پشاور: کالعدم تحریک ِ طالبان پنجاب نے ملک بھر میں عسکری کاروائیاں ختم کرنے کا اعلان کیا ہے ، تجزیہ نگاروں کے مطابق آُپریشن ضرب ِعضب کے نتیجے میں حاصل ہونے والی یہ اب تک کی سب سے بڑی کامیابی ہے۔
اے آر وائی نیوز پشاور کے بیورو چیف ضیا الحق کے مطابق تحریک طالبان پنجاب کے امیر عصمت اللہ معاویہ نے ملک بھرمیں عسکری کاروائیاں ختم کرنے کا اعلان کرتے ہوئے سرینڈر کردیا ہے۔
ذرایع کے مطابق عصمت اللہ معاویہ کے ہمراہ تحریک ِ طالبان پنجاب کی پوری قیادت نے ہتھیار ڈالنے کا اعلان کیا ہے، اوراب تحریکِ طالبان پنجاب دعوت و تبلیغ کا کام انجام دے گی اورساتھ ہی ساتھ سیلاب زدگان کے لئے جاری امدادی سرگرمیوں میں بھی حصہ لے گی۔
عصمت اللہ معاویہ کاکہنا ہے کہ ملا فضل اللہ غیر شرعی سرگرمیوں میں ملوث ہیں اور وہ بھتہ خوروں کی سرپرستی بھی کرتے ہیں اسی بناء پر ان سے علیحدگی اختیار کی۔
انہوں نے یہ بھی کہا کہ ہتھیار ڈالنے کا فیصلہ علماء اور عمائدین سے مشاورت کے بعد کیا گیا ہے اور ساتھ ہی انہوں دیگر طالبان گروہوں سے اپیل بھی کی ہے کہ وہ بھی عسکری کاروائیاں بند کر کے دعوت و تبلیغ کا کام شروع کریں۔
ممتاز تجزیہ نگار حسن عسکر ی نے اے آر وائی نیوز سے گفتگو کرتے ہوئے کہا ہے کہ آپریشن ضرب ِ عضب کے نتیجے میں حاصل ہونے والی اب تک کی یہ سب سے بڑی کامیاببی ہے اور یہی جمہوری طریقہ ہے کہ اگرکوئی گروہ کسی فکر کا قائل ہے تو اس کا عوام میں پرچار کرے اوررائے عامہ کو اپنے حق میں ہموار کرکے پارلیمنٹ میں آئےاور اپنے مطالبات پر عمل درآمدکروائے۔
