کراچی : معروف سماجی کارکن اورنگی پائلٹ پراجیکٹ کی سربراہ پروین رحمان قتل کیس کی تحقیقات کا دوبارہ آغاز کردیا گیا، تحقیقات سپریم کورٹ کے حکم پر جے آئی ٹی نے شروع کی۔
تفصیلات کے مطابق اورنگی پائلٹ پروجیکٹ کی ڈائریکٹر پروین رحمان کے قتل سے متعلق ازسرنو تحقیات کے لیے نئی جے آئی ٹی نے کام شروع کردیا ہے۔
اس سلسلے میں وزیراعلیٰ سندھ کے پی ایس او اختر فاروق اور ڈی آئی جی جاوید عالم اوڈھو کو اٹھارہ اپریل کو ایف آئی اے کے سامنے طلب کرلیا گیا ہے، دونوں افسران کو طلبی کے باضابطہ نوٹس بھی جاری کردیے گئے ہیں۔
محکمہ داخلہ سندھ کے مطابق جے آئی ٹی میں حساس اداروں کے اہلکاروں کے علاوہ رینجرز اور سی ٹی ڈی کے افسران شامل ہوں گے، ٹیم کی سربراہی ایس ایس پی ویسٹ کر رہے ہیں۔
ذرائع کے مطابق جے آئی ٹی15روز میں اپنی رپورٹ جمع کرائے گی، کمیٹی میں مبینہ طور پر کیس کا رخ تبدیل کرنے کا معاملہ بھی زیر غور آئے گا جس کی باریکی سے تحقیقات کی جائے گی۔
خیال رہے کہ اورنگی پائلٹ پروجیکٹ کی سربراہ پروین رحمان کو2013میں اس وقت قتل کیا گیا جن وہ اپنے دفتر سے گھر کے لیے جا رہی تھیں ، ملزمان نے ان کی گاڑی کو بنارس کے قریب فائرنگ نشانہ بنایا جس میں وہ جانبر نہ ہو سکیں۔
مزید پڑھیں : پروین رحمان قتل کیس کا مرکزی ملزم رحیم سواتی گرفتار
بعد ازاں متعدد گرفتاریاں عمل میں آئیں، گزشتہ سال پروین رحمان قتل کیس کے مرکزی ملزم رحیم سواتی کو منگھو پیر سے حراست میں لے لیا تھا جو کہ اے این پی کے ٹکٹ پر کونسلر بھی رہ چکا تھا اور جس کے تحریک طالبان سے بھی تعلقات تھے۔
