اسلام آباد : حکومت پاکستان نے بیرون ملک مقیم پاکستانیوں کیلئے رعایتی نرخوں پر ہوائی ٹکٹ فراہم کرنے کا فیصلہ کیا ہے، سات سال سے زائد عرصہ کام کرنے والے افراد اسکیم سے مستفید ہوسکیں گے۔
یہ بات وزیراعظم کی معاون خصوصی برائے انسداد غربت اور سماجی تحفظ ڈاکٹر ثانیہ نشتر نے میڈیا سے گفتگو کرتے ہوئے کہی، انہوں نے کہا کہ بیرون ملک مقیم پاکستانی مزدوروں کی فلاح و بہبود اور مسائل کے لیے پاکستان کی حکومت نے اہم اقدامات اٹھانے کا فیصلہ کیا ہے۔
اس حوالے سے حکومت بہت جلد سات سال سے زائد عرصے تک بیرون ملک کام کرنے والے کم تنخواہ دار افراد کے لیے رعایتی نرخوں پر ہوائی ٹکٹ فراہم کرے گی تاکہ وہ باآسانی اپنے گھروں کو لوٹ سکیں۔
انہوں نے بتایا کہ پاکستانی سفارت خانوں میں نہ صرف کمیونٹی ویلفئیر اتاشیوں کی تعداد میں اضافہ کیا جارہا ہے بلکہ اچھی شہرت رکھنے والے تارکین وطن کو بھی اہم ذمہ داریاں سونپی جارہی ہیں، اس کے علاوہ تارکین وطن کے حقوق کی حفاظت کے لیے قائم پروٹیکٹر مائیگریشن دفاتر میں بھی اضافہ کیا جا رہا ہے۔
ڈاکٹر ثانیہ نشتر کا مزید کہنا تھا کہ ورکرز کے پہلے کنٹریکٹ ایگریمنٹ کی مدت کم از کم تین سال کرنے کے لیے مختلف ممالک کے ساتھ بات چیت جاری ہے۔ اس کی وجہ یہ ہے کہ غیر ہنر مند ورکروں تو پہلے ایک سال میں اپنے ملک جانے کا خرچ تک کمانے کے بھی قابل نہیں ہوتا۔
بیرون ملک جانے سے پہلے دی جانے والی بریفنگز کے معیار کو بھی بہتر بنانے پر توجہ دی جا رہی ہے تاکہ انہیں اپنے حقوق کے بارے میں مکمل آگاہی حاصل ہو۔
