اسلام آباد: وزیر اعظم شہباز شریف نے ایوان صدر میں صدر مملکت آصف علی زرداری سے ملاقات کی جس میں پاک بھارت کشیدہ صورتحال پر تبادلہ خیال کیا گیا۔

ملاقات میں وزیر اعظم شہباز شریف نے بھارتی جارحیت اور پاکستان کے آپریشن بنیان مرصوص سے آگاہ کیا، صدر مملکت نے بھارتی جارحیت کا منہ توڑ جواب دینے پر پاک فوج کی بہادری کو سراہا۔

پاک بھارت کشیدگی سے متعلق تمام خبریں

وزیر اعظم اور صدر مملکت نے بھارتی جارحیت کا بھرپور جواب دینے پر اطمینان کا اظہار کیا، پاک فوج کی پیشہ ورانہ صلاحیتوں اور کامیابی پر مبارکباد دی اور بھارتی میزائل اور ڈرون حملوں کی سخت الفاظ میں مذمت کی۔

آصف علی زرداری نے کہا کہ پاکستان نے ذمہ دار قوم کی حیثیت سے بھارتی اشتعال انگیزیوں پر کافی تحمل کا مظاہرہ کیا، پاکستان کے پاس اپنی خود مختاری اور عوام کے دفاع کیلیے فیصلہ کن جواب دینے کے سوا کوئی چارہ نہیں بچا۔

انہوں نے کہا کہ پوری قوم متحد اور مسلح افواج کی بھرپور حمایت کرتی ہے، پاکستان ملکی خود مختاری اور علاقائی سالمیت کا ہر قیمت پر دفاع کرے گا۔

ملاقات میں نائب وزیر اعظم اور وزیر خارجہ اسحاق ڈار اور وزیر قانون و انصاف اعظم نذیر تارڑ بھی شریک تھے۔

اسلام آباد: کامیاب آپریشن ’بنیان مرصوص‘ کے حوالے سے سیاسی رہنماؤں نے وزیر اعظم شہباز شریف کو مکمل تعاون اور یکجہتی کا یقین دلا دیا۔

وزیر اعظم نے موجودہ صورتحال میں سیاسی جماعتوں کے رہنماؤں بلاول بھٹو زرداری، بیرسٹر گوہر خان، مولانا فضل الرحمان، خالد مقبول صدیقی، حافظ نعیم الرحمان، خالد حسین مگسی اور چوہدری سالک سے ٹیلیفونک رابطہ کیا۔

اس موقع پر شہباز شریف نے کہا کہ افواج پاکستان نے بھارتی جارحیت کا آج مربوط طریقے سے طاقتور جواب دیا، بھارت نے پاکستان پر میزائل اور ڈرون حملے کیے، بھارتی جارحانہ اقدامات کے باوجود پاکستان نے انتہائی تحمل سے کام لیا۔

پاک بھارت کشیدگی سے متعلق تمام خبریں

انہوں نے کہا کہ پہلگام واقعے کے بعد پاکستان نے حقائق جاننے کیلیے غیر جانبدارانہ تحقیقات کا کہا لیکن بھارت نے انکار کیا، آج صبح دوبارہ بھارت نے نور خان ایئربیس اور دیگر مقامات پر میزائل سے حملے کیے، بھارتی حملوں میں نہتے اور معصوم شہریوں کو نشانہ بنایا گیا۔

ان کا کہنا تھا کہ بھارت کی ان پے در پے کارروائیوں کا ہماری بہادر افواج نے بھرپور جواب دیا، پاکستان نے بھارت ان ملٹری تنصیبات کو نشانہ بنایا جن سے پاکستان پر حملے کیے گئے، آج ہم نے بھارت کو منہ توڑ جواب دیا ہے اور بے گناہوں کے خون کا بدلہ لے لیا، ہمیں اپنی افواج پر فخر ہے۔

وزیر اعظم نے سیاسی رہنماؤں کو بتایا کہ پوری قوم کو میں اس کامیاب آپریشن پر مبارکباد پیش کرتا ہوں، بھارت کی پاکستان کی سالمیت کو نقصان پہنچانے کی مذموم کوششوں کو ناکام بنانے کیلیے پرعزم ہیں۔

سیاسی رہنماؤں نے پاک فوج کے جوانوں کے حوصلے اور پیشہ ورانہ مہارت کو خراج تحسین پیش کیا اور وزیر اعظم کو مشکل کی گھڑی میں اپنے اور پوری قوم کے تعاون اور یکجہتی کا یقین دلایا۔

سیاسی قیادت نے کہا کہ مادر وطن کے دفاع کیلیے ہماری بہادر افواج کی مہارت قابل تحسین ہے۔ وزیر اعظم شہباز شریف نے سیاسی قیادت کا واشگاف الفاظ میں ساتھ دینے پر تشکر کا اظہار کیا۔