Tag: oneday series

آسٹریلیا نے سری لنکا کیخلاف ون ڈے سیریز 1-4 سے جیت لی

پالی کلے : آسٹریلیا نے ون ڈے سیریز کے پانچویں میچ میں سری لنکا کو پانچ وکٹوں سے شکست دیدی، سیریز آسٹریلیا نے چار ایک سے اپنے نام کرلی۔

تفصیلات کے مطابق ون ڈے سیریز کے پہلے چار میچوں میں ناکام آسٹریلوی اوپنر نے شاندار سنچری سے اپنی ٹیم کو میچ اور 4.1 سے سیریز جتوا دی۔

پالیکلے میں کھیلے گئے ون ڈ ے سیریز کے آخری میچ میں سری لنکا نے ٹاس جیت کر پہلے کھیلنے کا فیصلہ کیا، سری لنکن ٹیم نے پہلے بیٹنگ کرتے ہوئے ایک سو پچانوے رنز بنائے۔

اسٹارک نے تین، ہیڈ اور زیمپا نے دو ، دو وکٹیں حاصل کیں۔ آسٹریلیا نے مطلوبہ ہدف پانچ وکٹوں کے نقصان پر پورا کرلیا۔ ڈیوڈ وارنر نے ایک سو چھ رنز کی اننگز کھیلی۔ جارج بیلی نے چوالیس رنز اسکور کیے۔

پانچ میچوں کی سیریز آسٹریلیا نے چار ایک سے اپنے نام کرلی۔ وارنر کو مین آف دی میچ اور جارج بیلی کو مین آف دی سیریز قرار دیا گیا۔ دونوں ٹیموں کے درمیان دو میچز کی ٹی ٹوئنٹی سیریز چھ ستمبر سے شروع ہوگی۔

ستمبر 4, 2016
ون ڈے کرکٹ سیریزمیں پاکستانی ٹیم کو کلین سوئپ کا خطرہ

لاہور : پاک انگلینڈ پانچ ون ڈے کرکٹ سیریز میں مسلسل ناکامی کے بعد پاکستان کو انگلینڈ کے خلاف سیریز میں اب کلین سوئپ کا خطرہ پیدا ہوگیا ہے۔

تفصیلات کے مطابق انگلینڈ میں پاکستان کی ناکامیوں کو بریک نہ لگ سکی۔ ساؤتھ ہیمٹن میں کھیلے گئے پہلے ون ڈے میچ میں انگلش ٹیم چوالیس رنز سے کامیاب رہی۔

لارڈز میں کھیلے گئے میچ میں پاکستانی ٹیم کو چار وکٹوں سے ناکامی کا سامنا کرنا پڑا۔ ناٹنگھم میں تاریخی ایک سو انہتر رنز کی شکست نے امیدوں پرکرکٹ شائقین کی امیدوں پر پانی پھیردیا۔ جبکہ لیڈز میں بھی جمود نہ ٹوٹ سکا اور انگلینڈ کی ٹیم نے پاکستان کو چار وکٹوں سے شکست دے دی۔

ٹیم میں کی گئی چار تبدیلیاں بھی نتیجہ تبدیل نہ کرسکیں۔ سیریز میں اب پاکستانی ٹیم کی ساکھ داؤ پر لگی ہے۔ پاکستانی کرکٹ کی ناؤ ڈوب رہی ہے۔

قومی ٹیم کو اب وائٹ واش کا خطرہ ہے۔ اتوار کو کارڈف میں ہونے والے آخری معرکے میں اب اللہ خیر ہی کرے۔

دوسری جانب شائقین کرکٹ ٹیم کی مسلسل ناکامیوں پر دلبرداشتہ ہوگئے۔ ان کا کہنا ہے کہ کھلاڑیوں سے اب کوئی توقعات نہیں رہیں۔

کپتان پراپنے غصے کا اظہار کرتے ہوئے شائقین نے کہا کہ پاکستان کرکٹ بورڈ کو اظہرعلی کی جگہ اب کسی اورکو کپتان بنادینا چاہئیے۔

ستمبر 2, 2016
انگلینڈ نے ون ڈے سیریز جیت لی، پاکستان کو 169رنز سے شرمناک شکست

نا ٹنگھم : انگلینڈ نے پاکستان کو شکست دے کر تاریخ رقم کردی۔ پہلے چار سو چوالیس رنز کا پہاڑ کھڑا کیا۔ پھر پاکستان کو ایک سو انہتر رنزکے بڑے مارجن سے ہرا دیا۔ شاہینوں کی ون ڈے کرکٹ میں یہ سب سے بڑی شکست ہے۔

تفصیلات کے مطابق انگلینڈ نے پاکستان کو تیسرے ون ڈے میں 169رنز سے شکست دے کر5ایک روزہ میچز کی سیریز 3-0سے جیت لی ہے۔

انگلینڈ کے 445 رنز کے تعاقب میں پوری پاکستانی ٹیم 42.4 اورز میں 275 رنز بنا کر پویلین لوٹ گئی۔ آخر میں آنے والے محمد عامر نے 28 گیندوں پر 58 رنز بنا کر ٹیم کی عزت بچانے کی پوری کوشش کی۔

شرجیل خان نے بھی 58 رنز ہی بنائے، سرفراز 38 اور محمد نواز34رنز بنانے میں کامیاب ہوئے، ون ڈے میں بیٹنگ کیسے کرتے ھیں انگلینڈ نے بتا دیا۔

343 کا دس سالہ پرانا ریکارڈ ٹوٹ گیا۔ انگلش بیٹسمینوں نے ظلم کی انتہا کر دی، پاکستان کی جانب سے انگلینڈ کے ہدف کے تعاقب میں سمیع اسلم اور شرجیل خان نے میدان میں اتر کر کھیل کا آغاز کیا لیکن سمیع اسلم وکٹ پر زیادہ دیر اپنے قدم جمانے میں کامیا ب نہیں ہوئے اور 8رنز پر ہی پولین لوٹ گئے۔

شرجیل خان اچھے کھیل کا مظاہرہ کررہے تھے اور انہوں نے 26 گیندوں پر نصف سینچری بھی بنائی لیکن 58 رنز پر ووکس کی گیند پر کیچ آوٹ ہو ئے جبکہ تیسرے نمبر پر آنے والے اظہر علی صرف 13 رنز ہی بنا سکے اور پولین لوٹ گئے۔

ان کے بعد آنے والے بابر اعظم اسٹوکس کی گیند پر کیچ آوٹ ہو کر پولین لوٹ گئے ،شعیب ملک بھی کچھ نہ کر سکے صرف ایک رن بنا کر واپس لوٹ گئے,محمد نواز 34 اور حسن علی 4 رنز بنانے میں کامیاب ہوئے۔

انگلینڈ کی جانب ایلکس ہیلز نے 171کی انتہائی شاندار اننگ کھیلی اور مین آف کی میچ کا اعزاز حاصل کیا جبکہ باولرز میں ووکس نے 4 ،عادل راشد نے دو وکٹیں حاصل کیں جبکہ پلنکٹ،سٹوکس،ووڈ اور موئن علی نے ایک ایک کھلاڑی کو پویلین پہنچایا۔ 445 رنزبنانا پاکستان کے بس میں نہیں تھا اورایسا ہی ہوا۔ شرمناک شکست پاکستان کامقدر بنی۔

اگست 31, 2016
پاکستان نےسری لنکا کو شکست دے کر ون ڈے سیریز جیت لی

کولمبو: پاکستان نےسری لنکا کو 9 سال بعد ون ڈے سیریزمیں شکست دے دی، پاکستان نےسری لنکاکا 257 رنزکاہدف 40.5اوورزمیں پوراکرلیا، احمدشہزاد 95 ،محمدحفیظ 70اوراظہرعلی نے33رنزبنائے۔

تفصیلات کے مطابق پاکستانی شاہینوں نے لنکا ڈھادی۔ چوتھا ون ڈے سات وکٹ سے جیت کرنوسال بعد سری لنکا کو ہوم گراؤنڈپر دھول چٹادی۔

کامیابی کےبعد چیمپیئنز ٹرافی میں شرکت کے امکانات روشن ہوگئے۔ کولمبو میں شاہینوں کے تگڑے وار نے ٹائیگرز کو بےحال کردیا۔

پاکستان نے چوتھا ون ڈے سات وکٹوں سے جیت کر ون ڈے سیریز اپنے نام کرلی ساتھ ہی رینکنگ میں آٹھویں پوزیشن پر قبضہ بھی جمالیا۔

سری لنکانے ٹاس جیتا لیکن میچ نہیں۔عرفان نےدوسری گیندپرپریرا کے قدم جمنے سے پہلے اکھاڑ دئیے۔ دلشان اور تھرمانے نے ایک سو نو رنز جوڑے لیکن دونوں کے آؤٹ ہوتے ہی کھلاڑیوں کی لائن لگ گئی۔

قومی بولرز نے بلے بازوں کو تگنی کا ناچ نچادیا۔ وقفے وقفے سے وکٹیں گرنے کی وجہ سے سری لنکن ٹیم نو وکٹ پر دو سو چھپن رنز ہی بناسکی۔

تھریمانے 90 اور دلشان 50 رنز بناکر نمایاں رہے، محمدعرفان نے3اورانورعلی نے2کھلاڑیوں کو آؤٹ کیا۔

جولائی 22, 2015
پاک سری لنکا ون ڈے سیریز کیلئے اسکواڈ کا اعلان کردیا گیا

لاہور: پاکستان کرکٹ بورڈ نے پاک سری لنکا ون ڈے سیریز کیلئے سولہ رکنی اسکواڈ کا اعلان کردیا، پی سی بی کی جانب سے جاری اعلامیے کے مطابق ون ڈے ٹیم کی قیادت اظہر علی کریں گے جبکہ سرفراز احمد وکٹ کیپر ہوں گے۔

پانچ ایک روزہ میچز کی سیریز 11 سے 26 جولائی تک کھیلی جائے گی۔

رواں ماہ شروع ہونے والی سیریز کے لیے محمد عرفان کو بھی ٹیم میں شامل کیا گیا ہے۔ دیگر کھلاڑیوں میں احمد شہزاد، محمد حفیظ، مختار احمد، اسد شفیق، شعیب ملک، محمد رضوان، بابر اعظم ، یاسر شاہ، بلال آصف، عماد وسیم، انور علی، محمد عرفان، احسان عادل اور راحت علی شامل ہیں۔

علاوہ ازیں ان فٹ وہاب ریاض اور حارث سہیل ٹیم سے باہر جبکہ مڈل آرڈر بلے باز عمر اکمل بھی ٹیم میں جگہ نہیں بنا سکے۔

نوجوان بلے باز صہیب مقصود بھی زخمی ہونے کے باعث ٹیم کا حصہ نہیں بن سکے۔ چیف سلیکٹر ہارون رشید کے مطابق وہاب ریاض اگر فٹ ہو گئے تو انہیں سیریز کے آخری دو میچز کے لئے سری لنکا بھیجا جا سکتا ہے۔

پاکستان اور سری لنکا کے درمیان پانچ میچ کی سیریز کا پہلا میچ گیارہ جولائی کو دمبولا میں کھیلا جائے گا۔

جولائی 3, 2015
بنگلہ دیش نے بھارت کو ہرا کر ون ڈے سیریز جیت لی

ڈھاکا : بھارت اور بنگلہ دیش کے درمیان کھیلی جانے والی ون ڈے سیریز میں میزبان بنگلہ دیش نے بھارت کو حیرت انگیز طور پر دوسرے میچ میں چھ وکٹوں سے شکست دے کر تین میچوں کی سیریز میں 2-0 کی فیصلہ کن برتری حاصل کر لی ہے۔

بھارتی کپتان مہندرا سنگھ دھونی نے ٹاس جیت کر پہلے بیٹنگ کا فیصلہ کیا، بھارتی اوپنر روہت شرما صفر پر پویلین لوٹ گئے۔

ویرات کوہلی اور شیکھر دھون نے دوسری وکٹ کی شراکت میں74 رنز بنائے، لیکن 23 رنز بنانے کے بعد کوہلی ناصر حسین کی بال پر آؤٹ ہوگئے۔ شیکھر دھون نے شاندار بیٹنگ کی اور 53 رنز اسکور کئے لیکن 109 کے مجموعی اسکور پر وہ بھی پویلین لوٹ گئے جبکہ ایک رن کے اضافے سے امبتی رائیڈو کی اننگ بھی ختم ہو گئی۔

اس موقع پر کپتان مہندرا سنگھ دھونی اور سریش رائنا نے اننگ کو سنبھالنے کی کوشش کرتے ہوئے 53 رنز کی شراکت قائم کی لیکن پھر دونوں ہی کھلاڑی یکے بعد دیگرے پویلین لوٹ گئے۔

اسکور 198 تک پہنچا تو بھاررتی ٹیم کے آٹھ کھلاڑی آؤٹ ہو چکے تھے تاہم اسی موقع پر میچ میں بارش نے مداخلت کردی۔ جس کے بعد میچ دوبارہ شروع ہوا تو اسے فی اننگ 47 اوورز تک محدود کردیا گیا۔

میچ دوبارہ شروع ہوا تو جدیجا پہلی ہی گیند پر 19 رنز بنانے کے بعد پویلین لوٹ گئے جبکہ اگلے ہی اوور میں 200 کے مجموعی اسکور پر دسواں ہندوستانی کھلاڑی بھی پویلین لوٹ گیا۔

بنگلہ دیش کے مستفیض الرحمان نے اس اننگ میں بھی شاندار باؤلنگ کرتے ہوئے چھ کھلاڑیوں کو پویلین کی راہ دکھائی۔ جواب میں بنگلہ دیشی ٹائگرز نے ذمے دارانہ کارکردگی کا مطاہرہ کیا اورمیچ میں چھ وکٹ سے فتح اپنے نام کر لی۔

بنگلہ دیش کی جانب سے شکیب الحسن ناقابل شکست 51 رنز کے ساتھ سب سے کامیاب بلے باز رہے جبکہ مشفیق الرحیم نے 31، لٹن داس نے 34 اور سومیا سرکار نے 36 رنز بنا کر ہندوستانی ٹیم کوشکست دی۔

مستفیض الرحمان چھ وکٹیں لینے پر مین آف دی میچ قرار پائے۔

جون 21, 2015
پاکستان اور زمبابوے ون ڈے سیریز کا آغاز کل لاہور میں ہوگا

لاہور: پاکستان اور زمبابوے کے درمیان ٹی ٹوئنٹی کے بعد ون ڈے سیریز کا آغاز کل لاہور میں ہوگا۔

پاکستان میں انٹرنیشنل کرکٹ کی کامیاب واپسی اور ٹی ٹوئنٹی سیریز گرین شرٹس کے نام رہی، پاکستان کی آئی سی سی رینکنگ میں پانچویں پوزیشن برقرار ہے۔

دونوں ٹی ٹوئنٹی کے دوران قذافی اسٹیڈیم میں عوام کا سمندر امڈ آیا، شائقین کا جوش وخروش بھی عروج پر تھا، پاکستان زندہ باد کے نعروں نے جوش اور بھی بڑھادیا۔

منگل سے لاہور میں دونوں ٹیموں کے درمیان ون ڈے سیریز کا آغاز ہوگا, ڈے نائٹ میچ شام چار بجے شروع ہوگا۔

پی سی بی نے ون ڈے سیریز کے لئے اسکواڈ کا اعلان کردیا ہے، اظہر علی کو کپتان برقرار رکھا گیا ہے، سرفراز احمد نائب کپتان ہوں گے۔ محمد سمیع اور شعیب ملک کی ٹی ٹوئنٹی کے بعد ون ڈے اسکواڈ میں بھی واپسی ہوئی ہے۔

دونوں ٹیمیں رواں سال ورلڈ کپ کے بعد ایک روزہ فارمیٹ میں مدمقابل ہوں گی۔

مئی 25, 2015
سہ ملکی سیریز، انگلینڈ نے بھارت کو 9 وکٹوں سے ہرادیا

برسبین: ورلڈ کپ سے قبل ورلڈ چیمپئین بھارتی ٹیم کی تیاریوں کا پول کھل گیا، سہ ملکی سیریز کے میچ میں انگلینڈنے نو وکٹوں سے عبرتناک شکست دے دی۔

برسبین میں بھارت کا غرور خاک میں مل گیا، انگلینڈ نے ورلڈ چیمپئینز کو دھول چٹادی، بیٹنگ پر بھروسہ کرنے والی بھارتی ٹیم نے ٹاس جیت کر بلے بازوں کو آزمایا لیکن کوئی بھی کام نہ آیا۔

انگلش بولرز نے بھارتی بیٹنگ لائن کو تہس نہس کردیا، ورلڈ چیمپئینز کا چالیسویں اوور میں ایک سو تریپن پر بوریا بستر گول ہوگیا۔ فن نے پانچ اور اینڈرسن نے چار وکٹیں حاصل کیں۔

جواب میں انگلینڈ نے ہدف باآسانی ایک وکٹ پر حاصل کرلیا، این بیل نے ناٹ آؤٹ اٹھاسی اور جیمز ٹیلر نے چھپن رنز کی اننگز کھیلی، بھارت کی اس سیریز میں یہ مسلسل دوسری ناکامی ہے۔

جنوری 20, 2015
حارث سہیل اور آفریدی نے شاندار کارکردگی دکھائی، مصباح الحق

دبئی: پاکستان کرکٹ ٹیم کے کپتان مصباح الحق کا کہنا ہے کہ نیوزی لینڈ کے خلاف جیت کا تمام کریڈٹ حارث سہیل اور آفریدی کو جاتا ہے۔

دبئی ون ڈے میں کیویز کو تین وکٹوں سے شکست دینے کے بعد کپتان مصباح الحق کی خوشی دیدنی تھی، نیوز کانفرنس کرتے ہوئے مصباح الحق کا کہنا تھا کہ حارث سہیل اور آفریدی کی جتنی تعریف کی جائے کم ہے، مصباح الحق کا کہنا ہے کہ ورلڈ کپ سے قبل یہ آخری سیریز ہے اس لئے اس میں تجربات کرنا چاہتے ہیں۔

مین آف دی میچ حارث سہیل کا کہنا ہے کہ ہیڈ کوچ وقار یونس اور بولنگ کوچ مشتاق احمد نے بہت سپورٹ کیا،والدین کی دعاؤں کی وجہ سے میچ میں بہترین پرفارمنس دکھاسکا۔

دسمبر 9, 2014
نیوزی لینڈ کیخلاف ون ڈے سیریز بہت اہم ہے،مصباح الحق

دبئی: پاکستان کرکٹ ٹیم کے کپتان مصباح الحق کا کہنا ہے کہ ورلڈ کپ کی تیاری کیلئے نیوزی لینڈ کے خلاف ون ڈے سیریز بہت اہم ہے۔ کوشش ہے ایسی ٹیم بنائیں جو میگا ایونٹ میں بھی چل سکے۔

دبئی میں نیوز کانفرنس کرتے ہوئے مصباح الحق کا کہنا تھا کہ پرفارمنس کے لئے اعتماد کا بحال ہونا بہت ضروری ہے۔نیوزی لینڈ کے خلاف ون ڈے سیریز میں سو فیصد کارکردگی دکھانے کی پوری کوشش کریں گے۔

ان کی ٹیم ورلڈ کپ سے قبل زیادہ سے زیادہ میچز کھیلنا چاہتی ہے۔ مصباح الحق نیوزی لینڈ کے کپتان کین ولیمسن کا کہنا ہے کہ اجمل کے بغیر بھی پاکستان خطرناک ٹیم ہے۔ون ڈے میں دلچسپ مقابلہ ہوگا۔

پاکستان اور نیوزی لینڈ کے درمیان پانچ میچز کی سیریز کا آغاز پیر سے دبئی میں کھیلے جانے والے پہلے میچ سے ہوگا۔

دسمبر 6, 2014