کراچی ایئرپورٹ پر گزشتہ روز 3 غیر ملکی طیاروں کے ساتھ حادثات کے معاملے پر اہم پیشرفت سامنے آئی ہے۔
تینوں طیارے تاحال کراچی ایئرپورٹ پر گراؤنڈ ہیں، پی اے اے کی جانب سے طیاروں کے یکے بعد دیگرے حادثات کی تحقیقات کی جارہی ہیں۔
اس حوالے سے ذرائع کا کہنا ہے کہ گزشتہ روز بین الاقوامی کوریئر کمپنی کے ایک طیارے سے لوڈر ٹرک ٹکرا گیا تھا، جس کی وجہ سے طیارے کے بائیں ونگز کی لائٹس ٹوٹ گئی تھیں۔
ذرائع کے مطابق بین الاقوامی کوریئر کمپنی کے کارگو طیارے کو 3 جگہوں پر شدید نقصان پہنچا ہے، تاہم طیارے کا تاحال مرمتی کام شروع نہیں ہوسکا۔ ماہر ٹیم بیرون ملک سے کراچی آکر طیارے کی مرمت کا باقاعدہ کام شروع کرے گی۔
اس کے علاوہ ترکش ایئرلائن کا طیارہ بھی تاحال کراچی ایئرپورٹ کی پارکنگ میں گراؤنڈ کیا گیا ہے، ترکش ایئر کے طیارے کو انجن سے پرندہ ٹکرانے پر گراؤنڈ کیا گیا تھا۔
ذرائع کا کہنا ہے کہ سعودی ایئر کا طیارہ بھی تاحال کراچی ایئرپورٹ پر موجود ہے، سعودی ایئر کے طیارے کے انجن میں آگ کی وارننگ پر ایمرجنسی لینڈنگ کی گئی تھی، پی آئی اے انجینئرنگ ٹیم نے طیارے سے خرابی دور کرنے کیلئے کام شروع کردیا ہے۔
