کراچی : اورنگی ٹاؤن کے علاقے ایم پی آر کالونی میں مکان کی چھت گرگئی، اندوہناک حادثے میں تین بچوں سمیت چار افراد جاں بحق ہوگئے۔
ریسکیو ذرائع کے مطابق ملبے میں دب کر ماں اور3بچے جاں بحق ہوئے ہیں، جنہوں نے موقع پر ہی دم توڑ دیا تھا۔
ملبے سے چاروں افراد کی لاشیں نکال لی گئیں، لاشوں کو عباسی شہید اسپتال منتقل کیا جارہا ہے، ملبے میں مزید افراد کے پھنسے ہونے کا خدشہ ہے۔
کراچی: ڈکیتی اور منشیات فروشی کی بیج کنی کے لئے رینجرز اور پولیس نے اہم کارروائی کی ہے اور ایک ملزم کو دھرلیا ہے۔
ترجمان رینجرز کے مطابق رینجرز اور پولیس نے اورنگی ٹاون میں انٹیلی جنس بیس مشترکہ آپریشن کیا، آپریشن میں ڈکیتی اور منشیات فروشی میں ملوث ملزم آفتاب احمد کو گرفتار کیا گیا جوکہ شہر کے مختلف علاقوں میں جرائم اور منشیات فروشی میں ملوث ہے۔
ترجمان رینجرز کے مطابق ملزم رواں سال 15جنوری کو ملزم اورنگی ٹاؤن میں ایک شہری کے گھر میں گھسا اور گھر میں موجود خواتین کو زودوکوب کرتے ہوئے ان سے دس لاکھ روپے چھین کر فرار ہوا، گرفتاری کے بعد ملزم نے واردات کا اعتراف کیا۔
یہ بھی پڑھیں: اورنگی ٹاؤن کے خالی پلاٹ سے اسلحہ اور گولیاں برآمد، ترجمان رینجرز
ترجمان رینجرز کے مطابق ملزم نے اپنے اعترافی بیان میں بتایا کہ خواتین سے چھینی گئی رقم سے سرجانی میں ڈھائی لاکھ کاپلاٹ خریدا، ذاتی استعمال کے لئے موٹر سائیکل خریدی اور بقایا رقم سے گھریلو اخراجات پورے گئے۔
ترجمان رینجرز کے مطابق گرفتار ملزم کو قانونی کارروائی کیلئے پولیس کے حوالے کردیا گیا ہے۔
کراچی : شہر قائد میں فائرنگ سے ایک شخص ہلاک اور دو زخمی ہوگئے جبکہ پولیس نے قتل کے مقدمے میں ملوث چار مشتبہ ملزمان کو گرفتار کرلیا۔
تفصیلات کے مطابق کراچی کے علاقے اورنگی ٹاؤن الٰہی محلہ میں فائرنگ کا ایک زخمی دم توڑ گیا، فائرنگ کے واقعے میں دو افراد زخمی ہوئے تھے، نامعلوم افراد نے تنور پر فائرنگ کی، جاں بحق شخص کی شناخت نورالبشر اور زخمی کی شناخت عبداللہ کےنام سے ہوئی ہے۔
ریسکیو ذرائع کے مطابق دوسری جانب بلوچ کالونی پل کے قریب فائرنگ سے ایک شخص زخمی ہوگیا، زخمی شخص کو پولیس نے اسپتال منتقل کردیا۔
اس کے علاوہ لیاقت آباد میں پولیس نے فائرنگ کا واقعہ میں نامزد چار ملزمان گرفتارکرلیے، مقتول کی اہلیہ نے مقدمےمیں چار افراد کو نامزد کیا تھا، زیرحراست چاروں افراد مقتول کے رشتےدار ہیں، پولیس کا کہنا ہے کہ مقتول اور زیرحراست افراد میں جائیداد کا تنازع چل رہا تھا۔
علاوہ ازیں کورنگی شرافی گوٹھ میں فائرنگ سے ایک شخص زخمی ہوگیا، ریسکیوذرائع کا کہنا ہے کہ زخمی کی شناخت32سالہ فرحان گل کےنام سے ہوئی ہے، زخمی شخص کو طبی امداد کیلئے جناح اسپتال منتقل کردیا گیا۔
کراچی : اورنگی ٹاؤن میں فائرنگ کے واقعے میں دو بھائیوں سمیت تین افراد کے قتل میں ملوث ملزم کو پولیس نے گرفتار کرلیا، ملزم تنویر پولیس اہلکار ہے ، آلہ قتل برآمد کرکے مقدمہ درج کرلیا گیا۔
تفصیلات کے مطابق کراچی کے علاقے اورنگی ٹاؤن میں گزشتہ روز ہونے والے تہرے قتل کا معمہ حل ہوگیا، پولیس نے شبے کی بنیاد پر ملزم کو گرفتار کیا، ابتدائی طور پولیس نے پوچھ گچھ کی تو اس نے قتل کا اعتراف کرلیا۔
اس حوالے سے میڈیا سے گفتگو کرتے ہوئے ایس ایس پی ویسٹ نے بتایا کہ دوران تفتیش انکشاف ہوا کہ ملزم تنویر ہی تہرے قتل کا مرکزی ملزم ہے، گرفتارملزم تنویر سمن آباد انویسٹی گیشن ڈپارٹمنٹ میں تعینات ہے، ملزم نے ڈیڑھ لاکھ روپے کے تنازع پر3افراد کو قتل کیا۔
تفصیلات سے آگاہ کرتے ہوئے ایس ایس پی کا کہنا تھا کہ ملزم پولیس اہلکار نے مقتول ندیم سے ڈیڑھ لاکھ روپے کا پلاٹ خریدا تھا، مقتول ندیم نے اس سے مزید رقم کا مزید تقاضہ کیا جس پر دونوں میں تلخ کلامی ہوگئی۔
ان کا مزید کہنا تھا کہ اسی بات پر ملزم کی ندیم سے لڑائی ہوئی، ملزم نے دیگر دو افراد کو شواہد ختم کرنے کیلئے قتل کیا، جس اسلحے سے فائرنگ کی گئی وہ غیرقانونی تھا۔
پولیس نے ملزم کے قبضے سے آلہ قتل بھی برآمد کرلیا ہے، ایس ایس پی ویسٹ کے مطابق یہ قتل دشمنی کا شاخسانہ ہے، واضح رہے کہ ملزم تنویر نے گزشتہ روز رقم کے تنازعے پر اورنگی ٹاون نمبر14پاکستان بازار میں پہاڑی پر واقع گھر میں فائرنگ کرکے دو بھائیوں سمیت3افراد کو قتل کیا تھا۔
مزید پڑھیں: کراچی کے علاقے اورنگی ٹاؤن میں فائرنگ سے 3 افراد جاں بحق
پولیس کے مطابق مقتولین نے اورنگی ٹاؤن میں پہاڑی پر ایک کمرہ بنا رکھا تھا جسے وہ استعمال کرتے تھے، ابتدائی معلومات کے مطابق ان کا آپس میں جھگڑا ہوا اور نوبت فائرنگ تک جا پہنچی۔
کراچی: شہرِ قائد کے علاقے اورنگی ٹاؤن سے تعلق رکھنے والے ایک فالودہ فروش پر قسمت مہربان ہوئی تو چھپر پھاڑ کر دولت برسی، بیٹھے بیٹھے ارب پتی بن گئے۔
تفصیلات کے مطابق اورنگی ٹاؤن کے رہائشی ایک فالودے والے کو ایک غیر قانونی ٹرانزیکشن نے ارب پتی بنا دیا، ان کے بینک اکاؤنٹ میں 2 ارب روپے سے زائد کی رقم موجود ہونے کا انکشاف ہوا ہے۔
شہری عبد القادر کے اکاؤنٹ میں خطیر رقم کی موجودگی پر ایف آئی اے نے تحقیقات شروع کر دی ، فالودہ فروش نے بتایا کہ انھیں ایف آئی نے پوچھ گچھ کے لیے طلب کیا ہے۔
فالودہ فروش عبد القادر کا کہنا ہے کہ انھیں پتا نہیں کہ ان کے اکاؤنٹ میں سوا 2 ارب روپے کیسے آئے۔ فالودہ فروش نے اپنے اکاؤنٹ کی موجودگی سے بھی لاتعلقی کا اظہار کر دیا۔
عبد القادر نے بتایا ’مجھے نہیں پتا میرا اکاؤنٹ کس نے اور کیسے کھولا، مجھے پتا ہی نہیں تھا کہ میرا بینک اکاؤنٹ ہے، میں 40 گز کے گھر میں رہتا ہوں، پتا نہیں میرے اکاؤنٹ میں اتنے پیسے کیسے آئے۔‘
یہ بھی پڑھیں: امریکی شہری نے لاٹری ٹکٹ سے 24 کروڑ 56 لاکھ ڈالر جیت لیے
فالودہ بیچنے والے شہری نے مزید کہا ’مجھے جو دستخط دکھائے گئے وہ انگریزی میں ہیں، جب کہ میں انگوٹھا چھاپ ہوں، انگریزی میں دستخط نہیں کر سکتا۔‘
فالودہ فروش نے کہا کہ انھیں محرم میں پتا چلا کہ ان کے اکاؤنٹ میں اتنے سارے پیسے ہیں، ایف آئی اے نے انھیں صرف ایک بار طلب کیا، وہاں پہنچنے پر انھیں بتایا گیا کہ اکاؤنٹ میں سوا دو ارب روپے ہیں۔
عبد القادر کے بیان کے مطابق وہ 15 سال قبل گلستانِ جوہر میں پی سی او پر کام کیا کرتے تھے، اس وقت ان سے شناختی کارڈ کی فوٹو کاپی مانگی گئی تھی۔ فالودہ فروش نے کہا ’میرے دل میں چور نہیں ہے تو میں کیوں ڈروں۔‘
اورنگی ٹاؤن میں چالیس گز کے مکان میں رہائش پذیر محنت کش فالودہ فروش عبد القادر کے گھر کے بار پولیس تعینات کر دی گئی ہے۔
کراچی: رینجرز نے عام انتخابات سے چند روز قبل کراچی میں الیکشن کو سبوتاژ کرنے کی بڑی کوشش ناکام بنادی۔ اورنگی ٹاؤن میں پولیس کے ساتھ مشترکہ کارروائی میں ایم کیو ایم لندن کے 2 انتہائی مطلوب ٹارگٹ کلرز گرفتار کرلیے گئے۔
تفصیلات کے مطابق صوبہ سندھ کے دارالحکومت کراچی میں رینجرز نے اہم کارروائی کی۔
کراچی کے علاقے اورنگی ٹاؤن میں رینجرز اور پولیس کی مشترکہ کارروائی کے دوران 2 ملزمان گرفتار کرلیے گئے۔
گرفتار ملزمان کی شناخت محمد بلال لودھی اور محمد ارشاد کے ناموں سے ہوئی۔ ملزمان الیکشن سے قبل امن و امان کی صورتحال خراب کرنا چاہتے تھے۔
ترجمان رینجرز کے مطابق ملزمان مختلف سیاسی جماعتوں کے امیدواروں کو نشانہ بنانا چاہتے تھے ملزمان کا تعلق متحدہ قومی موومنٹ لندن کے ساؤتھ افریقہ نیٹ ورک سے ہے۔
ملزمان کو ایم کیو ایم لندن سیکریٹریریٹ نے مالی وسائل بھی فراہم کیے تھے۔ ملزمان نے دوران تفتیش کراچی میں دہشت گردی کی منصوبہ بندی کا اعتراف کیا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
کراچی : پانی کی بوند بوند کو ترسے ہوئے مشتعل لوگوں نے اورنگی ٹاؤن میں سابق رکن اسمبلی کو گھیر کر مارنے کی کوشش کی، پولیس نے مظاہرین پر لاٹھی چارج کردیا۔
تفصیلات کے مطابق کراچی کے علاقے اورنگی ٹاؤن پندرہ نمبر میں پانی کی عدم دستیابی کیخلاف علاقہ مکینوں کی بڑی تعداد سڑکوں پر نکل آئی۔
مظاہرے کے دوران ایم کیو ایم سے منحرف ہونے والے پی ایس پی کے رہنما سیف الدین خالد بھی وہاں پہنچ گئے جہاں انہیں لینے کے دینے پڑگئے، مشتعل افراد نے سابق رکن اسمبلی کو گھیرلیا اور شدید نعرے بازی کی۔
اس موقع پر پاک سرزمین پارٹی کے رہنما کو لوگوں نے مارنے کی بھی کوشش کی، مشتعل خواتین ڈنڈے لے کر آگئیں، لوگوں نے ان پر پانی بیچنے کا الزام لگایا، مظاہرین سابق رکن اسمبلی کی ایک بات بھی سننے کو تیار نہ تھے۔
حالات کی نزاکت کو دیکھتے ہوئے کچھ لوگ سیف الدین خالد کو عوام کے نرغے سے بحفاظت نکال کر قریب ہی ایک دکان میں لے گئے، سیف الدین خالد نے میڈیا سے گفتگو کرتے ہوئے کہا کہ میں تویہاں مظاہرین کا ساتھ دینے آیا تھا لیکن شاید ان لوگوں کو اصل بات کا علم نہیں یا پھر ان کو سکھا کر بھیجا گیا ہے۔
اس سے قبل پانی کے لیے احتجاج کرنے والوں اور پولیس میں جھڑپ بھی ہوئی، پولیس لاٹھی چارج سے کچھ لوگ زخمی بھی ہوگئے، شہریوں کا کہنا تھا کہ قریبی پمپنگ اسٹیشن سے واٹر ٹینکرز بھر بھر کرجارہے ہیں جبکہ علاقہ میکن ماہ رمضان میں بھی پانی سے محروم ہیں۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
تفصیلات کے مطابق پولیس افسران کی خصوصی پریس کانفرنس میں بتایا گیا کہ بچی سے زیادتی اور قتل کیس میں چند ملزمان واردات کے پہلے ہی دن گرفتار کرلیے گئے تھے، بعد میں مزید ملزمان گرفتار کیے گئے۔
ایس ایس پی انویسٹی گیشن ذیشان نے پریس کانفرنس میں بتایا کہ جن گرفتار ملزمان کے ڈی این اے میچ ہوئے ہیں ان میں رحیم، فضل اور فضل کا بیٹا محراب شامل ہیں۔
ایس ایس پی عمر شاہد نے بتایا کہ بچی سے زیادتی و قتل کی اصل وجہ دشمنی تھی۔ خیال رہے کہ دو ہفتے قبل کراچی کے علاقے اورنگی ٹاؤن میں چھ سالہ بچی لاپتہ ہوگئی تھی، بعد ازاں جس کی لاش منگھوپیر کی کچرا کنڈی سے مل گئی تھی۔ بچی کو گلے میں پھندا ڈال کر بے دردی سے قتل کیا گیا تھا۔
واضح رہے کہ اورنگی ٹاؤن میں ہونے والے اس افسوس ناک واقعے کی وجہ سے پورے علاقے میں غم و غصے کی ایک لہر دوڑ گئی تھی اور لوگوں نے سڑکیں بلاک کرکے شدید احتجاج کیا تھا جس میں گولی لگنے سے ایک شخص بھی جاں بحق ہوگیا تھا۔
احتجاج کے بعد وزیر داخلہ سندھ سہیل انور سیال نے واقعے کا نوٹس لے لیا تھا اور پولیس کو تفتیش تیز کرنے کی ہدایت کردی تھی۔ قبل ازیں پولیس کی طرف سے گرفتار ملزم کے بارے میں چھ سالہ بچی رابعہ کی والدہ نے کہا تھا کہ وہ اصل ملزم نہیں ہے۔
اس افسوس ناک واقعے پر سیاسی رہنماؤں نے بھی مذمتی بیانات جاری کیے، جماعت اسلامی کے امیر سراج الحق، ایم کیو ایم پاکستان کے سربراہ فاروق ستار، خواجہ اظہار، پی ٹی آئی رہنماؤں اور سربراہ پی ایس پی مصطفیٰ کمال نے بچی سے زیادتی اور قتل پر شدید غم وغصے کا اظہار کرتے ہوئے کہا تھا کہ قاتل کو فوری گرفتار کر کے عبرتناک سزا دی جائے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
کراچی : اورنگی ٹاؤن میں قطراسپتال کے قریب نامعلوم افراد کی فائرنگ سے ایک شخص جاں بحق اور ایک زخمی ہوگیا، جاں بحق شخص اور زخمی کا تعلق پاک سرزمین پارٹی سےہے۔ پی ایس پی نے قاتلوں کی گرفتاری کا مطالبہ کیا ہے۔
تفصیلات کے مطابق کراچی کےعلاقے اورنگی ٹاؤن میں قطراسپتال کے قریب دو نامعلوم موٹرسائیکل سواروں نے فائرنگ کرکے ایک شخص کو موت کے گھاٹ اتار دیا جبکہ دوسرا زخمی ہوگیا۔
مسلح افراد واردات کے بعد باآسانی فرار ہونے میں کامیاب ہوگئے، پولیس نے جائے وقوعہ پر پہنچ کر دونوں افراد کو اسپتال منتقل کیا۔
جاں بحق شخص کی شناخت ندیم اللہ کے نام سے ہوئی اور زخمی کا نام راشد ہے۔ جاں بحق اور زخمی ہونے والوں کا تعلق پاک سرزمین پارٹی سے بتایا جا رہا ہے۔
دونوں نوجوان حملے کے وقت وہ گھر کےباہر بیٹھے تھے، ایس پی اورنگی ٹاؤن کے مطابق واقعہ بظاہرٹارگٹ کلنگ کا لگتاہے،جائے وقوعہ سےنائن ایم ایم پسٹل کی گولیوں کے چار خول ملےہیں، پولیس نے واقعے کا مقدمہ درج کر کے تفتیش کا آغاز کردیا ہے۔
دریں اثناء پی ایس پی کے رہنما افتخارعالم نے واقعے کے بعد مقتول کے گھرجاکراہل خانہ سے تعزیت کی، میڈیا سے گفتگو میں انہوں نے بتایا کہ مقتول ندیم نے کچھ عرصہ قبل ہی اپنی مرضی سے پی ایس پی میں شمولیت اختیار کی تھی، جس کی اسے سزا دی گئی۔
انہوں نے متعلقہ حکام سے مطالبہ کیا کہ ذمہ داران کو جلد ازجلد گرفتار کرکے قانون کے کٹہرے میں لایا جائے۔
کراچی : شہر قائد میں دو گھنٹوں کے دوران فائرنگ کے مختلف واقعات میں ایک شخص جاں بحق اور سات افراد زخمی ہوگئے۔ سہراب گوٹھ میں پولیس نے سرچ آپریشن کرکے متعدد افراد کو حراست میں لے لیا۔
پولیس کے مطابق لیاقت آباد میں شیش محل کے قریب فائرنگ کے واقعے میں فرحان نامی شہری زخمی ہوا جو دوران علاج دم توڑ گیا، اورنگی ٹاؤن کے مختلف علاقوں میں فائرنگ کے واقعات میں پانچ افراد زخمی ہوگئے.
اورنگی ٹاؤن 10 نمبر منگل بازارکے قریب فائرنگ سے زخمی افراد کی شناخت ہوگئی، فائرنگ سے زخمی ہونے والوں میں باپ بیٹا سمیت 5 افراد شامل ہیں، واقعے میں عبدالحفیظ، ارشد،شمیر، ضحیف اور فیضان زخمی ہوئے،.
پولیس کے مطابق فائرنگ کاواقعہ پانی کےتنازع کا شاخسانہ ہے، فائرنگ کرنے والے4ملزمان کی گرفتاری کی کوششیں جاری ہیں، زخمیوں کوعباسی شہیداسپتال منتقل کردیا گیا۔
دوسری جانب سہراب گوٹھ اور لائٹ ہاؤس میں فائرنگ کے واقعات میں دو افراد زخمی ہوئے، سہراب گوٹھ اور اطراف کے علاقوں میں پولیس کی جانب سے سرچ آپریشن کیا گیا ، پولیس کے مطابق آپریشن مسافر خانوں اور اطراف کے گھروں میں بھی کیا گیا جہاں سے متعدد مشتبہ افراد کو حراست میں لیاگیا۔