راولپنڈی/ لاہور / کوئٹہ/ ایبٹ آباد : ملک بھر دہشت گردوں اور ان کے سہولت کاروں کے خلاف قانون نافذ کرنے والے اداروں کا آپریشن ردالفساد جاری پوری قوت سے جاری ہے، فسادیوں کےخلاف آپریشن ردالفساد میں مزیدکامیابیاں حاصل ہوئی ہیں۔
تفصیلات کے مطابق کوئٹہ میں کی جانے والی کارروائی میں نو اشتہاری ملزمان سمیت اٹھائیس غیر ملکی پکڑے گئے جن کے پاس سے بھاری اسلحہ برامد ہوا ہے۔
ڈی آئی جی کوئٹہ کے مطابق برآمد اسلحے میں گیارہ کلاشنکوف ،دو رائفل، ایک لائٹ مشین گن شارٹ گن، انچاس کلاشنکوف میگزین، آٹھ ہزارچارسو سے زائد مختلف گولیاں شامل ہیں۔
نوشکی میں ایف سی اور حساس ادارے نے کارروائی کرکے تخریب کاری کا منصوبہ ناکام بنادیا۔ کلی قبول نالے سے دو بیگوں سے اڑتالیس میگزین، دو گولے اور تین سو اٹھارہ پاکٹ بارودی مواد برآمد ہوا، تربت کے علاقے پسنی میں لیویز نے کارروائی کرکے پانچ ملزمان کو حراست میں لے لیا۔
ملزمان سے دو کلاشنکوف، ایک لانچر، چار گولے چار سو سے زائد گولیاں برآمد ہوئیں، ایبٹ آباد میں پولیس اور حساس اداروں نے سرچ آپریشن میں دس مشکوک افراد کو حراست میں لے لیا جن میں ایک غیر ملکی بھی شامل ہے۔
علاوہ ازیں رینجرز، پولیس اور خفیہ اداروں نے مشترکہ آپریشن میں لاہور گجرات خانپور کبیر والا، ایبٹ آباد سے اُنتیس مشکوک ملزمان کو حراست میں لے لیا۔
