گلگت : پاکستان میں پہلی بار پاک فضائیہ کی ٹیم نے آئس ہاکی میچ جیت لیا، گلگت بلتستان اسکاؤٹس کو پنالٹی شوٹ آؤٹ میں شکست کا سامنا کرنا پڑا۔
تفصیلات کے مطابق پاکستان میں پہلی بار پاک فضائیہ کی ٹیم نے آئس ہاکی میچ جیت لیا، پاکستان کی تاریخ میں پہلا آئس ہاکی میچ نلتر میں کھیلا گیا۔
میچ پاک فضائیہ اور گلگت بلتستان اسکاؤٹس کی ٹیموں کے درمیان کھیلا گیا، اس حوالے سے ترجمان پاک فضائیہ کا کہنا ہے کہ مقررہ وقت میں دونوں ٹیمیں غیر معمولی مہارت کے باوجود گول نہ کرسکیں، میچ کا فیصلہ پنالٹی شوٹ آؤٹ پر ہوا۔
پاک فضائیہ کے کھلاڑی نے پنالٹی شوٹ آؤٹ میں اپنی ٹیم کو کامیابی دلائی، پاک فضائیہ کے کھلاڑی کا واحد گول ٹیم کی جیت بن گیا، اس طرح پاکستان میں پہلی بار پاک فضائیہ کی ٹیم نے آئس ہاکی میچ جیت لیا۔
ترجمان پاک فضائیہ کے مطابق ملک میں آئس ہاکی کی تاریخ کو گلگت میں مقامی کھیل گٹل سے جوڑا جاسکتا ہے، گٹل نامی کھیل دو اسٹکس کی مدد سے کھیلا جاتا ہے۔
مسقط : پاک فضائیہ کے سربراہ ائیرچیف مارشل مجاہد انور خان نے اپنے عمان کے دورے کے دوران آج مسقط میں رائل عمان فضائیہ کے ہیڈکوارٹرز کا دورہ کیا۔
ان کی ہیڈ کوارٹرز آمد پر رائل عمان فضائیہ کے کمانڈ ر ائیر وائس مارشل متار علی متار العبیدنی نے پاک فضائیہ کے سربراہ کا استقبال کیا۔ رائل عمان فضائیہ کے ایک چاق و چوبند دستے نے انہیں سلامی پیش کی۔
ائیر چیف نے کمانڈر رائل عمان فضائیہ کے سربراہ سے ان کے آفس میں ملاقات کی۔ دونوں معزز شخصیات نے پیشہ ورانہ اور باہمی دلچسپی کے امور پر تبادلہ خیال کیا۔
رائل عمان فضائیہ کے کمانڈر نے پاک فضائیہ کی اعلیٰ پیشہ ورانہ مہارت کی تعریف کی، پاک فضائیہ کے سربراہ نے کہا کہ ہمیں دونوں عظیم ممالک اور اس کی فضائی افواج کے مابین برادرانہ تعلقات پر فخرہے ۔
انہوں نے اس بات کا اعادہ کیاکہ دو نوں ممالک کے مابین باہمی تعلقات کو مزید فروغ دیا جائے گا۔
پولینڈ : پاک فضائیہ کے جے ایف17تھنڈر طیارے نے پولینڈ میں جاری پولش ائیر شو میں دھوم مچادی، طیارے نے شاندار فضائی پاسٹ کا مظاہرہ کیا۔
تفصیلات کے مطابق پولینڈ کے شہر رڈوم میں ہونے والے ایئر شو میں قومی پرچم کے رنگوں سے مزین فخرپاکستان پاک فضائیہ کے طیارے جے ایف 17تھنڈر نے ملک کا نام روشن کردیا۔
انٹرنیشنل ایئرشو میں پاک فضائیہ کے جے ایف17تھنڈر طیارے نے شاندار فضائی پاسٹ کا مظاہرہ کیا، ونگ کمانڈر ذیشان بریار نے مظاہرے کے دوران ناقابلِ یقین فضائی کرتب دکھائےجس کی حاضرین نے دل کھول کر داد دی۔
پولینڈ میں ہونے والے انٹرنیشنل ایئرشو میں ائیر مارشل ارشد ملک، وائس چیف آف دی ائیر سٹاف بھی موجود تھے، اس موقع پر ائیر مارشل ارشد ملک کا کہنا تھا کہ پاک فضائیہ کی اس شو میں شمولیت دنیا میں پاکستان کے مثبت تاثر کو اجاگر کرنے کی سمت ایک اہم قدم ہے۔
واضح رہے کہ مذکورہ ایئر شو میں پاکستان سمیت 22 ممالک کے جنگی جہازوں نے شرکت کی، انٹرنیشنل ایئر شو پولینڈ فضائیہ کے سو سال مکمل ہونے پر منعقد کیا گیا ہے۔
سرگودھا: پاک فضائیہ کے سربراہ ایئر چیف مارشل مجاہد انور خان نے کہا ہے کہ وطن کے لیے جینے اور وطن پر نثار ہونے کے عہد کی پاسداری ہمارا اولین فرض ہے۔
ان خیالات کا اظہار انہوں نے ایئر پاور سینٹر آف ایکسیلنس سرگودھا میں کمبیٹ کمانڈرز اسکول کے 50ویں فضائیہ کمانڈر کورس کی گریجویشن تقریب سے خطاب کرتے ہوئے کیا، پاک فضایہ کے سربراہ اس تقریب کے مہمان خصوصی تھے۔
ایئر چیف مارشل مجاہد انور خان نے کہا کہ برسوں کے تجربات سے ثابت ہوچکا ہے کہ بہترین تربیت یافتہ اور عزم و ہمت کی مالک فوج افرادی قوت اور ہتھیاروں کی کمی جیسے عوامل پر بھی قابو پالیتی ہے۔
انہوں نے اس بات پر اطمینان کا اظہار کیا کہ کمبیٹ کمانڈرز اسکول پاک فضائیہ کی عسکری قیادت کی بے مثال عملی تربیت میں کلیدی کردار ادا کررہا ہے، حب الوطنی کے جذبے پر زور دیتے ہوئے انہوں نے اس عزم کا اعادہ کیا کہ پاک فضائیہ پاکستانی کی فضائی سرحدوں کی حفاظت میں بھرپور کردار ادا کرتی رہے گی۔
اس موقع پر گریجویٹنگ آفیسرز میں سرٹیفکیٹ اور اعلیٰ کارکردگی کا مظاہرہ کرنے والوں میں ٹرافیاں تقسیم کی گئیں، بہترین کمبیٹ کمانڈر کی چیف آف دی ایئر اسٹاف ٹرافی ونگ کمانڈر فہد ساجد پیرزادہ نے حاصل کی جبکہ بہترین کمبیٹ کنٹرولر کی ایئر آفیسر کمانڈنگ ایئر ڈیفنس کمانڈ ٹرافی اسکواڈرن لیڈر طیب سعید قریشی نے حاصل کی۔
تقریب میں پرنسپل اسٹاف آفیسرز کے علاوہ پاک فضائیہ کے فیلڈ کمانڈرز نے بھی شرکت کی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
لاہور: وزیر اعلیٰ پنجاب شہباز شریف نے کہا ہے کہ پاک فضائیہ کے تعاون سے ڈیرہ غازی خان میں تعلقہ ہیڈکوارٹر اسپتال فورٹ منرو کا منصوبہ اہم سنگ میل ہے۔
ان خیالات کا اظہار انھوں نے پنجاب حکومت اور پاک فضائیہ میں مفاہمتی یادداشت پر دستخط کی تقریب سے خطاب کرتے ہوئے کیا۔ تقریب سے ایئر چیف مارشل مجاہد انور نے بھی خطاب کیا۔
شہباز شریف نے کہا کہ پاکستان ایئر فورس کی مینجمنٹ شان دارہے، پنجاب حکومت نے پاک فضائیہ کے ساتھ ہمیشہ ہرممکن تعاون کیا ہے۔
وزیر اعلیٰ پنجاب کا کہنا تھا کہ لاہور میں قائم پاکستان کڈنی اینڈ لیور انسٹی ٹیوٹ اینڈ ریسرچ سینٹر اچھا کام کر رہا ہے، خیال رہے یہ بیس ارب روپے لاگت سے بنایا گیا جدید اسپتال ہے۔
انھوں نے کہا کہ ہم نے پاک فضائیہ کے ساتھ مل کر درپیش چیلنجز کا سامنا کیا، 2010 کے سیلاب میں بھی پاک فضائیہ نے بھرپورتعاون کیا تھا۔
واضح رہے کہ وزیر اعلیٰ پنجاب شہباز شریف نے گزشتہ دنوں اورنج ٹرین منصوبے کی آزمائشی سروس کا افتتاح بھی کردیا ہے، اس موقع پر ان کا کہنا تھا کہ اورنج لائن ٹرین کی کامیاب آزمائشی سروس سنگ میل ہے، ہم نے عالمی معیار کے ماس ٹرانزٹ سسٹم کو عملی جامہ پہنایا ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
کراچی : ایئرمارشل ارشد ملک کو پاک فضائیہ کا نائب سر براہ مقرر کردیا گیا، انہیں شاندار عسکری خدمات پر ہلال امتیاز (ملٹری) سے نوازا گیا۔
ترجمان پاک فضائیہ کے مطابق ایئر مارشل ارشد ملک کو پاک فضائیہ کا وائس چیف مقرر کیا گیا ہے، ایئر مارشل ارشد ملک12جولائی1962کو فیصل آباد میں پیدا ہوئے، انہوں نے1978میں 76ویں جی ڈی پی کورس میں شمولیت اختیار کی۔
ایئر مارشل ارشد ملک نے دسمبر1983میں بطور فائٹر پائلٹ کمیشن حاصل کیا، ایئرمارشل ارشد ملک کئی تربیتی اور لڑاکا طیارے اڑا چکے ہیں، ارشد ملک فائٹر اسکواڈرن، فلائنگ ونگ کی کمان کرچکے ہیں۔
انہوں نے آپریشنل ائیر بیس، ریجنل ائیر کمانڈ کی ذمہ داری بھی نبھائی، اس کے علاوہ ارشد ملک ڈپٹی اور بعد ازاں چیئرمین پی اے سی کامرہ بھی تعینات رہے، ترجمان کے مطابق ایئرمارشل ارشد ملک کو شاندار خدمات پر ہلال امتیاز (ملٹری) سے نوازا گیا۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
اسلام آباد : پاک فضائیہ کے جے ایف17تھنڈر سے لیس28نمبر ملٹی رول اسکواڈرن کا قیام عمل میں لایا گیا ہے، تقریب کے مہمان خصوصی پاک فضائیہ کے سربراہ ایئرچیف مارشل سہیل امان تھے۔
تفصیلات کے مطابق پاکستان ایئر فورس نے ایک اور سنگ میل عبور کرتے ہوئے جے ایف17تھنڈر سے لیس28نمبر ملٹی رول اسکواڈرن تشکیل دیا ہے.
اس موقع پر اسلام آباد میں منعقدہ تقریب سے خطاب کرتے ہوئے مہمان خصوصی پاک فضائیہ کے سربراہ ایئرچیف مارشل سہیل امان نے کہا کہ پاک فضائیہ کو ملک کے دشمنوں کی سازشوں کا بخوبی ادراک ہے، ہم ایک امن پسند قوم ہیں اس لیے نہیں چاہتے کہ کوئی ہماری فضائی حدود کی خلاف ورزی کرے۔
ایئرچیف کا کہنا تھا کہ ہم نے دہشت گردی کے ناسور کو جڑ سے اکھاڑنے کے لیے ہرممکن کوشش کی ہے اور ہماری اسی جدوجہد کے صلے میں ملک میں امن کی بحالی ممکن ہوئی، نامساعد حالات،غیریقینی صورتحال کے باوجود امن کےخواہاں ہیں۔
سہیل امان کا مزید کہنا تھا کہ28ملٹی رول اسکواڈرن کے ذمے مغربی سرحدوں کی فضائی نگرانی ہے، یقین دلاتاہوں کسی فضائی خلاف ورزی پردفاع کی صلاحیت رکھتےہیں۔
ایئرچیف مارشل سہیل امان نے کہا کہ مجھے بے حد خوشی ہے کہ بلوچستان میں نمبر28اسکواڈرن کا قیام عمل میں لایاجارہاہے، بلوچستان عظیم صوبہ ہے اورہم سب کے لیےنہایت اہمیت کاحامل ہے۔
بلوچستان کے لوگوں کارویہ دوستانہ اورجذبہ حب الوطنی سےبھرپورہے، بلوچ عوام کے کردارکو وطن کی ترقی میں نظراندازنہیں کیاجا سکتا۔
ایئرچیف نے کہا کہ سی پیک منصوبہ ملکی ترقی میں اہم سنگ میل کی حیثیت رکھتا ہے،سی پیک صرف بلوچستان ہی نہیں بلکہ پورے ملک کی تاریخ اورحالت کو بدل دے گا۔
ترجمان پاک فضائیہ کے مطابق تقریب میں اسکواڈرن آفیسر کمانڈنگ، ونگ کمانڈر عامرعمران کو اسکواڈرن کا نشان عطا کیا گیا،4جےایف17تھنڈرطیاروں کی فارمیشن نےفلائی پاسٹ کامظاہرہ بھی کیا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
اسلام آباد : پی اے ایف نور خان پر پاک فضائیہ کے تاریخی اسکواڈرن نمبر6 کی 75 سالہ تقریب منعقد ہوئی، تقریب کے مہمانِ خصوصی پاک فضائیہ کے سربراہ ائیر چیف مارشل سہیل امان تھے۔
اس موقع پر پاک فضائیہ کے سابق ہیروز، سابق سربراہان اور ریٹائرڈ اور حاضر سروس افسران نے بڑی تعداد میں شرکت کی۔
تقریب کے دوران اس شاندار اسکواڈرن کی درخشاں تاریخ پر محیط ایک بہترین ڈاکومنٹری دکھائی گئی، پاک فضائیہ کے سربراہ نے اس موقع پر پاکستان پوسٹ کی جانب سے نمبر 6اسکواڈرن کی 75سالہ خدمات کو خراجِ تحسین پیش کرنے کے لئے جاری کردہ ٹکٹ کی نقاب کشائی بھی کی۔
شرکاء سے خطاب کرتے ہوئے پاک فضائیہ کے سربراہ نے کہا کہ پاک فضائیہ پندرہ سال سے دہشت گردی کے خلاف جنگ میں کلیدی کردار ادا کررہی ہے جس سے انہیں قیمتی تجربات حاصل ہوئے، اسکواڈرن نے آپریشن ضرب عضب کی کامیابی میں بھی نمایاں کردار ادا کیا۔
ان کا مزید کہنا تھا کہ نمبر6 سکواڈرن کے لڑاکا دستہ نے بہترین پیشہ وارانہ مہارت سے ایسے علاقوں میں کارروائی کی جہاں دہشت گرد چھپے ہوئے تھے اور پاک فضائیہ کے لڑاکا طیاروں کی بھرپور معاونت کی، اسی وجہ سے دہشت گردوں کے خلاف آپریشنز پاک فضائیہ میں تاریخی کامیابی حاصل کی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد : سعودی عرب کے نائب وزیر دفاع محمد بن عبداللہ نے ایئرہیڈ کوارٹرز اسلام آباد کا دورہ کیا، پاک فضائیہ کے سربراہ ایئرچیف مارشل سہیل امان نے استقبال کیا۔
ترجمان پاک فضائیہ کے مطابق سعودی نائب وزیر دفاع محمد بن عبداللہ جب ایئرہیڈ کوارٹرز اسلام آباد پہنچے تو ان کا شاندار استقبال کیا گیا، پاک فضائیہ کےچاق وچوبند دستے نے انہیں سلامی پیش کی۔
اس موقع پر سعودی نائب وزیردفاع نے ایئرچیف مارشل سہیل امان سے خصوصی ملاقات کی، ملاقات میں پیشہ ورانہ دلچسپی کے امورپر تبادلہ خیال کیا گیا۔
ترجمان پاک فضائیہ کے مطابق سعودی نائب وزیردفاع نے دہشتگردی کے خلاف جنگ میں پاک فضائیہ کے کردارکو سراہا، انہوں نے مشکل کی گھڑی میں پاکستان کے شانہ بشانہ کھڑے ہونےکے عزم کا اعادہ بھی کیا۔
ایئرچیف مارشل نے اس موقع پر کہا کہ پاکستان اورسعودی عرب کے درمیان پرانے، دوستانہ اور برادرانہ تعلقات ہیں ،ایوی ایشن کے شعبے اور فوجی تربیت میں تعاون جاری رکھیں گے۔
سعودی وفد کو پاک فضائیہ کے تنظیمی ڈھانچے، پیشہ ورانہ کردارپر بریفنگ بھی دی گئی۔
کراچی: شہر قائد میں واقع پی ایف میوزیم میں ایئر چیف مارشل سہیل امان نے یادگار شہدا کا افتتاح کردیا۔
کراچی کے پی اے ایف میوزیم میں یادگار شہداء کی افتتاحی تقریب سے خطاب کرتے ہوئے پاک فضائیہ کے سربراہ ائیر چیف مارشل سہیل امان کا کہنا تھا کہ قوم ان شہدا کو سلام پیش کرتی ہے جنہوں نے جانوں کا نذرانہ دے کر ملک کو جلا بخشی ہے، یادگار شہدا پاک فضائیہ کی وطن سے محبت کی علامت ہے، شہدا کی قربانیوں کی بدولت ہم آزاد فضا میں سانس لے رہے ہیں۔
ان کا کہنا تھا کہ شہداء نے مادر وطن کی حفاظت کے لئے اپنی جانوں کے نذرانے پیش کیے، پوری قوم کو شہداء کی قربانیوں پر فخر ہے۔ یادگار شہداء سے نوجوانوں کو تاریخ کی اہمیت کا اندازہ ہوگا۔
پاک فضائیہ کے سربراہ کا کہنا تھا کہ شہداء نے تاریخی کارناموں کے ذریعے ہم پر بھی بھاری ذمہ داری عائد کر دی ہے، پاک فضائیہ کا ہر جوان اور افسر شہیدوں کے نقش قدم کی خواہش رکھتا ہے، پی اے ایف ملک کا پرچم ہمیشہ سر بلند رکھے گی۔
افتتاحی تقریب میں نشان حیدر راشد منہاس کی والدہ بھی شریک تھیں ۔جنگ ستمبر کے شہدا اور غازیوں کے اہل خانہ بھی شریک ہوئے، تقریب میں پاک فضائیہ کے جوانوں نے پریڈ بھی کی جبکہ 1965کے شہدا کو خراج عقیدت پیش کیا گیا۔
