اسلام آباد : ایرانی قومی سلامتی کمیٹی کے چیئرمین علاءالدین نے کہا ہے کہ ایران پاکستان گیس پائپ لائن دونوں ممالک کی ترجیحات میں شامل ہے، امید ہے پاکستان بھی جلد پائپ لائن بچھانے کا کام مکمل کرلے گا۔
ان خیالات کا اظہار انہوں نے اسلام آباد میں پریس کانفرنس سے خطاب کرتے ہوئے کیا، ان کے ہمراہ ایران کے سفیرمہدی ہنردوست بھی موجود تھے۔
ایرانی قومی سلامتی کے چیئرمین نے صحافیوں سے گفتگو کرتے ہوئے کہا کہ پاکستان کادورہ کرنے پرانتہائی خوش ہوں، دورے کا مقصد علاقائی صورت حال پربات چیت کرنا ہے۔
انہوں نے بتایا کہ دورے کے دوران مشیرخارجہ سرتاج عزیز، ناصر جنجوعہ ایازصادق، رضاربانی، مشاہد حسین سید سے ملاقاتیں ہوئیں ہیں۔ ان کا کہنا تھا کہ ایران اور پاکستان کے تعلقات بہت مضبوط ہیں اور حالیہ دورے کا مقصد تعلقات کی نئی راہیں تلاش کرنا ہے۔
چیئرمین علاءالدین نے کہا ہے کہ چاہ بہارپورٹ اورگوادر پورٹ ایک ہی جیسی ہیں، چاہ بہاراور گوادر بندرگاہ کو سسٹر پورٹ کادرجہ دیا گیا ہے۔
