۔
چیف جسٹس نے اے آر وائی ٹیلی تھون کے ڈیم فنڈ میں ایک لاکھ روپے دینے کا اعلان کرتے ہوئے کہا تھا کہ انشااللہ ڈیم بنانے کی مہم کامیاب ہوگی، قوم کسی افواہ پر یقین نہ کرے، انشاءاللہ یہ ڈیم 9 سے ساڑھے نو سال میں تعمیر ہو جائے گا۔
مزید پڑھیں : چیف جسٹس کا اے آر وائی ٹیلی تھون میں ایک لاکھ روپے عطیہ
انھوں نے امید ظاہر کی کہ پاکستانی قوم اس میں بھرپور حصہ لے گی۔
خیال رہے اسٹیٹ بینک کے مطابق 6 جولائی سے 28 اگست تک مختلف بینکوں میں ڈیموں کی تعمیر کے لیے کھولے جانے والے اکاؤنٹس میں ایک ارب 58 کروڑ 47 لاکھ 65 ہزار 924 روپے جمع ہوگئے ہیں۔
یاد رہے کہ 6 جولائی کو کالا باغ ڈیم کی تعمیر سے متعلق ہونے والی سماعت میں چیف جسٹس آف پاکستان نے پانی کی قلت کو دور کرنے کے لیے فوری طور پر دیامیر بھاشا اور مہمند ڈیموں کی تعمیر کے احکامات اور فنڈز قائم کرنے کا حکم بھی جاری کیا تھا۔
بعد ازاں چیف جسٹس میاں ثاقب نثار نے سب سے پہلے ڈیموں کی تعمیر کے لئے دس لاکھ روپے کا عطیہ جمع کرایا تھا پھر میئر کراچی اور پیر پگارا نے ہر قسم کے تعاون کی پیشکش کی تھی اور وسیم اختر نے اپنی اور کے ایم سی افسران کی طرف سے ایک ایک لاکھ روپے فنڈ عطیہ کرنے کا اعلان کیا تھا۔
مزید پڑھیں : دیامر بھاشا اور مہمند ڈیموں کی تعمیر، ڈیم فنڈ میں اب تک کتنی رقم جمع ہوگئی
مسلح افواج نے ڈیموں کی تعمیر کے کار خیر میں بڑھ چڑھ کر حصہ لینے کا اعلان کرتے ہوئے کہا تھا کہ تینوں مسلح افواج کے افسران 2دن کی تنخواہ فنڈ میں جمع کرائیں گے۔
چیئرمین سینیٹ صادق سنجرانی نے 15 لاکھ جبکہ قومی کرکٹ ٹیم کے سابق کپتان اور اداکار حمزہ علی عباسی سمیت ملک میں بسنے والے دیگر لوگوں نے بھی ڈیمز کی تعمیر میں حصہ ڈالا، شاہد آفریدی نے اپنی اور فاؤنڈیشن کی جانب سے 15 لاکھ روپے دینے کا اعلان کیا بعدازاں پاکستانی نژاد برطانوی باکسر نے بھی 10 لاکھ روپے عطیہ کیے۔
سیکیورٹی ایکسچینج آف پاکستان نے ڈیمز کی تعمیر کے حوالے سے 14 جولائی کو اہم فیصلہ کرتے ہوئے سرکلر جاری کیا تھا جس میں تمام رجسٹرڈ کمپنیوں کو کمرشل سماجی ذمہ داری کے تحت ڈیموں کی تعمیر میں عطیات دینے کی ہدایت کی گئی تھی۔
دیامربھاشا اورمہمند ڈیم کی تعمیر کے لیے قائم فنڈ میں اب اسٹیٹ بینک و دیگر و نجی بینکوں سمیت دیگر سرکاری و پرائیوٹ اداروں کے ملازمین اور عوام نے کروڑوں روپے عطیہ کیے جس کا سلسلہ جاری ہے۔
