لندن: شہزادے ہیری اور ان کی اہلیہ میگھن مارکل نے شاہی محل میں اپنے دن کیسے گزارے اور انہیں کیا مشکلات پیش آئیں، حالیہ انٹرویو میں سب سامنے آگیا ہے۔
برطانوی شاہی خاندان کے چھوٹے شہزادے ہیری اور ان کی اہلیہ میگھن مارکل نے حال ہی میں امریکی ٹی وی اسٹار اوپرا ونفرے کو انٹرویو دیا تھا، یہ انٹرویو دو گھنٹے پر محیط تھا۔
اس طویل انٹرویو میں میگھن مارکل نے شاہی محل میں نسلی امتیاز اور وہاں پر قیدی کی طرح زندگی گزارنے سے اپنی ذہنی صحت پر پڑنے والے اثرات پر کھل کر گفتگو کی تھی۔
شہزادہ ہیری نے بھی انٹرویو میں بتایا تھا کہ وہ اور ان کی اہلیہ شاہی محل میں کتنے مجبور تھے؟ دونوں نے بتایا تھا کہ ان کے ہاں پہلے بچے کی پیدائش سے قبل ہی شاہی محل میں یہ چہ مگوئیاں ہونا شروع ہوگئی تھیں کہ نہ جانے ان کے بچے کی رنگت کتنی سیاہ ہوگی؟۔
شہزادہ ہیری نے بتایا کہ جب ان کی اہلیہ میگھن مارکل پر برطانوی میڈیا میں غلط خبریں شائع ہو رہی تھیں، تب بھی شاہی محل نے ان کی مدد نہیں کی تھی، میگھن مارکل کا کہنا تھا کہ غلط خبروں اور شاہی محل میں نسلی امتیاز جیسی باتوں پر انہوں نے خودکشی کرنے کا بھی سوچا تھا۔
جہاں مذکورہ انٹرویو کو مغربی دنیا کا سب سے اہم ترین انٹرویو کہا جا رہا ہے، وہیں اسے برطانوی شاہی خاندان کا بھی 1997 کے بعد سب سے اہم انٹرویو قرار دیا جا رہا ہے۔
دنیا بھر میں انٹرویو کی ریٹنگ
مذکورہ انٹرویو کو امریکا میں سی بی ایس اور برطانیہ میں آئی ٹی وی نے نشر کیا اور اس انٹرویو کو دونوں ممالک میں تقریبا 3 کروڑ بار دیکھا جا چکا ہے۔
خبر رساں ادارے ایسوسی ایٹڈ پریس (اے پی) کے مطابق امریکا میں ٹی وی ریٹنگ پر نظر رکھنے والے اہم ترین ادارے کی جانب سے جاری اعداد و شمار کے مطابق شاہی جوڑے کے انٹرویو کو امریکا میں ایک کروڑ 71 لاکھ سے زائد بار دیکھا جا چکا ہے۔
اعداد و شمار کے مطابق ایک کروڑ 70 لاکھ بار دیکھے جانے والے انٹرویو کو محض 30 لاکھ بار مکمل دورانیے سے کم دیکھا گیا، اسی طرح برطانیہ میں طویل انٹرویو کو ایک کروڑ 10 لاکھ سے زائد بار مکمل دیکھا گیا۔
خصوصی انٹرویو قرار
شہزادہ ہیری اور ان کی اہلیہ کے انٹرویو کو امریکا اور برطانیہ میں ’انٹرٹینمنٹ‘ اور ’لائف اینڈ اسٹائل‘ کے انٹرویو کے طور پر نشر کیا گیا اور دونوں کیٹیگریز میں ان کا انٹرویو پہلا انٹرویو بنا ہے، جسے ریکارڈ بار دیکھا گیا۔
مجموعی طور پر شاہی جوڑے کے انٹرویو کو امریکا اور برطانیہ میں 3 کروڑ سے زائد بار دیکھا گیا جب کہ یوٹیوب اور دیگر سوشل میڈیا پلیٹ فارمز پر بھی ان کے انٹرویوز کی کلپس کو کروڑوں بار دیکھا جا چکا ہے۔
میگھن مارکل اور شہزادہ ہیری کے انٹرویو نشر ہوتے ہی دنیا بھر کی میڈیا میں ان کے انٹریو کی خبریں ’شہ سرخی‘ کے طور پر شائع ہوئیں جب کہ امریکا اور برطانیہ کے اخبارات و جرائد نے ان کے انٹرویوز پر خصوصی اشاعتیں بھی کیں۔
میگھن مارکل اور شہزادہ ہیری کے انٹرویو سے نہ صرف امریکا اور برطانیہ بلکہ دنیا بھر میں برطانوی شاہی خاندان اور شاہی محل کی 12 سو سال کی تاریخ پر بحث شروع ہوچکی ہے۔
مذکورہ انٹرویو کے لیے اوپرا ونفرے کے پروڈکشن ہاؤس کو سی بی ایس ٹیلی وژن نیٹ ورک نے 90 لاکھ امریکی ڈالر یعنی پاکستانی سوا ارب روپے کی رقم فراہم کی، یہ واضح نہیں ہے کہ مذکورہ رقم صرف انٹرویو کو ریکارڈ کرنے کی مد میں ادا کی گئی یا اسی رقم میں اوپرا ونفرے کی فیس بھی شامل تھی۔
